BJP’s Caste Census : ఇది మళ్ళీ ద్రోణాచార్యుడి నాటకమా..?

What’s Behind BJP’s Sudden Interest in Caste Census : మహాభారతంలో ఏకలవ్యుడు, నిషాద కులానికి చెందిన గొప్ప విలుకాడు, తన నైపుణ్యంతో అర్జునుడిని మించాడు. కానీ, అగ్రకుల ఆధిపత్యాన్ని కాపాడేందుకు ద్రోణాచార్యుడు అతని బొటనవేలును డిమాండ్ చేశాడు, ఏకలవ్య శక్తిని అణచివేశాడు. ఈ రోజు, బీజేపీ కుల గణనపై చూపిస్తున్న ఆసక్తి ఈ చరిత్రను పునరావృతం చేస్తోందా? 2025లో కుల గణనకు ఆమోదం తెలిపిన బీజేపీ, రాహుల్ గాంధీ “జిత్నీ ఆబాదీ, ఉత్నా హక్” నినాదం, RJD, SP వంటి ప్రతిపక్ష పార్టీల ఒత్తిడికి లొంగింది. కానీ, ఈ యూ-టర్న్ సామాజిక న్యాయం కోసమా, లేక రాజకీయ లబ్ధి కోసమా? బీజేపీ చరిత్ర, RSS అగ్రకుల ప్రభావం, OBCలపై దాని ద్వంద్వ వైఖరి, EWS రిజర్వేషన్లతో పోలిక, నరేంద్ర మోదీ OBC స్థితిపై వివాదం ఈ గణనపై దాని ఉద్దేశాలను ప్రశ్నార్థకం చేస్తున్నాయి.


మండల్ వ్యతిరేకత నుంచి OBC ఓటు బ్యాంకు వరకు: 1990లో, వి.పి. సింగ్ నేతృత్వంలోని నేషనల్ ఫ్రంట్ ప్రభుత్వం మండల్ కమిషన్ సిఫార్సులను అమలు చేసి, OBCలకు 27% రిజర్వేషన్‌ను ప్రకటించింది. బీజేపీ దీనిని తీవ్రంగా వ్యతిరేకించి, ప్రభుత్వం నుంచి మద్దతు ఉపసంహరించింది, రామ జన్మభూమి ఉద్యమంతో “మందిర్ రాజకీయాల” ద్వారా OBC ఉద్యమాన్ని అణచివేసింది. ఈ వైఖరి బీజేపీకి OBCల పట్ల ఉన్న కపట ప్రేమను తేటతెల్లం చేస్తోందని విశ్లేషకులు అభిప్రాయం వ్యక్తం చేస్తున్నారు. RSS, బీజేపీ ఆలోచనాత్మక మూలం, అగ్రకుల ఆధిపత్యంతో నడుస్తుంది. దాని ఆరుగురు సర్సంఘచాలక్‌లలో ఐదుగురు బ్రాహ్మణులు (హెడ్గేవార్, గోల్వాల్కర్, దేవరస్, సుదర్శన్, భగవత్), ఒకరు క్షత్రియుడు (రజ్జు భైయా). ఈ అగ్రకుల నాయకత్వం OBCలను ఓటు బ్యాంకుగా ఉపయోగిస్తూ, అధికార నిర్ణయాలను అగ్రకులాలకు పరిమితం చేసింది. 1990లో మండల్ సిఫార్సుల వ్యతిరేకతలో అగ్రకుల యువత ఆత్మాహుతులకు పాల్పడిన చరిత్ర బీజేపీ కుల రాజకీయాలను బహిర్గతం చేస్తుంది.

అగ్రకుల నాయకత్వం: RSS-బీజేపీ లో అధికార స్థానాలు : RSS, బీజేపీలో అగ్రకుల ఆధిపత్యం అనే విమర్శలకు తావు ఇస్తున్న నేపథ్యంలో… RSS ఆరుగురు సర్సంఘచాలక్‌లలో ఐదుగురు బ్రాహ్మణులు, ఒకరు క్షత్రియుడు, బీజేపీలో అమిత్ షా (బనియా), జె.పి. నడ్డా (బ్రాహ్మణ), రాజ్‌నాథ్ సింగ్ (క్షత్రియ) అధికార స్థానాల్లో ఉన్నారు. మోదీ మోధ్-ఘంచీ OBC గుర్తింపు (1994, 1999) రాజకీయ ఓటు బ్యాంకు వ్యూహంగా విమర్శలు ఎదుర్కొంటున్న విషయం విధితమే, OBCలను టోకెన్‌గా ఉపయోగిస్తూ అగ్రకుల ఆధిపత్యాన్ని కాపాడుతున్నారనే ఆరోపణలు బలంగా వినిపిస్తున్నాయి. కల్యాణ్ సింగ్, ఉమా భారతి, తెలంగాణలో బండి సంజయ్ వంటి OBC నాయకులను తాత్కాలికంగా ప్రమోట్ చేసి, RSS ఎజెండాకు అనుగుణంగా లేదా తొలగించి, అధికారం అగ్రకుల చేతిలో ఉంచడం బీజేపీ వ్యూహంగా విశ్లేషకులు పేర్కొంటున్నారు.

