Wedding: భారతీయ సమాజంలో పెళ్లి అనేది కేవలం రెండు హృదయాలు, రెండు కుటుంబాలు ఒక్కటయ్యే ఒక పవిత్ర బంధం మాత్రమే కాదు, ఇప్పుడు ఇది స్థాయిని, సంపదను చాటుకునే ఒక బృహత్తర వేడుకగా మారిపోయింది. ఒకప్పుడు సాదాసీదాగా జరిగే పెళ్లిళ్లు, నేడు మధ్యతరగతి నుంచి ధనవంతుల వరకు ప్రతి ఒక్కరూ తమ ఆర్థిక స్థోమతకు మించి గ్రాండ్గా నిర్వహించాలనుకునే డ్రీమ్ ఈవెంట్గా రూపాంతరం చెందాయి.
ఈ కొత్త ట్రెండ్లో పెళ్లి అనేది కేవలం ఒకరోజు వేడుకగా మిగలడం లేదు. హల్దీ, సంగీత్, మెహందీ, బరాత్ వంటి ప్రీ-వెడ్డింగ్ వేడుకలు, ఆ తర్వాత రిసెప్షన్… ఇలా కనీసం వారం రోజుల పాటు జరిగే ఈ ‘బిగ్ ఫ్యాట్ ఇండియన్ వెడ్డింగ్’ కోసం డబ్బును మంచి నీళ్లలా ఖర్చు చేస్తున్నారు. డెస్టినేషన్ వెడ్డింగ్ పేరుతో రాజస్థాన్లోని కోటలు లేదా ప్రపంచంలోని ఖరీదైన ప్రదేశాలకు వెళ్లి మరీ పెళ్లి చేసుకోవడం ఇప్పుడు ఫ్యాషన్.
ఈ గ్రాండ్నెస్ వెనుక దాగి ఉన్నది కోట్ల రూపాయల పెట్టుబడి. పెళ్లికి నెలల ముందు నుంచే ప్లానింగ్ మొదలవుతుంది.భారీ వేదికల బుకింగ్.అతిథులు, కుటుంబ సభ్యుల కోసం ఖరీదైన ఫ్లైట్ టిక్కెట్లు.సినిమా సెట్టింగ్లను తలదన్నే కళ్లు చెదిరే డెకరేషన్లు.అత్యంత ఖరీదైన క్యాటరర్లు, ప్రముఖ చెఫ్లతో భోజన ఏర్పాట్లు.ప్రొఫెషనల్ వెడ్డింగ్ ప్లానర్ల కోసం కోట్లలో అడ్వాన్స్ చెల్లింపులు.ఇంత కష్టపడి, కోట్లు ఖర్చు చేసి, అప్పులు చేసి మరీ సిద్ధం చేసిన పెళ్లి… ఊహించని కారణాల వల్ల రద్దయితే లేదా వాయిదా పడితే పరిస్థితి ఏమిటి? అప్పటి వరకు చేసిన ఖర్చు, పెట్టిన పెట్టుబడి అంతా కూడా క్షణాల్లో బుడిదలో పోసిన పన్నీరవుతుంది. ఈ ఆర్థిక నష్టం కుటుంబాలను కోలుకోలేని దెబ్బ తీయగలదు.
వెడ్డింగ్ ఇన్సూరెన్స్
ఈ అపారమైన ఆర్థిక నష్టాన్ని నివారించడం కోసమే ఇండియాలో ఒక కొత్త, వినూత్నమైన ట్రెండ్ మొదలైంది. అదే వెడ్డింగ్ ఇన్సూరెన్స్. లైఫ్ ఇన్సూరెన్స్, హెల్త్ ఇన్సూరెన్స్, వెహికల్ ఇన్సూరెన్స్ గురించి ప్రతి ఒక్కరికీ తెలుసు, కానీ పెళ్లికి కూడా ఇన్సూరెన్స్ తీసుకోవడం కొత్తగా అనిపించినా, ఇది ప్రస్తుత అవసరానికి సరిగ్గా సరిపోయే పరిష్కారం.
పెళ్లి అనేది కేవలం సాంప్రదాయమే కాదు, అది ఒక భారీ ప్రాజెక్ట్. ఈ ప్రాజెక్ట్కు రక్షణ కవచం అందించడమే వెడ్డింగ్ ఇన్సూరెన్స్ లక్ష్యం. పెళ్లి కోసం ఖర్చు చేస్తున్న బడ్జెట్ను బట్టి ఈ ఇన్సూరెన్స్ పాలసీలను తీసుకోవచ్చు.
ఏయే పరిస్థితులలో ఈ ఇన్సూరెన్స్ ఉపయోగపడుతుంది?
పెళ్లికి దగ్గరగా కుటుంబంలో ఎవరైనా చనిపోవడం వల్ల పెళ్లి వాయిదా వేయాల్సి వస్తే..తుఫాను, వరదలు, భూకంపాలు వంటి ప్రకృతి విపత్తుల కారణంగా వేదికలు ధ్వంసమై, కార్యక్రమం ఆగిపోతే. వధువు లేదా వరుడు తీవ్రంగా గాయపడటం లేదా అనారోగ్యం పాలవడం.బుక్ చేసుకున్న పెళ్లి వేదిక అగ్నిప్రమాదం లేదా ఇతర కారణాల వల్ల అందుబాటులో లేకుండా పోతే. క్యాటరర్లు, వెడ్డింగ్ ప్లానర్లు, డెకరేటర్లు వంటి సర్వీస్ ప్రొవైడర్లు చివరి నిమిషంలో తమ కాంట్రాక్ట్ను రద్దు చేసుకుంటే.
ఇలాంటి అనూహ్య పరిస్థితుల కారణంగా పెళ్లి రద్దయినా లేదా వాయిదా పడినా, అప్పటి వరకు కేటరర్లకు, వేదికలకు, డెకరేటర్లకు చెల్లించిన అడ్వాన్సులు, నాన్-రీఫండబుల్ ఖర్చులను ఈ వెడ్డింగ్ ఇన్సూరెన్స్ ద్వారా తిరిగి పొందవచ్చు.
పెళ్లి బడ్జెట్లో ఒక చిన్న భాగాన్ని ఇన్సూరెన్స్ ప్రీమియం కోసం వెచ్చించడం ద్వారా, పెళ్లి ప్లానింగ్లో ఉన్నవారు తమ కోట్ల రూపాయల పెట్టుబడికి ఆర్థిక భద్రత కల్పించుకుంటున్నారు. ఆర్థిక నిపుణుల అంచనాల ప్రకారం, ఈ కొత్త, ఆచరణాత్మక ఆలోచన సమీప భవిష్యత్తులో ఇండియాలో ఒక భారీ ట్రెండ్గా మారే అవకాశం ఉంది. ఎందుకంటే, ఆడంబరాల మోజులో పడి ఆర్థిక భద్రతను విస్మరించడానికి ఎవరూ సిద్ధంగా లేరు. అందుకే, పెళ్లి బంధంతో పాటు, పెళ్లి బడ్జెట్ను కూడా భద్రపరుచుకోవడానికి ‘వెడ్డింగ్ ఇన్సూరెన్స్’ ఒక అనివార్యమైన ఎంపికగా మారుతోంది.