T20 World Cup 2026: టీ20 ప్రపంచకప్ 2026 ప్రారంభానికి ముందే క్రికెట్ ప్రపంచంలో పెను ప్రకంపనలు రేగుతున్నాయి. ముఖ్యంగా భారత్ – బంగ్లాదేశ్ మధ్య నెలకొన్న వివాదం చిలికి చిలికి గాలివానలా మారి, చివరకు బంగ్లాదేశ్ టోర్నీ నుంచే వైదొలిగేలా చేసింది. ఈ మొత్తం వ్యవహారంపై సహ ఆతిథ్య దేశమైన శ్రీలంక తాజాగా మౌనం వీడింది.
అసలేం జరిగింది?
భారత్లో భద్రతా కారణాలను సాకుగా చూపుతూ, తమ మ్యాచ్లను భారత్ నుండి శ్రీలంకకు మార్చాలని బంగ్లాదేశ్ క్రికెట్ బోర్డు ఐసీసీని కోరింది. కోల్కతా, ముంబైలలో జరగాల్సిన తమ నాలుగు మ్యాచ్లను తరలించాలని బంగ్లా పట్టుబట్టింది. అయితే, ఈ విజ్ఞప్తిని ఐసీసీ నిర్ద్వంద్వంగా తిరస్కరించింది. నిర్ణయం తీసుకోవడానికి బంగ్లాదేశ్కు 24 గంటల గడువు ఇచ్చింది. బంగ్లాదేశ్ తన పంతం వీడకపోవడంతో, ఐసీసీ కఠిన నిర్ణయం తీసుకుంది. బంగ్లాదేశ్ను టోర్నీ నుండి తొలగించి, ఆ స్థానంలో స్కాట్లాండ్ను చేర్చింది.
బంగ్లాకు మద్దతుగా పాక్..
బంగ్లాదేశ్కు సంఘీభావంగా పాకిస్థాన్ కూడా ఈ మెగా టోర్నీని బహిష్కరించే యోచనలో ఉన్నట్లు వార్తలు వస్తున్నాయి. భారత్తో మ్యాచ్లు ఆడకూడదని లేదా టోర్నీ నుంచే తప్పుకోవాలని పాకిస్థాన్ భావిస్తున్నట్లు సమాచారం.
Also Read: T20 World Cup 2026 -టీమ్ ఇండియాకు గుడ్ న్యూస్.. తిలక్ వర్మ రీ-ఎంట్రీ ఫిక్స్! మరో ఇద్దరు కూడా..
శ్రీలంక ఏమన్నదంటే?
ఈ వివాదంపై సహ ఆతిథ్య దేశమైన శ్రీలంక ఇన్నాళ్లూ మౌనంగా ఉంది. తాజాగా శ్రీలంక క్రికెట్ కార్యదర్శి బందుల దిస్సానాయకే స్పందిస్తూ.. తాము తటస్థంగా ఉండాలని నిర్ణయించుకున్నట్లు తెలిపారు. “భారత్, పాకిస్థాన్, బంగ్లాదేశ్.. ఈ మూడు మాకు స్నేహపూర్వక దేశాలే. వారి మధ్య ఉన్న ప్రాంతీయ వివాదాల్లో మేము తలదూర్చదలచుకోలేదు” అని ఆయన స్పష్టం చేశారు. అయితే, భవిష్యత్తులో ఏ దేశానికైనా టోర్నీలు నిర్వహించాల్సి వస్తే తాము సిద్ధమని పేర్కొన్నారు.
భారత్ – పాక్ పోరుపై ప్రత్యేక దృష్టి
రాజకీయ ఉద్రిక్తతల కారణంగా పాకిస్థాన్ తన మ్యాచ్లను శ్రీలంకలోనే ఆడనుంది. భారత్తో జరిగే హై-వోల్టేజ్ మ్యాచ్ కూడా లంకలోనే జరగనుంది. ఈ టోర్నీని విజయవంతంగా నిర్వహించడమే తమ ప్రథమ ప్రాధాన్యమని, ముఖ్యంగా భారత్-పాక్ మ్యాచ్ల భద్రతపై ప్రత్యేక దృష్టి సారిస్తున్నామని శ్రీలంక క్రీడల మంత్రి సునీల్ కుమార గమగే తెలిపారు.