JAISHANKAR EUROPE VISIT : భారత విదేశాంగ మంత్రి ఎస్. జైశంకర్ ఇటీవల యూరోపియన్ యూనియన్ (EU) కేంద్రమైన బ్రస్సెల్స్‌లో పర్యటించారు. ఈ పర్యటన అంతర్జాతీయ సంబంధాలలో భారత్ వహిస్తున్న క్రియాశీలక, స్వయంప్రతిపత్తి గల పాత్రను మరోసారి స్పష్టం చేసింది. యూరోపియన్ కమిషన్ ప్రెసిడెంట్ ఉర్సులా వాన్ డర్ లయన్, EU విదేశాంగ చీఫ్ ఖాజా కల్లాస్‌లతో జరిగిన ఉన్నత స్థాయి భేటీలలో జైశంకర్ కీలక అంశాలపై మాట్లాడారు.
భారత్ నమ్మకమైన వాణిజ్య భాగస్వామి: ఈ సమావేశాల్లో జైశంకర్, యూరోపియన్ యూనియన్‌కు భారత్ ఒక నమ్మకమైన వాణిజ్య భాగస్వామి అని నొక్కి చెప్పారు. అపారమైన మానవ వనరులు, నైపుణ్యం కలిగిన కార్మికులతో భారత్, చైనా కన్నా మెరుగైన ఎంపిక అని ఆయన స్పష్టం చేశారు. పెరుగుతున్న భౌగోళిక రాజకీయ అనిశ్చితుల మధ్య సరఫరా గొలుసుల వైవిధ్యాన్ని కోరుకుంటున్న యూరోపియన్ దేశాలకు భారత్ సామర్థ్యాలను ఆయన వివరించారు.
ఉగ్రవాదంపై తీవ్ర హెచ్చరిక: జైశంకర్ తన పర్యటనలో అంతర్జాతీయ ఉగ్రవాదంపై గట్టి హెచ్చరికలు జారీ చేశారు. ముఖ్యంగా పాకిస్థాన్‌తో భారత్‌కు ఉన్న ఉద్రిక్త పరిస్థితులపై మాట్లాడుతూ, ఒసామా బిన్ లాడెన్ పాకిస్థాన్‌లోని మిలటరీ స్థావరంలో చాలా ఏళ్లు సురక్షితంగా ఉన్న విషయాన్ని యూరోపియన్ దేశాలు గుర్తు చేసుకోవాలని సూచించారు. “ఇక్కడ భారత్, పాకిస్థాన్ మధ్య గొడవ సమస్య కాదు, ఇది ఉగ్రవాదంపై జరుగుతున్న పోరాటం. భవిష్యత్తులో అదే ఉగ్రవాదం మిమ్మల్ని వెంటాడుతూ వస్తుంది,” అని ఆయన యూరోపియన్ దేశాలను తీవ్రంగా హెచ్చరించారు. కశ్మీర్‌లోకి పాకిస్థాన్ ఆక్రమణదారులు వచ్చినప్పుడు పాశ్చాత్య దేశాల మద్దతు, ఇప్పుడు అంతర్జాతీయ సూత్రాలపై చర్చించాలని పిలుపునివ్వడం వంటి గత వైఖరిని ఆయన ప్రశ్నించారు. భారత్-పాకిస్థాన్ సమస్యకు మూలం ఉగ్రవాదమేనని జైశంకర్ పునరుద్ఘాటించారు.
రష్యా-ఉక్రెయిన్ యుద్ధం, అమెరికా సంబంధాలపై భారత్ వైఖరి: రష్యా-ఉక్రెయిన్ యుద్ధంపై భారత్ వైఖరిని జైశంకర్ మరోసారి స్పష్టం చేశారు. యుద్ధంతో సమస్యకు పరిష్కారం లభించదని, సంభాషణల ద్వారానే శాంతి సాధ్యమని ఆయన అభిప్రాయపడ్డారు. రష్యా, ఉక్రెయిన్ రెండింటితోనూ భారత్‌కు బలమైన సంబంధాలు ఉన్నాయని తెలిపారు. అమెరికా అధ్యక్షుడిగా డొనాల్డ్ ట్రంప్‌ను నమ్ముతారా అన్న ప్రశ్నకు జైశంకర్, “భారత్ వాణిజ్య సంబంధాలను ట్రంప్ బలోపేతం చేస్తున్నారు. మా దేశానికి ప్రయోజనం చేకూర్చే ప్రతి సంబంధాన్ని పెంపొందించుకోవడమే మా లక్ష్యం. ముఖ్యంగా అమెరికాతో సంబంధాలు మాకు చాలా ముఖ్యం. అధ్యక్షుడిగా ఎవరు ఉన్నారనేది ముఖ్యం కాదు,” అని స్పష్టమైన వివరణ ఇచ్చారు.ఈ పర్యటన భారత్ వ్యూహాత్మక స్వయంప్రతిపత్తిని, నిస్సందేహమైన అంతర్జాతీయ వైఖరిని చాటింది.
