INDvsOMAN: ఆసియా కప్ టీ20 టోర్నమెంట్‌లో భారత్ తమ చివరి లీగ్ మ్యాచ్‌లో ఒమన్‌పై 21 పరుగుల తేడాతో అతికష్టం మీద గెలిచింది. ఓ మోస్తరు స్కోరు సాధించినప్పటికీ ఒమన్ బ్యాటర్ల నుంచి ఊహించని ప్రతిఘటన ఎదురవడంతో టీమ్ ఇండియాకు ఓటమి భయం తప్పలేదు. ఓపెనర్లు ఆమిర్ కలీమ్ (64), హమ్మద్ మీర్జా (51) అద్భుతమైన బ్యాటింగ్ ప్రదర్శనతో భారత్‌కు చెమటలు పట్టించారు. ఒక దశలో ఒమన్ విజయం సాధిస్తుందేమో అన్నంత దూకుడుగా ఆడారు. అయితే కీలక సమయంలో కలీమ్ వికెట్ కోల్పోవడంతో భారత్ ఊపిరి పీల్చుకుంది. భారత బౌలర్లలో కుల్దీప్ యాదవ్ (1/23), హర్షిత్ రాణా (1/25), హార్దిక్ పాండ్యా (1/26) ఆకట్టుకున్నారు.
సంజు, అభిషేక్ మెరుపులు: మొదట టాస్ గెలిచి బ్యాటింగ్ ఎంచుకున్న భారత్ అనూహ్యంగా తడబడింది. రెండో ఓవర్లోనే శుభ్‌మన్‌ గిల్ (5) వికెట్ కోల్పోయింది. అయితే ఓపెనర్ అభిషేక్ శర్మ (38) దూకుడుగా ఆడటంతో స్కోరు వేగం పుంజుకుంది. మరోవైపు సంజు శాంసన్ (56) సమయోచితంగా ఆడుతూ.. వేగంగా పరుగులు సాధించాడు. వీరిద్దరి మెరుపులతో 7 ఓవర్లకు భారత్ 72/1తో పటిష్ట స్థితికి చేరుకుంది. ఆ తర్వాత హార్దిక్ పాండ్యా (1), అక్షర్ (26), శివమ్ దూబె (5) వికెట్లు త్వరగా పడిపోయినా.. సంజు, తిలక్ వర్మ (29)తో కలిసి భారత్‌ను ఆదుకున్నారు. చివరి ఓవర్లలో కూడా వికెట్లు పడుతూనే ఉన్నా 8 వికెట్లకు 188 పరుగులు చేసి టోర్నీలో అత్యధిక స్కోరు సాధించింది. ఒమన్ బౌలర్లలో షా ఫైజల్ (2/23) అద్భుతంగా రాణించాడు.
ఒమన్ ప్రణాళికాబద్ధమైన పోరాటం: 189 పరుగుల లక్ష్యంతో బరిలోకి దిగిన ఒమన్, భారత బౌలర్ల ధాటికి తేలిగ్గా ఓడిపోతుందని అంతా అనుకున్నారు. కానీ ఓపెనర్లు కలీమ్, జతిందర్ (32) పరుగుల కంటే వికెట్ పడకుండా జాగ్రత్త పడ్డారు. తొలి 8 ఓవర్లకు 55/0తో నిలిచి భారత్‌ను ఆశ్చర్యపరిచారు. జతిందర్ ఔటయ్యాక, కలీమ్‌కు తోడుగా హమ్మద్ మీర్జా వచ్చి ధాటిగా బ్యాటింగ్ చేశాడు. కుల్దీప్ బౌలింగ్‌లో రెండు సిక్సర్లు కొట్టి ప్రమాద ఘంటికలు మోగించాడు. కలీమ్ కూడా దూకుడుగా ఆడటంతో, ఒమన్‌కు చివరి 16 బంతుల్లో 40 పరుగులు అవసరమయ్యాయి. ఈ దశలో విజయం ఎవరిదో చెప్పలేని పరిస్థితి ఏర్పడింది. కానీ హర్షిత్ రాణా బౌలింగ్‌లో అద్భుతమైన క్యాచ్‌కు కలీమ్ ఔటవడంతో భారత్ ఆటలోకి మళ్లీ వచ్చింది. ఆ తర్వాత రన్‌రేట్ పెరిగిపోవడంతో.. ఒమన్ తన వరుసగా వికెట్లను కోల్పోయింది. దీంతో భారత్ 21 పరుగుల తేడాతో విజయం సాధించింది.
