2026 Elections Stalin Target : తమిళనాడు ముఖ్యమంత్రి, డీఎంకే అధ్యక్షుడు ఎంకే స్టాలిన్ వచ్చే అసెంబ్లీ ఎన్నికల దిశగా ముందుగానే వ్యూహాలు రచించడం మొదలుపెట్టారు. 2021లో ఓడిన నియోజకవర్గాలపై ప్రత్యేక దృష్టితో పార్టీ నేతలతో వరుసగా సమావేశాలు నిర్వహిస్తున్నారు. 2026 ఏప్రిల్‌లో జరగనున్న అసెంబ్లీ ఎన్నికల్లో 200కు పైగా స్థానాలు గెలవాలన్న లక్ష్యాన్ని డీఎంకే శ్రేణులకు స్పష్టంగా తెలియజేశారు.
ఓడిన నియోజకవర్గాలపై ప్రత్యేక ఫోకస్ : 2021 ఎన్నికల్లో డీఎంకే 126 స్థానాలు గెలుచుకుంది. కానీ కోయంబత్తూర్, తిరుప్పూర్ జిల్లాల్లో ప్రత్యర్థులు విజయం సాధించారు. ఈ బలహీన ప్రాంతాలపై స్టాలిన్ ఇప్పుడే దృష్టి సారించారు. అక్కడ గతంలో జరిగిన లోపాలను గుర్తించి, పరిష్కార మార్గాలపై చర్చలు జరుపుతున్నారు.
క్రమశిక్షణ, సమన్వయం కీలకం : ఓటమిని పాఠంగా తీసుకోవాలి, ప్రతి నియోజకవర్గం ప్రత్యేకమే అనే ధోరణితో స్టాలిన్ దూసుకెళ్తున్నారు. విభేదాలు, కార్యకర్తల మధ్య అనుసంధానం లోపించకుండా, మంత్రులు, జిల్లా నేతలు నేరుగా రంగంలోకి దిగాలని సూచించారు. ప్రజల్లో ప్రభుత్వంపై ఉన్న మంచి అభిప్రాయాన్ని ఓట్లుగా మలచాలంటే క్రమశిక్షణ, సమన్వయం కీలకం అని స్పష్టం చేశారు.
రాసేద్దాం చరిత్ర నినాదం – 200పైగా గెలుపు లక్ష్యం :
రాసేద్దాం చరిత్ర అనే కొత్త నినాదంతో పార్టీ శ్రేణుల్లో ఉత్తేజం నింపారు స్టాలిన్. 126 గెలిచిన స్థానాలకు అదనంగా మరో 100 నియోజకవర్గాలపై ప్రత్యేక దృష్టి పెట్టారు. ఒక్కో నియోజకవర్గంపై నేతలతో వ్యక్తిగత చర్చలు నిర్వహిస్తున్నారు.
ప్రజల్లోకి పాలన విజయాలు తీసుకెళ్లాలి :
ప్రతి ఇంటికి ప్రభుత్వం సాధించిన విజయాలను చెప్పే బాధ్యత నాయకులదే అని స్పష్టం చేశారు. ఇకపై ప్రతి కార్యకర్త, నాయకుడు ప్రజల మధ్య కనిపించాలి, ప్రత్యక్ష రంగంలో ఉండాలి అని సూచించారు. ప్రజలతో కలిసిపోవడమే విజయానికి మార్గమని తెలియజేశారు.
కౌండంపాళయం నేతల హామీ : కోయంబత్తూరులో గత ఎన్నికల్లో ఓటమి పాలైన పదిహేను నియోజకవర్గాల్లో ఈసారి విజయాన్ని సొంతం చేసుకుంటామని స్థానిక నాయకులు స్టాలిన్‌కు హామీ ఇచ్చారు. గత తప్పులను పునరావృతం కాకుండా చూసుకుంటామని చెప్పారు.