బిఆర్ఎస్ పార్టీకి నష్టం చేసే కార్యక్రమాలు చేస్తున్న వారిపై వేటు తప్పదని రామగుండం ఎమ్మెల్యే కోరుకొండ చందర్ పేర్కొన్నారు. రామగుండం నియోజకవర్గంలో ఎమ్మెల్యే చందర్ కు ఎమ్మెల్యే టికెట్ రాకుండా, ఈ ప్రాంతంలో బి ఆర్ ఎస్ పార్టీకి నష్టం కల్గించే విధంగా వ్యవహారిస్తున్న ఐదుగురు వ్యక్తులపై క్రమశిక్షణ చర్యల్లో భాగంగా మార్కండేయ కాలనీలో ముఖ్య కార్యకర్తల సమావేశం నిర్వహించారు. ఈ సందర్బంగా ఎమ్మెల్యే చందర్ పాల్గొని మాట్లాడుతూ పార్టీకి నష్టం చేసే కార్యక్రమాలు చేస్తున్న వారిపై వేటు తప్పదని వారి పేర్లను బహిర్గతం చేసారు.
ఇందులో పాలకుర్తి జడ్పీటిసి కందుల సంధ్యారాణి, మాజీ మేయర్ కోంకటి లక్ష్మీనారాయణ, పాతిపల్లి ఎల్లయ్య లక్ష్మి, టీబీజీకేఎస్ ప్రధాన కార్యదర్శి మిర్యాల రాజిరెడ్డి తో పాటు మరొక వ్యక్తి బయ్యపు మనోహర్ రెడ్డి ఉన్నారని, వారిపై క్రమశిక్షణ చర్యలు తీసుకుంటామన్నారు. ఈ సమావేశంలో డిప్యూటీ మేయర్ అభిషేక రావు, జడ్పీటిసి ఆముల నారాయణ, ఎంపిపిలు, కార్పొరేటర్లు, పార్టీ ఆయా ఏరియాలకు చెందిన ప్రధాన నాయకులు, పార్టీ క్రమశిక్షణ కమిటీ శ్రేణులు పాల్గొన్నారు.