Bihar Election Threat:  బిహార్ రాజకీయాలు మరోసారి వేడెక్కాయి. కేంద్ర మంత్రి, లోక్ జనశక్తి పార్టీ అధ్యక్షుడు చిరాగ్ పాశ్వాన్‌కు సోషల్ మీడియాలో వచ్చిన హత్యా బెదిరింపులు రాష్ట్రవ్యాప్తంగా సంచలనం సృష్టించాయి. రాబోయే అసెంబ్లీ ఎన్నికల ముందు ఈ పరిణామం రాజకీయ వర్గాల్లో తీవ్ర చర్చకు దారి తీస్తోంది. ఈ బెదిరింపుల వెనుక కారణాలేంటి? చిరాగ్ పాశ్వాన్ రాష్ట్ర రాజకీయాల్లో తిరిగి ప్రవేశించడం ఎలాంటి పరిణామాలకు దారి తీస్తుంది? ఈ పరిణామం బిహార్ ఎన్నికలపై ఎలాంటి ప్రభావం చూపనుంది..?

హత్యా బెదిరింపుల కలకలం:

కేంద్ర మంత్రి చిరాగ్ పాశ్వాన్‌కు ‘టైగర్ మెరాజ్ ఇడిసి’ అనే పేరుతో ఇన్‌స్టాగ్రామ్‌లో హత్యా బెదిరింపులు వచ్చాయని ఆయన పార్టీ ప్రతినిధి రాజేష్ భట్ శుక్రవారం మీడియాకు వెల్లడించారు. ఈ పోస్ట్ బిహార్ రాజకీయాల్లో పెద్ద ఎత్తున దుమారం రేపింది. చిరాగ్ పాశ్వాన్‌కు పెరుగుతున్న ప్రజాదరణను చూసి ఓర్వలేని వారే ఇలాంటి బెదిరింపులకు పాల్పడుతున్నారని రాజేష్ భట్ ఆరోపించారు. ఈ ఘటనపై పోలీసులు తక్షణమే స్పందించి, నిందితులను గుర్తించి కఠిన చర్యలు తీసుకోవాలని ఆయన పాట్నాలోని సైబర్ పోలీస్ స్టేషన్‌లో ఫిర్యాదు చేశారు.

బిహార్ ఎన్నికల రణరంగంలో చిరాగ్:

 గత వారం సరన్ జిల్లాలో జరిగిన బహిరంగ సభలో చిరాగ్ పాశ్వాన్ ప్రసంగిస్తూ, రాబోయే బిహార్ అసెంబ్లీ ఎన్నికల్లో తాను కచ్చితంగా పోటీ చేస్తానని ప్రకటించారు. “నా రాష్ట్ర ప్రజల సంక్షేమం కోసం, నా సోదర సోదరీమణుల కోసం ఇది తప్పక చేస్తాను. నేను మీ రామ్ విలాస్ పాశ్వాన్ కుమారుడిని. ఆయన కలల్ని పూర్తిగా సాకారం చేసేందుకు కృషి చేస్తాను. బిహార్ ప్రజల అభివృద్ధికే నా మొదటి  ప్రాధాన్యం” అని ఆయన ఉద్ఘాటించారు. తానెక్కడ నుంచి పోటీ చేయాలనేది ప్రజలే నిర్ణయిస్తారని, ప్రజల మంచి కోసమే తాను ఏ నిర్ణయం తీసుకున్నా అది ఉంటుందని ఆయన స్పష్టం చేశారు. ఈ ఏడాది అక్టోబర్ లేదా నవంబర్‌లో బిహార్ ఎన్నికలు జరిగే అవకాశం ఉంది.

చిరాగ్ రాజకీయ వ్యూహం, గత ప్రభావం:

చిరాగ్ పాశ్వాన్ రాష్ట్ర రాజకీయాల్లోకి తిరిగి రావడం బిహార్ రాజకీయాల్లో కీలక పరిణామంగా మారబోతోంది. 2020 నాటి గత అసెంబ్లీ ఎన్నికల్లో చిరాగ్ వ్యూహాత్మకంగా వ్యవహరించి, బీజేపీ పుంజుకోవడానికి, ముఖ్యమంత్రి నితీశ్ కుమార్ పార్టీ జనతాదళ్ (యునైటెడ్)కు సీట్లు గణనీయంగా తగ్గడానికి ప్రధాన కారణమయ్యారు. అప్పట్లో నితీశ్ కుమార్‌తో విభేదించి, జేడీయూ అభ్యర్థులు నిలబడిన అన్ని నియోజకవర్గాల్లో తన పార్టీ అభ్యర్థులను నిలబెట్టారు. అదే సమయంలో, బీజేపీ అభ్యర్థులు పోటీ చేసిన చోట వారికి మద్దతుగా ప్రచారం చేశారు. దీని వల్ల జేడీయూకు భారీ నష్టం వాటిల్లిందని రాజకీయ విశ్లేషకులు భావిస్తారు.

భవిష్యత్ రాజకీయ చిత్రం:

చిరాగ్ మళ్లీ రాష్ట్ర రాజకీయాల్లో కీలక పాత్ర పోషించబోతున్న నేపథ్యంలో, ఇప్పుడు ఆయన లక్ష్యం నితీశ్ కుమార్ అవుతారా లేక మారుతుందా అనేది చర్చనీయాంశంగా మారింది. ఆయన గతంలో మాదిరిగానే బీజేపీతో కలిసి ముందుకు సాగుతారా, లేక కొత్త వ్యూహంతో వస్తారా అనేది వేచి చూడాలి. ఏది ఏమైనా, చిరాగ్ పాశ్వాన్‌కు వచ్చిన హత్యా బెదిరింపులు బిహార్ ఎన్నికల వాతావరణాన్ని మరింత వేడెక్కించాయి.