Meghalaya Honeymoon Murder Case Supreme Court Verdict : వివాహబంధంతో నూతన జీవితంలోకి అడుగుపెట్టి, ప్రకృతి రమణీయతకు నిలయమైన మేఘాలయ కొండల్లో విహరించేందుకు వెళ్లిన దంపతుల కథ.. చివరకు అత్యంత కిరాతకమైన రక్తసిక్త కుట్రగా మారడం దేశవ్యాప్తంగా సంచలనం సృష్టించిన సంగతి తెలిసిందే. ‘హనీమూన్ హత్య’గా దేశాన్ని షాక్‌కు గురిచేసిన ఈ కేసులో చట్టం తన పని తాను చేసుకుపోతోంది. గతంలో నిందితురాలికి లభించిన తాత్కాలిక ఉపశమనం (బెయిల్) ముగిసిపోవడమే కాకుండా, దేశ అత్యున్నత న్యాయస్థానం సుప్రీంకోర్టు అత్యంత కఠినమైన వ్యాఖ్యలతో ఆ బెయిల్‌ను రద్దు చేసింది. దీంతో వేరే దారి లేక ప్రధాన నిందితురాలు సోనమ్ రఘువంశీ పోలీసు భద్రత నడుమ న్యాయస్థానం తలుపు తట్టాల్సి వచ్చింది. 

అత్యున్నత న్యాయస్థానం కఠిన తీర్పు – పోలీసు భద్రత నడుమ లొంగుబాటు : దేశవ్యాప్తంగా పెను సంచలనం సృష్టించిన రాజా రఘువంశీ హత్య కేసులో ప్రధాన నిందితురాలైన సోనమ్ రఘువంశీ మేఘాలయలోని షిల్లాంగ్ ట్రయల్ కోర్టు ముందు లొంగిపోయారు. జస్టిస్ ఎం.ఎం. సుందరేష్, జస్టిస్ పి.బి. వరాలేలతో కూడిన అత్యున్నత న్యాయస్థానం ధర్మాసనం నిందితురాలి బెయిల్‌ను రద్దు చేస్తూ, మూడు వారాల్లోగా లొంగిపోవాలని ఇచ్చిన స్పష్టమైన ఆదేశాల మేరకు ఈ పరిణామం చోటుచేసుకుంది. సోనమ్ లొంగిపోవడంతో విచారణాధికారులు ఆమెను కస్టడీలోకి తీసుకుని వైద్య పరీక్షల అనంతరం షిల్లాంగ్ కోర్టులో హాజరుపరిచారు. న్యాయస్థానం నిందితురాలికి జ్యుడీషియల్ కస్టడీ విధించడంతో, ఈస్ట్ ఖాసీ హిల్స్ ఎస్పీ వివేక్ సియెమ్ పర్యవేక్షణలో పోలీసు భద్రత నడుమ ఆమెను జైలుకు తరలించారు.

ట్రయల్ కోర్టు & హైకోర్టు నిర్ణయాలు: కేసు నమోదు సమయంలో అరెస్టుకు సంబంధించిన నిబంధనలు సరిగా పాటించలేదనే సాంకేతిక కారణాన్ని సవాలు చేస్తూ ఏప్రిల్ 27న షిల్లాంగ్ ట్రయల్ కోర్టు సోనమ్‌కు షరతులతో కూడిన బెయిల్ మంజూరు చేసింది. దీనిపై మేఘాలయ ప్రభుత్వం హైకోర్టును ఆశ్రయించగా, జూన్ 29న మేఘాలయ హైకోర్టు ట్రయల్ కోర్టు నిర్ణయాన్నే సమర్థిస్తూ పిటిషన్‌ను కొట్టివేసింది.

