ఐపీఎల్ 2025(IPL 2025)లో భాగంగా చెన్నై సూపర్ కింగ్స్‌ (Chennai Super Kings)తో జరుగుతున్న మ్యాచ్‌లో ఢిల్లీ క్యాపిటల్స్ (Delhi Capitals) నిర్ణీత 20 ఓవర్లలో 6 వికెట్ల నష్టానికి 183 పరుగులు చేసింది. కేఎల్ రాహుల్ (77; 51 బంతుల్లో 6 ఫోర్లు, 3 సిక్స్‌లు) హాఫ్ సెంచరీతో రాణించాడు. అభిషేక్ పొరెల్ (33; 20 బంతుల్లో 4 ఫోర్లు, 1 సిక్స్‌), అక్షర్ పటేల్ (21; 14 బంతుల్లో 2 ఫోర్లు, 1 సిక్స్‌), సమీర్ రిజ్వీ (20; 15 బంతుల్లో 1 ఫోర్, 1 సిక్స్‌) తమ వంతు పాత్ర పోషించారు. చివర్లో ట్రిస్టన్ స్టబ్స్ (22*; 11 బంతుల్లో 2 ఫోర్లు, 1 సిక్స్‌) దూకుడుగా ఆడాడు. ఇక చెన్నై బౌలర్లలో ఖలీల్ అహ్మద్ 2, రవీంద్ర జడేజా, నూర్ అహ్మద్, పతిరనా చెరో వికెట్ పడగొట్టారు.
తొలుత టాస్ గెలిచి బ్యాటింగ్‌కు దిగిన ఢిల్లీ జట్టుకు తొలి ఓవర్‌లోనే షాక్ తగిలింది. జేక్ ఫ్రేజర్(0)ని ఖలీల్ అహ్మద్ ఔట్ చేశాడు. అనంతరం కేఎల్ రాహుల్, అభిషేక్ పొరెల్ 54 పరుగుల భాగస్వామ్యం నెలకొల్పారు. ఆ తర్వాత ఆచితూచి ఆడుతూ మధ్యలో ఫోర్లు, సిక్సర్లు బాదుతూ స్కోర్ బోర్డును ముందుకు నడిపించారు. కాగా రెండు మ్యాచ్‌లు ఆడిన ఢిల్లీ రెండు గెలవగా.. మూడు మ్యాచ్‌లు ఆడిన చెన్నై ఒక్క మ్యాచ్ మాత్రమే గెలిచింది. దీంతో ఈ మ్యాచ్‌లో ఎలాగైనా గెలిచి పాయింట్ల పట్టికలో ముందుకెళ్లాలని సీఎస్కే పట్టుదలతో ఉండగా.. ఇక ఢిల్లీ అదే ఫామ్ కొనసాగించి హ్యాట్రిక్ విజయం సాధించాలని భావిస్తోంది.
