Pratika Rawal World Cup medal : భారత జట్టు ప్రపంచ కప్ గెలవడంలో ఆమెది కీలక పాత్ర. తన బ్యాట్‌తో పరుగుల వరద పారించి, జట్టును నాకౌట్ దశకు చేర్చడంలో అలుపెరగని పోరాటం చేసింది. కానీ, విధి ఆడిన వింత నాటకంలో, దురదృష్టవశాత్తూ గాయపడి కీలక మ్యాచ్‌లకు దూరమైంది. జట్టు కప్పు గెలిచినా, ఆ విజయంలో భాగమైన ఆమె మెడలో మాత్రం పతకం పడలేదు. 308 పరుగులు చేసినా ప్రతీక రావల్‌కు పతకం ఎందుకు దక్కలేదు? క్రీడాస్ఫూర్తిని దెబ్బతీసేలా ఉన్న ఆ వింత నిబంధన ఏంటి? ఈ అన్యాయంపై క్రీడాభిమానులు ఎందుకు భగ్గుమంటున్నారు? వివరాల్లోకి వెళ్తే…
విజయంలో చెమట ఆమెది.. పతకం మరొకరిది : 2025 మహిళల వన్డే ప్రపంచ కప్‌లో భారత ఓపెనర్ ప్రతీక రావల్ అద్భుతమైన ఫామ్‌తో అదరగొట్టింది. టోర్నమెంట్‌లో ఏకంగా 308 పరుగులు సాధించి, టీమిండియా విజయాల్లో కీలక భూమిక పోషించింది. అయితే, నాకౌట్ దశకు ముందు ఆమె గాయం బారిన పడటంతో, టోర్నమెంట్ మొత్తానికి దూరమవ్వాల్సి వచ్చింది. ఆమె స్థానంలో జట్టు యాజమాన్యం షఫాలీ వర్మను తుది జట్టులోకి తీసుకుంది. ఆ తర్వాత భారత జట్టు అద్భుతంగా రాణించి విశ్వవిజేతగా నిలిచింది. కానీ, విజేతలకు అందించే పతకం మాత్రం ప్రతీక రావల్‌కు దక్కలేదు.
ఆ ఒక్క రూల్.. ఎంత అన్యాయం : నిబంధనల ప్రకారం, టోర్నమెంట్ నాకౌట్ దశలో గాయపడిన క్రీడాకారిణి స్థానంలో అధికారికంగా మరొకరిని జట్టులోకి తీసుకుంటే, అసలు జట్టులో ఉన్న క్రీడాకారిణి పతకానికి అనర్హురాలవుతుంది. ప్రతీక స్థానంలో షఫాలీ వర్మ అధికారికంగా రీప్లేస్‌మెంట్ కావడంతో, ప్రతీకకు పతకాన్ని అందించలేదు. జట్టును నాకౌట్ చేర్చడానికి అంతగా శ్రమించిన క్రీడాకారిణికి పతకం దక్కకపోవడం క్రీడా ప్రపంచంలో తీవ్ర చర్చనీయాంశంగా మారింది.
సోషల్ మీడియాలో అభిమానుల ఆగ్రహం : ఈ విషయం తెలియగానే క్రీడాభిమానులు తీవ్రంగా స్పందించారు. సోషల్ మీడియా వేదికగా తమ ఆగ్రహాన్ని, నిరాశను వ్యక్తం చేస్తున్నారు. “ఇదెక్కడి వింత రూల్. నమ్మశక్యంగా లేదు,” అంటూ ఒక అభిమాని వ్యాఖ్యానించగా, “ఇది చాలా అన్యాయం” అని మరొకరు కామెంట్ చేశారు. ప్రతీకకు జరిగిన అన్యాయంపై తీవ్ర విమర్శలు వెల్లువెత్తుతున్నాయి. ఆటగాళ్ల శ్రమను గుర్తించని ఇలాంటి నిబంధనలను మార్చాలని వారు ఐసీసీని డిమాండ్ చేస్తున్నారు. ఆటగాళ్ల చెమటను, వారి పోరాటాన్ని గౌరవించనప్పుడు ఇలాంటి విజయాలకు అర్థం లేదని పలువురు అభిప్రాయపడుతున్నారు.
