Boycott Calls Ahead Of India-Pak Asia Cup Face-Off: ఆసియా కప్ 2025లో భాగంగా ఆదివారం జరగనున్న చిరకాల ప్రత్యర్థులు భారత్-పాకిస్థాన్ మ్యాచ్‌పై దేశంలో రాజకీయ దుమారం రేగింది. కేవలం ఐదు నెలల క్రితం కశ్మీర్‌లోని పహల్గామ్‌లో జరిగిన ఉగ్రదాడిలో 26 మంది ప్రాణాలు కోల్పోయిన విషాదం నుంచి దేశం ఇంకా తేరుకోకముందే పాక్‌తో క్రికెట్ ఆడటాన్ని పలు రాజకీయ పార్టీలు, బాధితుల కుటుంబాలు తీవ్రంగా వ్యతిరేకిస్తున్నాయి.

ALSO READ: India-Pak match: క్రికెటర్లు ఏం చేస్తున్నారు? భారత్- పాక్ మ్యాచ్ పై పహల్గాం బాధితురాలు ఆగ్రహం

విపక్షాలైన కాంగ్రెస్, శివసేన (UBT), ఆమ్ ఆద్మీ పార్టీ (AAP) ఈ మ్యాచ్‌ను వెంటనే బహిష్కరించాలని డిమాండ్ చేశాయి. ఆప్ కార్యకర్తలు పాకిస్థాన్ దిష్టిబొమ్మను దహనం చేసి నిరసన తెలిపారు. “మన సోదరీమణుల సిందూరాన్ని చెరిపేసిన నీచమైన వాళ్లతో మన క్రికెటర్లను ఆడిస్తున్నారు” అని ఆప్ నేత సౌరభ్ భరద్వాజ్ మండిపడ్డారు.

“రక్తం, క్రికెట్ కలిసి ఎలా సాగుతాయి? దేశభక్తిని వీళ్లు వ్యాపారంగా మార్చారు,” అని శివసేన (UBT) అధినేత ఉద్ధవ్ థాకరే విమర్శించారు. సైనికుల కుటుంబాలు నాశనమవుతుంటే, ప్రభుత్వం డబ్బు సంపాదించడానికే ఈ మ్యాచ్ నిర్వహిస్తోందని కాంగ్రెస్ నేత ఇమ్రాన్ మసూద్ ఆరోపించారు.

పహల్గామ్ దాడిలో భర్తను కోల్పోయిన ఐశాన్య ద్వివేది మాట్లాడుతూ, “బీసీసీఐకి ఆ 26 మంది ప్రాణాలంటే విలువ లేదా? పాక్‌తో మనవాళ్లు ఎందుకు ఆడుతున్నారు?” అని ఆవేదన వ్యక్తం చేశారు.

ALSO READ: Ind vs Pak: పాక్ తో మ్యాచ్.. షాకింగ్ జట్టును ఎంపిక చేసిన చాట్ జీపీటీ..

అయితే, ఈ విమర్శలపై కేంద్ర మంత్రి అనురాగ్ ఠాకూర్ స్పందించారు. “ఇది ఐసీసీ, ఏసీసీ వంటి అంతర్జాతీయ టోర్నమెంట్. ఇందులో ఆడకపోతే మ్యాచ్‌ను కోల్పోయి, పాయింట్లను పాకిస్థాన్‌కు అప్పగించాల్సి వస్తుంది. అందుకే ఆడటం తప్పనిసరి. అయితే, పాకిస్థాన్ ఉగ్రవాదాన్ని ఆపే వరకు ఆ దేశంతో ద్వైపాక్షిక సిరీస్‌లు ఆడేది లేదు. ఇది మన ప్రభుత్వ విధానం,” అని స్పష్టం చేశారు.

ఈ రాజకీయ గందరగోళంపై భారత జట్టు బ్యాటింగ్ కోచ్ సితాన్షు కోటక్ స్పందిస్తూ, “ప్రభుత్వ నిర్ణయానికి బీసీసీఐ కట్టుబడి ఉందని తెలిశాక, మా దృష్టంతా ఆటపైనే ఉంది. బయటి విషయాలు మా ఆటగాళ్ల ఏకాగ్రతను దెబ్బతీయవు. ఇది భారత్-పాక్ మ్యాచ్, హోరాహోరీగా ఉంటుంది,” అని తెలిపారు. ఈ వివాదాల నడుమ, రేపు రాత్రి 8 గంటలకు జరగబోయే మ్యాచ్‌పై సర్వత్రా ఉత్కంఠ నెలకొంది.

ALSO READ: IND vs PAK Asia Cup: పాక్‌తో మ్యాచ్‌కు 8 మంది బ్యాటర్లు అవసరమా?- మాజీ క్రికెటర్‌