Supreme Court| నిందితుల ఆస్తులను బుల్డోజర్ల(Bulldozer)తో కూల్చివేయడంపై సుప్రీంకోర్టు తీర్పునిచ్చింది. కూల్చివేతలపై దాఖలైన పిటిషన్లను సర్వోన్నత న్యాయస్థానం విచారించింది. ఈ విచారణ సందర్భంగా ధర్మాసనం కీలక వ్యాఖ్యలు చేసింది. ఓ వ్యక్తి దోషి అని అధికారులు తేల్చిచెప్పలేరని తెలిపింది. అధికారులే జడ్జిలాగా వ్యవహరించి నిందితుల స్థిరాస్తులను కూల్చివేయడం తగదని స్పష్టంచేసింది.
కోర్టు ఆదేశాలను ఉల్లంఘిస్తే ధిక్కారణ చర్యలు తీసుకుంటామని హెచ్చరించింది. వివిధ రాష్ట్రాలు, ఆయా ప్రభుత్వాల అధికారులు మితిమీరి చర్యలు తీసుకోవద్దని ఆదేశించింది. కూల్చివేతల ప్రక్రియలో నిబంధనలను ఉల్లంఘిస్తే ఆ ఆస్తి పునరుద్ధరణకు సంబంధించిన పరిహారాన్ని అధికారుల జీతం నుంచి వసూలు చేస్తామని పేర్కొంది.
ఉత్తరప్రదేశ్‌లో నిందితుల ఇళ్లను బుల్డోజర్లతో కూల్చివేయడం తొలుత ప్రారంభమైంది. అనంతరం ఇతర రాష్ట్రాలకు కూడా ఈ ధోరణి పాకింది. దీంతో నిందితుల ఇళ్లు, ప్రైవేటు ఆస్తులను కూల్చివేయడం ఎక్కువైపోయాయి. అధికారుల తీరుపై సుప్రీంకోర్టులో పలు పిటిషన్లు నమోదయ్యాయి. వీటిపై విచారించిన న్యాయస్థానం ఆస్తులపైకి బుల్డోజర్లను పంపించడాన్ని తీవ్రంగా తప్పుపట్టింది.
