SC/ST Act Invoked In Haryana IPS Officer’s Suicide Case: హర్యానాలో సంచలనం సృష్టించిన ఐపీఎస్ అధికారి వై. పూరన్ కుమార్ ఆత్మహత్య కేసులో పోలీసులు ఎఫ్ఐఆర్లో కీలక మార్పులు చేశారు. చట్టంలోని సంబంధిత నిబంధనలను చేర్చాలని మృతుడి భార్య, సీనియర్ ఐఏఎస్ అధికారిణి అమ్నీత్ పి. కుమార్ పదేపదే విజ్ఞప్తి చేయడంతో, పోలీసులు ఎస్సీ/ఎస్టీ (అత్యాచార నిరోధక) చట్టంలోని సెక్షన్ 3 (2) (v) ని చేర్చారు. ఈ విషయాన్ని కేసును విచారిస్తున్న ఆరుగురు సభ్యుల ప్రత్యేక దర్యాప్తు బృందం (SIT) అధిపతి, చండీగఢ్ ఐజీ పుష్పేంద్ర కుమార్ ఆదివారం ధృవీకరించారు.
పూరన్ కుమార్ తన నివాసంలో తుపాకీతో కాల్చుకుని ఆత్మహత్య చేసుకున్నారు. తన భర్త మరణానికి కారణమైనట్లు ఆరోపణలు ఎదుర్కొంటున్న హర్యానా డీజీపీ శత్రుజీత్ కపూర్, అప్పటి రోహ్తక్ ఎస్పీ నరేంద్ర బిజార్నియా వంటి అధికారులపై చర్యలు తీసుకోవాలని, వారిని తక్షణమే అరెస్టు చేయాలని అమ్నీత్ డిమాండ్ చేశారు. ఈ డిమాండ్ల నేపథ్యంలోనే హర్యానా ప్రభుత్వం శనివారం నాడు రోహ్తక్ ఎస్పీ నరేంద్ర బిజార్నియాను బదిలీ చేసింది.
ALSO READ: India birth Rate : దేశంలో జననాల తగ్గుదల.. ఆందోళన రేకెత్తిస్తున్న గణాంకాలు
కుటుంబం డిమాండ్లు, ముఖ్యమంత్రి హామీ
పూరన్ కుమార్ తన “తుది నోట్లో” ఎనిమిది మంది సీనియర్ ఐపీఎస్ అధికారుల పేర్లను, ముఖ్యంగా కులం ఆధారంగా వివక్ష, వేధింపులకు గురిచేశారని పేర్కొన్నారు. అమ్నీత్, తన భర్త మరణం ఉన్నతాధికారుల “వ్యవస్థాగత వేధింపుల” ఫలితమే అని ఆరోపించారు. తమ డిమాండ్లు నెరవేరే వరకు పూరన్ కుమార్ మృతదేహానికి పోస్టుమార్టం నిర్వహించడానికి కుటుంబ సభ్యులు నిరాకరిస్తున్నారు.
ఎస్సీ/ఎస్టీ చట్టంలోని సెక్షన్ 3 (2) (v) ప్రకారం, ఎస్సీ/ఎస్టీ వర్గానికి చెందిన వ్యక్తిపై పదేళ్లు లేదా అంతకంటే ఎక్కువ జైలు శిక్ష విధించదగిన నేరానికి పాల్పడితే, అతనికి జీవిత ఖైదు, జరిమానా విధించవచ్చు.
ఈ వివాదంపై హర్యానా ముఖ్యమంత్రి నాయబ్ సింగ్ సైనీ స్పందిస్తూ, నిందితులు ఏ స్థాయిలో ఉన్నా వారిపై చర్యలు తీసుకుంటామని హామీ ఇచ్చారు. అయితే, దీనిని రాజకీయం చేయవద్దని ప్రతిపక్షాలకు విజ్ఞప్తి చేశారు. కుటుంబ డిమాండ్లను నెరవేర్చాలని డిమాండ్ చేస్తూ ‘షహీద్ వై పూరన్ సింగ్ న్యాయ్ సంఘర్ష్ మోర్చా’ ఆదివారం చండీగఢ్లో మహాపంచాయత్ నిర్వహించనున్నట్లు ప్రకటించింది.