OBCలను చీల్చే రాజకీయం ప్యూహాలు : బీజేపీ ఇప్పుడు OBC ఓటు బ్యాంకును లాభదాయకంగా చూస్తోంది, కానీ దాని వ్యూహం విభజన రాజకీయాలపై ఆధారపడింది. బీహార్ కుల సర్వే (2023) OBC, EBCలు 63.13% ఉన్నాయని, అగ్రకులాలు కేవలం 15.5% ఉన్నాయని బహిర్గతం చేసింది. ఈ ఫలితాలు అగ్రకుల ఆధిపత్యాన్ని బయటపెట్టాయి, కానీ బీజేపీ వీటిని నీరుగార్చింది. ఉత్తరప్రదేశ్, బీహార్‌లలో SP, RJD వంటి పార్టీలు OBC గొంతుకగా ఉద్భవించాయి. దీనిని ఎదుర్కొనేందుకు, బీజేపీ 2024 సుప్రీంకోర్టు SC ఉప-వర్గీకరణ తీర్పును ఉపయోగించి SC ఐక్యతను విచ్ఛిన్నం చేసినట్లే, OBCలలో పెద్ద, చిన్న కులాల మధ్య ఉద్రిక్తతలను సృష్టిస్తోంది. “చేపల చెరువులో గాలం వేసినట్లు” చిన్న చిన్న కులాలను ఆకర్షించి, వారిని పెద్ద కులాల నుంచి దూరం చేసే ప్రయత్నం చేస్తుంది. తెలంగాణలో కూడా, బీజేపీ ఆర్. కృష్ణయ్య వంటి OBC నాయకులను పార్టీలోకి చేర్చుకుని, OBC ఓటర్లను ఆకర్షించే ప్రయత్నం చేస్తోంది. అయితే, ఇది కేవలం “కంటితుడుపు చర్య” అని స్పష్టమవుతోంది. బిహార్‌లో కేవరీ నాయకుడు సమ్రాట్ చౌధరిని రాష్ట్ర యూనిట్ చీఫ్‌గా నియమించి, యాదవేతర OBCలను ఆకర్షించే ప్రయత్నం చేసినట్లు నిపుణులు వివరణ ఇస్తున్నారు.

OBC vs EWS రిజర్వేషన్లు: బీజేపీ ద్వంద్వ వైఖరి : OBC రిజర్వేషన్ల పట్ల బీజేపీ వైఖరి EWS రిజర్వేషన్లతో పోల్చితే దాని ద్వంద్వ వైఖరిని బహిర్గతం చేస్తుంది. 1990 నుంచి OBCలకు 27% రిజర్వేషన్ అమలులో ఉన్నప్పటికీ, RTI ద్వారా వెల్లడైన డేటా ప్రకారం, కేవలం 17% కోటా మాత్రమే భర్తీ అయింది. దీనికి విరుద్ధంగా, 2019లో ప్రవేశపెట్టిన 10% EWS రిజర్వేషన్ (103వ రాజ్యాంగ సవరణ) వేగంగా అమలైంది, ప్రధానంగా అగ్రకుల ఆర్థికంగా వెనుకబడిన వర్గాలకు లబ్ధి చేకూర్చింది. “గోతి కాడి నక్క లాగా” బీజేపీ తన అగ్రకుల ఓటు బ్యాంకుకు ప్రాధాన్యతనిస్తూ, OBCలను నిర్లక్ష్యం చేస్తుంది. ఈ వేగవంతమైన అమలు బీజేపీ అగ్రకుల ఓటు బ్యాంకుకు ప్రాధాన్యతనిస్తుందని చూపిస్తుంది. రోహిణి కమిషన్ (2023) నివేదిక ప్రకారం, 2,600 OBC కులాలలో 1,000 కులాలకు రిజర్వేషన్ ప్రయోజనాలు అందడం లేదు, ఎందుకంటే యాదవ్, కుర్మీ వంటి ఆధిపత్య కులాలు ఎక్కువ ప్రయోజనం పొందుతున్నాయి. బీజేపీ ఈ అసమానతలను సరిదిద్దడంలో విఫలమైంది, బదులుగా OBC ఉప-వర్గీకరణను రాజకీయంగా ఉపయోగించుకుంటుందనే విమర్శలు బలంగా వినిపిస్తున్నాయి.

