Subhash Chandra NCLT insolvency case : ఎస్సెల్‌ గ్రూప్ అధినేత సుభాశ్ చంద్ర వ్యక్తిగత దివాలా వివాదం న్యాయస్థానాల వేదికగా సరికొత్త మలుపులు తిరుగుతోంది. వేల కోట్ల రుణాల పరిష్కారానికి కేవలం రూ.6.5 కోట్ల ప్రతిపాదన తీసుకొచ్చి కార్పొరేట్ వర్గాల్లో ప్రకంపనలు సృష్టించిన ఈ వ్యవహారంలో.. అసలు ఐదుగురు సభ్యుల భారీ బెంచ్‌ను ఏర్పాటు చేసే చట్టబద్ధ అధికారం ఎన్‌సీఎల్‌టీకి ఉందా? మూడో సభ్యుడి ఆదేశాలను ఆ బెంచ్ ఏ ప్రాతిపదికన నిలిపివేసింది? అన్న సరికొత్త న్యాయపరమైన చిక్కుముడులు ఇప్పుడు తెరపైకి వచ్చాయి.

అధికార పరిధిపై ప్రశ్నల వర్షం : సుభాశ్ చంద్ర తరఫున సీనియర్ న్యాయవాది సస్మిత్ పాత్ర ‘నేషనల్ కంపెనీ లా అప్పిలేట్ ట్రైబ్యునల్’ (ఎన్‌సీఎల్‌ఏటీ) ఎదుట వాదనలు వినిపిస్తూ.. ఐదుగురు సభ్యులతో బెంచ్‌ను ఏర్పాటు చేయడం పూర్తిగా నిబంధనలకు విరుద్ధమని స్పష్టం చేశారు. గతంలో డివిజన్ బెంచ్ భిన్న తీర్పులు వెలువరించడంతో నియమితులైన మూడో సభ్యుడు నీలేశ్ శర్మ ఇచ్చిన ఉత్తర్వులను ఈ కొత్త బెంచ్ నిలుపుదల చేయడాన్ని తీవ్రంగా తప్పుపట్టారు. ఏ విచారణ ప్రక్రియ ఆధారంగా ఈ నిర్ణయం తీసుకున్నారో స్పష్టత లేదన్నారు.

కోర్టులను మీడియా ప్రచారానికి వాడొద్దు: తుషార్ మెహతా : రుణదాతల (బ్యాంకుల) తరఫున హాజరైన సొలిసిటర్ జనరల్ తుషార్ మెహతా ప్రతిస్పందిస్తూ.. ఈ కేసులో ఇప్పటికే మూడు భిన్నమైన అభిప్రాయాలు వెలువడినందున విస్తృత ధర్మాసనం జోక్యం చేసుకోవడమే న్యాయసమ్మతమని వాదించారు. రూ.22,006 కోట్ల క్లెయిమ్‌లకు రూ.6.5 కోట్ల అరకొర చెల్లింపుల అంశాన్ని ప్రస్తావిస్తూ మీడియాలో వార్తల కోసమే కోర్టు వేదికను వాడుకుంటున్నారని ఆరోపించారు.

అక్టోబర్ 7కు తదుపరి విచారణ : ఇరుపక్షాల వాదనలు విన్న జస్టిస్ యోగేశ్ ఖన్నా నేతృత్వంలోని ఎన్‌సీఎల్‌ఏటీ ధర్మాసనం.. ఏవైనా అభ్యంతరాలు ఉంటే ఇప్పటికే కేసు పెండింగ్‌లో ఉన్న ఎన్‌సీఎల్‌టీ వద్దే తేల్చుకోవాలని స్పష్టం చేస్తూ తదుపరి విచారణను అక్టోబర్ 7కు వాయిదా వేసింది.