Supreme Court: సుప్రీంకోర్టులో నానాటికీ పెరిగిపోతున్న కేసుల భారాన్ని తగ్గించి.. ప్రజలకు సత్వర న్యాయం అందించే లక్ష్యంతో కేంద్ర ప్రభుత్వం కీలక నిర్ణయం తీసుకుంది. అత్యున్నత న్యాయస్థానంలో న్యాయమూర్తుల సంఖ్యను పెంచేందుకు రాష్ట్రపతి ద్రౌపది ముర్ము గ్రీన్ సిగ్నల్ ఇచ్చారు. కేంద్ర మంత్రివర్గం ఇటీవల ఆమోదించిన ప్రతిపాదనకు అనుగుణంగా రాష్ట్రపతి సుప్రీంకోర్టు (న్యాయమూర్తుల సంఖ్య)సవరణ ఆర్డినెన్స్- 2026ను జారీ చేశారు. ఈ నిర్ణయంతో సుప్రీంకోర్టులో మంజూరైన మొత్తం న్యాయమూర్తుల సంఖ్య (చీఫ్ జస్టిస్‌తో కలిపి) ప్రస్తుతం ఉన్న 34 నుండి 38కి పెరగనుంది. అంటే ప్రధాన న్యాయమూర్తి (CJI) మినహా మిగిలిన జడ్జీల సంఖ్య 33 నుండి 37కి పెరుగుతుంది.

బలోపేతం కానున్న న్యాయవ్యవస్థ: ప్రస్తుతం సుప్రీంకోర్టులో దాదాపు 92,000 కంటే ఎక్కువ కేసులు పెండింగ్‌లో ఉన్నాయి. ఈ నేపథ్యంలో న్యాయవ్యవస్థను మరింత బలోపేతం చేయడానికి మరియు కేసుల త్వరితగతిన పరిష్కారానికి ఈ కీలక నిర్ణయం తీసుకున్నారు. సుప్రీంకోర్టులో జడ్జీల సంఖ్యను పెంచడం 2019 తర్వాత ఇదే మొదటిసారి కావడం గమనార్హం.

Also read-Upendra Dwivedi: మళ్లీ అలా చేస్తే వరల్డ్‌ మ్యాప్‌లో కనిపించరు.. పాకిస్థాన్‌కి భారత ఆర్మీ చీఫ్‌ స్ట్రాంగ్‌ వార్నింగ్

సానుకూలంగా స్వాగతించిన బార్ అసోసియేషన్ : సాధారణంగా భారత రాజ్యాంగంలోని ఆర్టికల్ 124(1) ప్రకారం సుప్రీంకోర్టు జడ్జీల సంఖ్యను పెంచే అధికారం పార్లమెంటుకు మాత్రమే ఉంటుంది. అయితే కేసుల తీవ్రత మరియు అత్యవసర ప్రాధాన్యత దృష్ట్యా కేంద్ర ప్రభుత్వం మొదట ఆర్డినెన్స్ మార్గాన్ని ఎంచుకుంది. రాష్ట్రపతి ఆమోదం పొందిన ఈ ఆర్డినెన్స్‌ను రాబోయే పార్లమెంట్ సమావేశాల్లో బిల్లు రూపంలో ప్రవేశపెట్టనున్నారు. ఉభయ సభల (లోక్‌సభ, రాజ్యసభ) ఆమోదం పొందిన తర్వాత ఇది పూర్తిస్థాయి చట్టంగా మారనుంది. ఈ నిర్ణయాన్ని న్యాయ నిపుణులు, బార్ అసోసియేషన్ ప్రతినిధులు సానుకూలంగా స్వాగతిస్తున్నారు.