Rohit Sharma-Ahan Sharma:భారత క్రికెట్ జట్టులో కీలక స్థానాన్ని సాధించిన రోహిత్ శర్మ ఇంట్లో ఇటీవల ఆనందభరిత వాతావరణం నెలకొంది. ఆటతో పాటు కుటుంబానికీ ఎప్పుడూ సమాన ప్రాధాన్యత ఇస్తూ ముందుకు సాగుతున్న రోహిత్ నిన్న ఓ ప్రత్యేక సందర్భాన్ని ఇంట్లో ఘనంగా జరుపుకున్నారు. ఆయన రెండో సంతానం అయిన చిన్నారి అహాన్ శర్మ తన మొదటి పుట్టినరోజును పూర్తి చేసుకున్న నేపధ్యంలో కుటుంబ సభ్యులంతా కలిసి మధుర క్షణాలను ఆస్వాదించారు.
నవంబర్ 15న గతేడాది జన్మించిన అహాన్ నిన్న తొలి పుట్టినరోజును జరుపుకున్నాడు. ఇందుకోసం తయారు చేసిన వేడుకలకు సంబంధించిన చిత్రాలను రోహిత్ మరియు ఆయన భార్య రితికా తమ సోషల్ మీడియా ఖాతాల్లో పెట్టడంతో అభిమానులలో ఆసక్తి పెరిగింది.
అహాన్ పుట్టినరోజు సందర్భంగా రోహిత్ ఇంట్లో అదిరిపోయే వాతావరణాన్ని సృష్టించినట్లు రోహిత్ పోస్టు చేసిన ఫొటోల ద్వారా తెలుస్తుంది. చిన్నారుల బొమ్మలు, పసివారి కోసం ఏర్పాటు చేసిన అలంకరణలు, కుటుంబ సభ్యుల సరదా క్షణాలు అన్నీ అభిమానులకు కొత్త అనుభూతిని ఇచ్చాయి. రోహిత్, రితికా కలిసి షేర్ చేసిన ఫొటోలలో అహాన్ బొమ్మలతో ఆడుకుంటూ కనిపించడం అభిమానుల దృష్టిని ఆకర్షించింది.
అయితే కుటుంబ ప్రైవసీని కాపాడేందుకు రోహిత్ చిన్నారి ముఖాన్ని పూర్తిగా బయట పెట్టలేదు. ఫొటోల్లో మరొక అందమైన దృశ్యం రితికా తన కుమార్తె సమైరా, చిన్నారి అహాన్ తో బాల్కనీలో నిలబడి ఉన్న సందర్భం. ఈ క్షణం వారి కుటుంబ బంధాన్ని మరింత స్పష్టంగా చూపిస్తుంది.
ఈ సందర్భంగా రోహిత్ మరో కుటుంబ ఫొటోను కూడా సోషల్ మీడియాలో పెట్టారు. అందులో రోహిత్, రితికా, వారి కూతురు సమైరా, చిన్నారి అహాన్ కలిసి కనిపించారు. ఈ ఫొటో చూసిన అభిమానులు వారికి శుభాకాంక్షలు తెలుపుతూ అనేక కామెంట్లు చేశారు. రోహిత్ సాధారణంగా తన కుటుంబ విషయాలను ఎక్కువగా పంచుకోడు కానీ ఇలాంటి ప్రత్యేక సందర్భాలలో మాత్రం అభిమానులతో ఈ ఆనంద క్షణాలను పంచుకుంటుంటారు.
