Rajasthan Royals Sale Talks:ఇండియన్ ప్రీమియర్ లీగ్ చరిత్రలో 2025లో ఐపీఎల్ టైటిల్ గెలిచి చరిత్ర సృష్టించిన రాయల్ ఛాలెంజర్స్ బెంగళూరు జట్టు అమ్మకానికి రావచ్చన్న సమాచారం ఇప్పటికే పెద్ద చర్చకు దారితీసింది. అయితే ఇప్పుడు మరో మలుపు జత కావడంతో విషయం మరింత ఆసక్తికరంగా మారింది. లక్నో సూపర్ జెయింట్స్ యజమాని సంజీవ్ గోయెంకా అన్న హర్ష గోయెంకా చేసిన ఒక సామాజిక మాధ్యమ పోస్టు ప్రకారం, కేవలం ఆర్సీబీ మాత్రమే కాదు, రాజస్థాన్ రాయల్స్ ఫ్రాంచైజీ కూడా కొత్త యజమానులను పరిశీలిస్తున్నట్లు తెలుస్తోంది.
ఐపీఎల్ జట్ల విలువలు పెరుగుతూ వస్తున్న నేపథ్యంలో, రెండు ప్రముఖ జట్లు ఒకే సమయంలో అమ్మకపు ప్రక్రియలోకి రావడం అభిమానులను, పరిశ్రమను షాక్కు గురిచేసింది.హర్ష గోయెంకా నవంబర్ 27న తన ఎక్స్ ప్లాట్ఫార్మ్లో చేసిన వ్యాఖ్యలు ఈ చర్చకు నేరుగా నిప్పంటించినట్టయ్యాయి. ఆయన్ను పరిశ్రమలో మంచి సమాచార వనరులు కలిగిన వ్యక్తిగా భావిస్తారు. ఆయన తెలిపిన దాని ప్రకారం రెండు ఐపీఎల్ జట్లు మార్కెట్లో ఉన్న భారీ విలువను దృష్టిలో పెట్టుకుని అమ్మకానికి సిద్ధమవుతున్నాయన్న భావన బలపడింది.
ఆర్సీబీ అమ్మకంపై..
ఆయన చెప్పిన వివరాల్లో మరో ఆప్యాయత కలిగించే పాయింట్ ఏమిటంటే, ఈ రెండు జట్ల కోసం ఇప్పటికే పలువురు ఆసక్తిగల కొనుగోలుదారులు రంగంలోకి దిగినట్లు చెప్పడం. దీంతో క్రికెట్ వ్యాపార రంగం మొత్తం ఈ విషయంపై దృష్టి కేంద్రీకరించింది.ఆర్సీబీ అమ్మకంపై ఉన్న సమాచారం మొదట బయటకు రావడం సీరం ఇన్స్టిట్యూట్ ఆఫ్ ఇండియా సీఈఓ ఆదార్ పూనావాలా చేసిన ఒక పోస్టు ద్వారానే జరిగింది. ఆ పోస్టుతో సోషల్ మీడియాలో చర్చలు మొదలయ్యాయి. వెంటనే నవంబర్ 5న ఆర్సీబీని కలిగి ఉన్న డియాజియో కంపెనీ స్పందించి, అమ్మకం ప్రక్రియను అధికారికంగా ప్రారంభించినట్టు ప్రకటించింది.
డియాజియో తెలిపిన ప్రకారం, ఈ ప్రక్రియ 2026 మార్చి 31 నాటికి పూర్తయ్యే అవకాశం ఉందని అంచనా వేస్తున్నారు. ఇది చిన్న వ్యవహారం కాదు; అంతర్జాతీయ స్థాయిలో భారీ కొనుగోలు ఒప్పందాలు అవసరమయ్యే విషయం. అందువల్ల పూర్తి ప్రక్రియకు సమయం పట్టడం సహజమే.
ఆర్సీబీ విలువ ఇప్పుడు ఎంతగా పెరిగిందో అనేక విశ్లేషణల్లో బయట పడుతోంది. ఫోర్బ్స్ 2022 నివేదిక ప్రకారం, ఆ సమయంలో ఆర్సీబీ విలువ 1 బిలియన్ డాలర్ల కంటే కొంచెం ఎక్కువ. కానీ 2025లో టైటిల్ గెలిచిన తర్వాత జట్టు వాణిజ్య విలువ గణనీయంగా పెరిగిన అవకాశం ఉంది. అందుకే యాజమాన్యం సుమారు 2 బిలియన్ డాలర్లు అంటే సుమారు 16600 కోట్ల రూపాయల పరిధిలో ధరను ఆశిస్తోంది. ఈ స్థాయి మార్కెట్ విలువ భారత క్రికెట్ ఫ్రాంచైజీ వ్యాపారరంగం ఎంత వేగంగా పెరుగుతోందో చూపిస్తోంది.
ఆర్సీబీ కోసం బిడ్ వేయవచ్చని భావిస్తున్న కొనుగోలు బృందంలో ఆదార్ పూనావాలా, మోహన్దాస్ పాయ్, వినోద్ ఖమత్లు ఉన్నట్టు సమాచారం. ఈ ముగ్గురు కలిసే ఒక శక్తివంతమైన కన్సార్టియంగా మారవచ్చు. వీరిలో ప్రతి ఒక్కరూ తమ రంగాల్లో పేరుపొందినవ్యక్తులు కావడంతో, వీరు ఆర్సీబీపై చూపుతున్న ఆసక్తి కూడా పరిశ్రమ దృష్టిని ఆకర్షిస్తోంది.
రాయల్స్ స్పోర్ట్స్ గ్రూప్..
ఇక రాజస్థాన్ రాయల్స్ పరిస్థితిని పరిశీలిస్తే, ఈ ఫ్రాంచైజీ 2008లో మొదటి ఐపీఎల్ ట్రోఫీని గెలిచి ప్రత్యేక గుర్తింపు సంపాదించుకుంది. ఈ జట్టును రాయల్స్ స్పోర్ట్స్ గ్రూప్ నిర్వహిస్తోంది, వీరికి మొత్తం వాటాలో 65 శాతం వాటా ఉంది. మిగతా వాటాలను లాచ్లాన్ ముర్డోచ్, రెడ్బర్డ్ క్యాపిటల్ పార్టనర్స్ వంటి ప్రముఖ పెట్టుబడి దారులు కలిగి ఉన్నారు. హర్ష గోయెంకా చేసిన వ్యాఖ్యల కారణంగా ఇప్పుడు ఈ ఫ్రాంచైజీ కూడా అమ్మకానికి సిద్ధమవుతుందన్న అభిప్రాయం స్పష్టమవుతోంది. అయితే ఈ విషయంపై జట్టు యాజమాన్యం నుంచి ఇంకా అధికారిక ప్రకటన రాలేదు.