Man dies day after wedding : ముదిమి వయసులో తోడు కోసం తాపత్రయపడ్డాడు.. 75 ఏళ్ల వయసులో, తనకంటే 40 ఏళ్లు చిన్నదైన మహిళను పెళ్లాడాడు. కానీ, ఆ ఆనందం 24 గంటలు కూడా నిలవలేదు. పెళ్లైన మరుసటి రోజే, నవ వరుడు అనుమానాస్పద స్థితిలో మృతి చెందడంతో, ఆ పెళ్లింట పెను విషాదం నెలకొంది. ఇది సహజ మరణమా..? లేక దీని వెనుక ఏదైనా కుట్ర ఉందా..? ఉత్తరప్రదేశ్‌లో ఆలస్యంగా వెలుగుచూసిన ఈ వింత ఘటనపై ప్రత్యేక కథనం.
ఉత్తరప్రదేశ్‌లోని జౌన్‌పూర్‌, కుచ్‌ముచ్ గ్రామానికి చెందిన సంగ్రూ రామ్ (75) మొదటి భార్య ఏడాది క్రితం చనిపోయింది. పిల్లలు లేకపోవడంతో, ఒంటరిగా జీవిస్తున్న ఆయనకు, తోడు అవసరమని భావించిన కుటుంబ సభ్యులు, సెప్టెంబర్ 29న మన్‌భవతి (35) అనే మహిళతో ఓ ఆలయంలో వివాహం జరిపించారు.
మరుసటి రోజే మృతి.. అనుమానాల వలయం : అకస్మాత్తుగా అస్వస్థత: పెళ్లి జరిగిన మరుసటి రోజే, సంగ్రూ రామ్ ఆరోగ్యం అకస్మాత్తుగా క్షీణించి, ఆసుపత్రికి తరలించగా, అప్పటికే మృతి చెందినట్లు వైద్యులు ధ్రువీకరించారు.
బంధువుల ఆందోళన: అయితే, ఆయన మృతిపై అనుమానం వ్యక్తం చేసిన బంధువులు, అంత్యక్రియలను అడ్డుకుని, పోలీసులకు ఫిర్యాదు చేశారు. దీంతో పోలీసులు రంగప్రవేశం చేసి, మృతదేహాన్ని పోస్టుమార్టానికి తరలించారు.
పోస్టుమార్టం నివేదికలో ఏం తేలింది : సంగ్రూ రామ్ మరణానికి కారణం ‘సెరెబ్రోవాస్కులర్ యాక్సిడెంట్’ (మెదడులో రక్తస్రావం) అని పోస్టుమార్టం నివేదికలో తేలింది. అయితే, ఈ రక్తస్రావానికి దారితీసిన కారణాలపై పోలీసులు లోతుగా దర్యాప్తు చేస్తున్నారు.
‘ఆ మందే’ కారణమా : ఈ ఘటనపై స్పందించిన జిల్లా సర్జన్ డాక్టర్ అరుణ్ సింగ్, ఓ కీలక అనుమానాన్ని వ్యక్తం చేశారు. “మద్యం సేవించిన తర్వాత, శృంగార సామర్థ్యం పెంచే మందులు (వయాగ్రా వంటివి) తీసుకోవడం వల్ల మెదడులో రక్తస్రావం జరిగి, ‘సెరెబ్రోవాస్కులర్ యాక్సిడెంట్’ సంభవించే అవకాశం ఉంది. ఆ మందు ప్రభావం, తీసుకున్న ఆరు గంటల తర్వాత కనిపిస్తుంది.” ఈ కోణంలో కూడా పోలీసులు దర్యాప్తు చేస్తున్నట్లు సమాచారం.
ఆస్తి కోసమేనా ఈ పెళ్లి : సంగ్రూ రామ్, తన రెండో వివాహం కోసం ఐదు ఎకరాల భూమిని అమ్మాడని బంధువులు చెబుతున్నారు. ఆయనను వివాహం చేసుకున్న మన్‌భవతికి కూడా ఇది రెండో వివాహమని, ఆమెకు ఇద్దరు పిల్లలు కూడా ఉన్నారని వారు తెలిపారు. ఈ నేపథ్యంలో, ఆస్తి కోసమే ఈ పెళ్లి జరిగిందా అనే కోణంలోనూ పోలీసులు విచారిస్తున్నారు.
