Shafali Verma World Cup Final Record :  అదొక అద్భుతం.. అదొక అద్వితీయం! భారత యువ డైనమైట్ షఫాలీ వర్మ, ప్రపంచకప్ ఫైనల్ అనే మహా వేదికపై తన బ్యాటుకు పనిచెప్పి సరికొత్త చరిత్రను లిఖించింది. జట్టులో స్థానంపైనే నీలినీడలు కమ్ముకున్న దశ నుంచి, ఏకంగా ప్రపంచ రికార్డును బద్దలు కొట్టే స్థాయికి ఎదిగింది. సెమీస్‌లో విఫలమైనందుకు కన్నీరు పెట్టుకున్న తండ్రికి.. “ఫైనల్లో చూడు నా ఆట” అని మాటిచ్చింది. ఆ మాటను నిలబెట్టుకుంటూ, ప్రతి బంతిని ఓ యజ్ఞంలా మలిచింది. అసలు, ఊహించని అవకాశం అందిపుచ్చుకుని, ఫైనల్ హీరోగా మారిన షఫాలీ ప్రస్థానం ఎలా సాగింది? ఆమె సృష్టించిన ఆ ప్రపంచ రికార్డు ఏంటి? ఆసక్తికరమైన ఈ కథనం మీకోసం.

అదృష్టం కలిసొచ్చింది.. చరిత్ర తిరగరాసింది : నిజానికి, ప్రపంచ కప్ కోసం ప్రకటించిన ప్రాథమిక జట్టులో షఫాలీకి చోటు దక్కలేదు. కానీ, విధి మరోలా తలచింది. సెమీఫైనల్‌కు ముందు కీలక బ్యాటర్ పత్రికా రావల్ గాయం కారణంగా తప్పుకోవడంతో, షఫాలీకి అనూహ్యంగా జట్టులో స్థానం లభించింది. అయితే, సెమీస్‌లో కేవలం 10 పరుగులకే ఔటై నిరాశపరిచింది. ఆ వైఫల్యం ఆమెలో కసిని పెంచింది. దక్షిణాఫ్రికాతో జరిగిన ఫైనల్లో తన అసలు సిసలైన విధ్వంసం చూపించింది. వర్షం కారణంగా రెండు గంటలు ఆలస్యంగా ప్రారంభమైన మ్యాచ్‌లో, ఆకాశమే హద్దుగా చెలరేగింది. కేవలం 49 బంతుల్లోనే అర్ధ శతకం పూర్తి చేసి, భారత ఇన్నింగ్స్‌కు బలమైన పునాది వేసింది.

ప్రపంచ రికార్డు బద్దలు :ఈ మెరుపు ఇన్నింగ్స్‌తో షఫాలీ వర్మ ప్రపంచ క్రికెట్‌లో ఎవరికీ సాధ్యం కాని రికార్డును తన పేరిట లిఖించుకుంది. 21 సంవత్సరాల 278 రోజుల వయసులో, ప్రపంచ కప్ ఫైనల్ చరిత్రలో (పురుషులు, మహిళల విభాగాల్లో కలిపి) హాఫ్ సెంచరీ సాధించిన అతి పిన్న వయస్కురాలైన క్రికెటర్‌గా ఆమె ప్రపంచ రికార్డు సృష్టించింది. అంతేకాదు, వన్డే ప్రపంచ కప్ ఫైనల్లో అర్ధ శతకం బాదిన మూడో భారత ఓపెనర్‌గానూ నిలిచింది. గతంలో 2003లో వీరేంద్ర సెహ్వాగ్, 2017లో పూనమ్ రౌత్ మాత్రమే ఈ ఘనత సాధించారు.

మూడేళ్ల నిరీక్షణకు తెర.. నాన్నకు ఇచ్చిన మాట కోసం :ఈ ఇన్నింగ్స్ షఫాలీ కెరీర్‌కు ఎంతో కీలకం. దాదాపు మూడేళ్ల (జూలై 2022) సుదీర్ఘ విరామం తర్వాత ఆమె వన్డేల్లో నమోదు చేసిన తొలి అర్ధ శతకం ఇది. సెంచరీకి చేరువలో, 78 బంతుల్లో 7 ఫోర్లు, 2 సిక్సర్లతో 87 పరుగుల వద్ద ఆమె ఔటైనప్పటికీ, జట్టుకు అవసరమైన పరుగుల వరద పారించింది. సెమీస్‌లో విఫలమైనప్పుడు తన తండ్రికిచ్చిన మాటను నిలబెట్టుకుంది. సెంచరీ చేయలేకపోయినా, తన చరిత్రాత్మక ఇన్నింగ్స్‌తో తండ్రి కళ్లలో ఆనందాన్ని, దేశ ప్రజల గుండెల్లో గర్వాన్ని నింపింది.