ఉప్పల్ (తెలుగు ప్రభ): ఉప్పల్లోని రాజీవ్ గాంధీ అంతర్జాతీయ క్రికెట్ స్టేడియంలో అక్టోబర్ 14 న జరగనున్న భారత్–వెస్టిండీస్ అంతర్జాతీయ క్రికెట్ మ్యాచ్ నిర్వహణకు హైదరాబాద్ క్రికెట్ అసోసియేషన్ (హెచ్సీఏ) విస్తృత ఏర్పాట్లు చేస్తున్నట్లు తెలిపింది. మ్యాచ్ను విజయవంతంగా నిర్వహించేందుకు మౌలిక సదుపాయాలు, పిచ్ తయారీ, ఫ్లడ్లైట్లు, అగ్నిమాపక భద్రత, క్రీడాకారులకు అవసరమైన సౌకర్యాలపై ప్రత్యేక దృష్టి సారించినట్లు హెచ్సీఏ కార్యదర్శి ఎం. జీవన్ రెడ్డి వెల్లడించినట్లు సమాచారం.
మ్యాచ్ టికెట్ ధరలు రూ.750 నుంచి ప్రారంభమవుతాయని, టికెట్ల విక్రయాలకు టికెట్ జెనీ అధికారిక భాగస్వామిగా వ్యవహరిస్తోందని పేర్కొన్నారు. పర్యావరణ పరిరక్షణలో భాగంగా ఐక్యరాజ్యసమితి పర్యావరణ కార్యక్రమం (యూఎన్ఈపీ)తోనూ హెచ్సీఏ భాగస్వామ్యం కుదుర్చుకున్నట్లు వివరించారు.
మ్యాచ్ రోజున స్టేడియం పరిసరాల్లో ట్రాఫిక్ రద్దీని తగ్గించేందుకు ప్రేక్షకులు హైదరాబాద్ మెట్రో రైలులో ప్రయాణించాలని నిర్వాహకులు సూచించినట్లు సమాచారం. మ్యాచ్ ప్రారంభానికి కనీసం రెండు గంటల ముందే స్టేడియానికి చేరుకోవాలని కోరినట్లు తెలిసింది. భారీ సంఖ్యలో ప్రేక్షకులు తరలివచ్చే అవకాశం ఉన్న నేపథ్యంలో మ్యాచ్ నిర్వహణ, భద్రత, రవాణా ఏర్పాట్లపై దృష్టి సారించారు.

