Hardik Pandya viral video: టీ20 ప్రపంచకప్కు ముందు టీమ్ ఇండియా సన్నాహాలు జోరందుకున్నాయి. బుధవారం (జనవరి 21) నాగ్పూర్ వేదికగా న్యూజిలాండ్తో టీ20 సిరీస్ ప్రారంభం కానున్న నేపథ్యంలో భారత ఆటగాళ్లు నెట్స్లో తీవ్రంగా శ్రమిస్తున్నారు. ఎలాగైనా వన్డే సిరీస్ ఓటమికి ప్రతీకారం తీర్చుకోవాలని చెమటలు చిందిస్తున్నారు. ఈ క్రమంలో స్టార్ ఆల్రౌండర్ హార్దిక్ పాండ్యా, హెడ్ కోచ్ గౌతమ్ గంభీర్ మధ్య జరిగిన ఒక ఆసక్తికర సంభాషణ ఇప్పుడు నెట్టింట వైరల్గా మారింది.
ఇటీవలే సయ్యద్ ముస్తాక్ అలీ ట్రోఫీలో మెరిసిన హార్దిక్ పాండ్యా, అదే ఊపును అంతర్జాతీయ ఫార్మాట్లోనూ కొనసాగిస్తున్నాడు. ప్రాక్టీస్ సెషన్లో పాండ్యా సిక్సర్ల వర్షం కురిపిస్తుండగా, కోచ్ గౌతమ్ గంభీర్ అతడి దగ్గరకు వచ్చి ఒక ప్రశ్న వేశాడు.
గంభీర్: “నువ్వు ఎక్కడికి కొట్టాలని లక్ష్యంగా పెట్టుకున్నావు? నార్త్ వింగ్ వైపా?” అని అడిగాడు.
హార్దిక్: “నేరుగా ఫస్ట్ టైర్ (స్టాండ్స్ మొదటి అంతస్తు) లోకి కొడతాను” అని కాన్ఫిడెంట్గా బదులిచ్చాడు.
కేవలం చెప్పడమే కాదు, గాల్లోకి బంతులను బాదుతూ ప్రాక్టీస్ చూస్తున్న వారిని పక్కకు తప్పుకోమని హార్దిక్ హెచ్చరించడం అతని ఫామ్కు నిదర్శనం.
దూబే సిక్సర్ల వర్షం.. సూర్య ప్రశంసలు!
మరోవైపు శివమ్ దూబే కూడా భారీ సిక్సర్లతో విరుచుకుపడ్డాడు. దూబే కొట్టిన ఒక షాట్ ఏకంగా సెకండ్ టైర్లోకి వెళ్లడంతో, కెప్టెన్ సూర్యకుమార్ యాదవ్ ఆశ్చర్యపోతూ.. “అబ్బే.. ఏకంగా సెకండ్ టైర్లోకి కొట్టేశావా?” అని అనడం గంభీర్ ముఖంలో చిరునవ్వు పూయించింది. రింకూ సింగ్, సంజు శామ్సన్, ఇషాన్ కిషన్ కూడా నెట్స్లో మెరుపులు మెరిపించారు.
Also Read: Tilak Varma -గుడ్ న్యూస్.. గాయం నుండి కోలుకుని.. రీ-ఎంట్రీకి సిద్ధమైన తిలక్ వర్మ!
టీమ్ ఇండియా ముందున్న సవాళ్లు..
కివీస్తో వన్డే సిరీస్ ఓటమి తర్వాత, టీ20ల్లో గెలిచి మళ్లీ ఫామ్లోకి రావాలని భారత్ పట్టుదలగా ఉంది. అయితే గాయాల సమస్య టీమ్ మేనేజ్మెంట్ను కలవరపెడుతోంది. వాషింగ్టన్ సుందర్, తిలక్ వర్మ గాయాల కారణంగా ఈ సిరీస్కు దూరమయ్యారు. ప్రపంచకప్ నాటికి వారు కోలుకుంటారా లేదా అన్నది సస్పెన్స్గా మారింది.వీరి స్థానంలో అద్భుతమైన ఫామ్లో ఉన్న శ్రేయస్ అయ్యర్, రవి బిష్ణోయ్ జట్టులోకి వచ్చారు. ప్రపంచకప్కు ముందు జరుగుతున్న ఈ చివరి టీ20 సిరీస్లో భారత్ విజయం సాధించి ఆత్మవిశ్వాసాన్ని కూడగట్టుకుంటుందో లేదో చూడాలి!