సుప్రీంకోర్టు జోక్యం: హైకోర్టు ఉత్తర్వులను మేఘాలయ ప్రభుత్వం సుప్రీంకోర్టులో సవాలు చేసింది. విచారణ చేపట్టిన సుప్రీంకోర్టు ధర్మాసనం.. “కేసు విచారణ అత్యంత కీలకమైన, సున్నితమైన దశలో ఉంది. అరెస్టుకు సంబంధించిన వివరాలపై నిందితురాలికి స్పష్టమైన అవగాహన ఉంది. అరెస్టు మెమోలో చిన్నపాటి పొరపాట్లు లేదా రాతపూర్వక లోపాలు  ఉన్నంత మాత్రాన తీవ్రమైన హత్య కేసులో నిందితురాలికి బెయిల్ మంజూరు చేయడం సరికాదు” అని ఘాటుగా స్పష్టం చేసింది. నిందితురాలు బయట ఉంటే సాక్ష్యాలను ప్రభావితం చేసే ప్రమాదముందని ఆందోళన వ్యక్తం చేస్తూ బెయిల్‌ను రద్దు చేసింది. అయితే, ఆరు నెలల్లోగా కేసు విచారణ పూర్తి కాకపోతే మళ్లీ బెయిల్ కోసం దరఖాస్తు చేసుకునేందుకు సుప్రీంకోర్టు వెసులుబాటు కల్పించింది.

‘హనీమూన్ హత్య’ వెనుక దాగున్న కిరాతక కోణం : మధ్యప్రదేశ్ ఇండోర్‌కు చెందిన వ్యాపారవేత్త రాజా రఘువంశీకి, సోనమ్‌కు వివాహమైన కొద్ది రోజులకే వారు మేఘాలయలోని సోహ్రా (చిరపుంజి) ప్రాంతానికి హనీమూన్ నిమిత్తం వెళ్లారు. 2025 మే 23న దంపతులిద్దరూ అకస్మాత్తుగా అదృశ్యమయ్యారు. స్థానిక పోలీసులు గాలింపు చర్యలు చేపట్టి జూన్ 2న లోతైన వి లోయలో రాజా రఘువంశీ మృతదేహాన్ని స్వాధీనం చేసుకున్నారు.

పోలీసుల లోతైన దర్యాప్తులో దిగ్భ్రాంతికర నిజాలు :

వివాహేతర సంబంధం & ఆర్థిక ప్రయోజనాలు: సోనమ్‌కు తన ప్రియుడు రాజ్ కుష్వాహాతో ఉన్న సంబంధం, ఆర్థిక లాభాల కోసమే భర్తను వదిలించుకోవాలని కుట్ర పన్నింది.

కాంట్రాక్ట్ కిల్లర్స్: హనీమూన్ పర్యటనను వేదికగా చేసుకుని, సుపారీ గ్యాంగ్‌ను పురమాయించి భర్త రాజాను అత్యంత దారుణంగా నరికి చంపించి, మృతదేహాన్ని లోయలోకి తోయించినట్లు విచారణాధికారులు ఆధారాలు సేకరించారు.

బాధితుని కుటుంబంలో చిగురించిన ఆశలు : సుప్రీంకోర్టు బెయిల్ రద్దు చేయడంపై మృతుడు రాజా రఘువంశీ కుటుంబం హర్షం వ్యక్తం చేసింది. రాజా సోదరుడు విపిన్ రఘువంశీ మాట్లాడుతూ.. “మేము మొదటి నుంచీ భారతీయ న్యాయ వ్యవస్థను సంపూర్ణంగా నమ్మాము. సుప్రీంకోర్టు నిర్ణయంతో ధర్మం గెలిచింది. మేఘాలయ ప్రభుత్వం, దర్యాప్తు సంస్థలు చూపిన చొరవ అభినందనీయం. విచారణ వేగవంతమై నా సోదరుడి హత్యకు కారణమైన నిందితులకు కఠిన శిక్ష పడుతుందని ఆశిస్తున్నాం” అని మీడియాకు తెలిపారు. రాజా తల్లి ఉమా రఘువంశీ కూడా నిజమే గెలిచిందని భావోద్వేగానికి గురయ్యారు.