ఐపీఎల్ 2025 సీజన్‌లో బెంగళూరులోని చిన్నస్వామి స్టేడియంలో చివరకు ఆర్సీబీ అభిమానుల ముఖాలలో చిరునవ్వులు చిందాయి. తమ హోంగ్రౌండ్‌లో రాయల్స్‌ను 11 పరుగుల తేడాతో ఓడించిన ఆర్సీబీ, సీజన్‌లో హోం గ్రౌండ్ లో తొలి గెలుపును నమోదుచేసింది. ఆర్సీబీ ఇన్నింగ్స్‌లో విరాట్ కోహ్లీ తన క్లాసికల్ ఫార్మ్‌ను కొనసాగిస్తూ 70 పరుగులు చేశాడు. అతనికి తోడుగా పడిక్కల్ మెరుపులు మెరిపిస్తూ వేగవంతమైన హాఫ్ సెంచరీ చేశాడు. ఈ ఇద్దరి భాగస్వామ్యంతో ఆర్సీబీ స్కోరు బోర్డు పరుగులు తీసింది. చివర్లో టిమ్ డేవిడ్ పవర్ హిట్టింగ్, జితేష్ శర్మ చక్కటి ఫినిషింగ్‌తో ఆ జట్టు భారీ స్కోరు 205/5కి చేరింది.
తదుపరి భారీ లక్ష్య చేధనలో రాజస్థాన్ రాయల్స్ కు ఆదిలోనే ఎదురుదెబ్బ తగిలింది. అయితే యశస్వి జైస్వాల్, నితీష్ రాణా, జురేల్ కాస్త పోరాడినా, అదే స్థాయిలో మద్దతు లభించకపోవడంతో వారు లక్ష్యాన్ని చేరుకోలేకపోయారు. చివరికి 194/9కే పరిమితమయ్యారు. ఆర్సీబీ బౌలింగ్ యూనిట్‌లో జోష్ హేజిల్‌వుడ్ నాలుగు కీలక వికెట్లతో రాజస్థాన్ టాప్ ఆర్డర్‌ను శిథిలం చేశాడు. కృనాల్ పాండ్యా రెండు, భువనేశ్వర్ కుమార్, యశ్ దయాల్ చెరో వికెట్ తీసి గెలుపును నిర్ధారించారు.
ఈ విజయంతో ఆర్సీబీ పాయింట్ల పట్టికలో మూడవ స్థానానికి ఎదిగింది. ఇక రాజస్థాన్ మాత్రం వరుసగా పరాజయాలను ఎదుర్కొంటూ ప్లేఆఫ్ అవకాశాలను సంక్షోభంలోకి నెట్టుకుంది. ఫాన్స్‌కు ఇది ఒక ఉత్సాహభరితమైన రోజు కాగా, ఆర్సీబీ జట్టు గెలుపుతో మరింత ఆత్మవిశ్వాసాన్ని సంతరించుకుంది
