IND vs AUS| బోర్డర్-గావస్కర్ ట్రోఫీలో భాగంగా ఆస్ట్రేలియాతో జరుగుతున్న తొలి టెస్టు తొలి రోజు ఆట ముగిసింది. భాతర బ్యాటర్లు నిరాశపరిచినా.. బౌలర్లు మాత్రం అదరగొట్టారు. తొలుత టాస్ గెలిచి బ్యాటింగ్ ఎంచుకున్న టీమిండియా 150 పరుగులకే ఆలౌట్ అయింది. అనంతరం బ్యాటింగ్‌కు దిగిన ఆస్ట్రేలియా బ్యాటర్లను భారత బౌలర్లు బెంబేలెత్తించారు.
బూమ్ బూమ్ బుమ్రా నిప్పులాంటి బంతులతో ఆసీస్ బ్యాటర్ల పతనం శాసించాడు. బుమ్రా దెబ్బకు 31 పరుగులకే 4 ఆలౌట్లు కోల్పోయింది. ఇక సిరాజ్ 2, హర్షిత్ రాణా ఓ వికెట్‌తో రాణించారు. దీంతో ఆట ముసిగే సమయానికి 7 వికెట్ల నష్టానికి ఆసీస్ 67 పరుగులు చేసింది. ప్రస్తుతం అలెక్స్‌ కెరీ (19), మిచెల్ స్టార్క్‌ (6) క్రీజులో ఉన్నారు. ఆస్ట్రేలియా తొలి ఇన్నింగ్స్‌లో ఇంకా 83 పరుగుల వెనుకంజలో ఉంది.
అంతకుముందు బ్యాటింగ్ చేసిన భారత్ ఆది నుంచే తడబడింది. ఓపెనర్ యశస్వి జైశ్వాల్ డకౌట్ కాగా.. వన్ డౌన్లో వచ్చిన పడిక్కల్ కూడా డకౌట్‌గా పెవిలియన్ చేరారు. ఇక స్టార్ బ్యాటర్ కింగ్ కోహ్లీ కూడా 5 పరుగులకే వెనుదిరిగారు. దీంతో భారత్ తక్కువ పరుగులకే మూడు వికెట్లు కోల్పోయి కష్టాల్లో పడింది. లంచ్ బ్రేక్ సమయానికి భారత్ నాలుగు వికెట్లు కోల్పోయి 51 పరుగులు చేసింది. తర్వాత తెలుగు ఆటగాడు నితీశ్ కుమార్ రెడ్డి 41 పరుగులు, రిషబ్ పంత్ 37 పరుగులతో పోరాడారు. దీంతో టీమిండియా ఆ మాత్రమైన స్కోర్ చేయగలిగింది. ఇక ఆసీస్ బౌలర్లలో హేజల్‌వుడ్‌ 4.. స్టార్క్‌, మిచెల్, కమిన్స్‌ చెరో 2 వికెట్లు తీశారు.