మధ్యప్రదేశ్, బీహార్‌లో బీజేపీ వైఫల్యం: మధ్యప్రదేశ్ (1994)లో కాంగ్రెస్ సీఎం దిగ్విజయ్ సింగ్ 14% OBC కోటాను అమలు చేశారు, 2002–2003లో 27%కు పెంచాలని ప్రతిపాదించారు, ఎందుకంటే OBCలు రాష్ట్ర జనాభాలో 50% ఉన్నారని అంచనా. కానీ, 2003 నుంచి బీజేపీ ప్రభుత్వాలు చట్టపరమైన సవాళ్లను సాకుగా చూపి దీనిని అడ్డుకున్నాయి (ఆశిష్ భార్గవ v. మధ్యప్రదేశ్ కేసు). ఈ జాప్యం OBCలకు న్యాయం జరగకుండా చేసింది.
2023 బిహార్ కుల సర్వే OBC, EBCల ఆధిపత్యాన్ని బహిర్గతం చేసింది, బీజేపీని ఇబ్బంది పెట్టింది. JD(U)తో కూటమిలో ఉన్న బీజేపీ ఈ ఫలితాలను తక్కువ చేసి చూపించింది, కానీ రాజకీయ ఒత్తిడి వల్ల కుల గణనకు ఆమోదం తెలిపింది. తెలంగాణలో కూడా, బీజేపీ ఆర్. క్రిష్ణయ్య లాంటి బీసీ సామాజిక నేపథ్యం ఉన్నవారిని రాజ్యసభకు పంపించి OBC ఓటు బ్యాంకుపై కన్ను వేసిందా..? బీజేపీ మార్క్ రాజకీయాలతో OBCల ప్రయోజనాలను అడ్డుకుంటుందా, లేదా ఎన్నికల కోసం తాత్కాలికంగా ఆకర్షిస్తుందా అనేది కాలమే సమాధానం చెప్పాలి.

సామాజిక న్యాయంపై దాడి – నమ్మక ద్రోహం : ED, CBI వంటి ఏజెన్సీల దుర్వినియోగ ఆరోపణలు, ఎన్నికల కమిషన్ నిష్పక్షతపై సందేహాలు బీజేపీ పారదర్శకతను ప్రశ్నార్థకం చేస్తున్నాయి. కుల గణన డేటా తారుమారైతే, OBC జనాభా తక్కువగా చూపబడి, విద్య, ఉద్యోగాలు, రాజకీయ ప్రాతినిధ్యంలో రిజర్వేషన్లు తగ్గుతాయి. ఇది నియోజకవర్గ డీలిమిటేషన్‌ను ప్రభావితం చేసి, OBC ప్రజాస్వామ్య గొంతును అణచివేస్తుంది. “నమ్మక ద్రోహం” లాగా, బీజేపీ కుల గణనను తన రాజకీయ ప్రయోజనాల కోసం వాడుకునే ప్రమాదం ఉంది. ఉదాహరణకు, 2011 సోషియో-ఎకనామిక్ కుల సెన్సస్ (SECC) డేటాను బీజేపీ ప్రభుత్వం 2015లో ప్రచురించలేదు, దానిని “అసాధ్యమైనది” అని పేర్కొంవడం విశేషం.

హిందుత్వ ఏకత్వం vs కుల గుర్తింపు : RSS హిందుత్వ ఏకత్వాన్ని ప్రోత్సహిస్తూ, కుల గుర్తింపును “విభజన”గా పరిగణిస్తుంది. 2015లో, RSS సర్సంఘచాలక్ మోహన్ భగవత్ రిజర్వేషన్‌లను పునఃసమీక్షించాలని పిలుపునిచ్చారు, ఇది OBC, SC/ST సముదాయాలలో ఆందోళన కలిగించింది. 2024లో, RSS కుల గణనకు “సీరియస్‌గా” నిర్వహించాలని మద్దతు ఇచ్చినప్పటికీ, దానిని రాజకీయ సాధనంగా ఉపయోగించకూడదని హెచ్చరించింది. ఈ “రెండు నాల్కల ధోరణి” బీజేపీ కుల గణన ఆసక్తిని రాజకీయ ఒత్తిడి ఫలితంగా చూపిస్తుంది, నిజమైన సామాజిక న్యాయ లక్ష్యంగా కాదన్నట్లు పేర్కొంటున్నారు.

OBC ఐక్యత అవసరం : కుల గణన సామాజిక న్యాయం, సమానత్వం కోసం రాజ్యాంగ హామీని నెరవేర్చే అవకాశం. కానీ, బీజేపీ చరిత్ర మండల్ వ్యతిరేకత, OBC విభజన రాజకీయాలు, EWS రిజర్వేషన్లకు ప్రాధాన్యత దీనిని అడ్డుకునే ప్రమాదాన్ని చూపిస్తుంది. OBCలు, రాజకీయ కూటములు, పౌర సమాజం అప్రమత్తంగా ఉండి, గణన పారదర్శకతను నిర్ధారించాలి. “, బీజేపీకి OBCల ఓట్ల మీద ఆశ తప్ప, వారి సామాజిక న్యాయం మీద ఆసక్తి లేదని స్పష్టమవుతోంది. బిహార్ సర్వే వంటి ఫలితాలు OBC శక్తిని చూపిస్తున్నాయి. ఈ శక్తిని ఐక్యంగా, పోరాడి సాధించాలి. బీజేపీ యూ-టర్న్ ఒక విజయం కాదు, ఇది OBC ఉద్యమం ఒత్తిడి ఫలితం. తెలంగాణలో కూడా OBCలు ఏకమై, తమ హక్కుల కోసం పోరాడాల్సిన అవసరం ఎంతైనా ఉంది.