Shubhman Gill: ఇంగ్లాండ్‌తో జరుగుతున్న ఐదు టెస్టుల సిరీస్‌లో భారత యువ కెప్టెన్ శుభ్‌మన్ గిల్ తన బ్యాటింగ్‌తో శభాష్ అనిపించుకుంటున్నాడు. తొలి సారి భారత జట్టుకు సారథ్యం వహిస్తున్న గిల్ తన నాయకత్వం కంటే ఎక్కువగా తన బ్యాటుతోనే అభిమానులను ఆకట్టుకుంటున్నాడు. ఇప్పటికే నాలుగు శతకాలు బాదిన గిల్, మొత్తం 722 పరుగులు సాధించి రికార్డుల తాలూకే లిస్టులోకి ఎక్కాడు.
దిగ్గజాల రికార్డులను…
ఈ గణాంకాలు అతడిని కేవలం ఈ సిరీస్‌లోనే కాకుండా, మొత్తం టెస్టు చరిత్రలో నిలిచిపోయేలా చేస్తున్నాయి. ఐదు టెస్టుల్లో ఈ స్థాయిలో పరాక్రమం చూపిన భారత ఆటగాళ్లు అరుదే. ప్రస్తుతం గిల్ తన బ్యాటుతో మరిన్ని పురాణ గణాంకాలపై కన్నేశాడు. ముఖ్యంగా భారత దిగ్గజం సునీల్ గావస్కర్, ఆస్ట్రేలియా లెజెండ్ డాన్ బ్రాడ్మన్ లాంటి దిగ్గజాల రికార్డులను చేరగలదన్న ఆసక్తికరమైన అవకాశాలు ఈ టెస్టులో ఉన్నాయి.
ఇంకా 53 పరుగులే…
1971లో వెస్టిండీస్‌పై గావస్కర్ బాదిన 774 పరుగులు ఇప్పటికీ భారత ఆటగాడిగా ఓ టెస్టు సిరీస్‌లో అత్యధిక స్కోరుగా నిలిచాయి. గిల్ ఆ రికార్డును అధిగమించాలంటే ఇంకా 53 పరుగులు చేయాల్సి ఉంది. గిల్ ఫామ్ చూస్తుంటే ఇది సాధ్యమేనన్న నమ్మకాన్ని కలిగిస్తోంది.
ఇక టెస్ట్ చరిత్రలోనే అత్యధిక పరుగులు చేసిన బ్యాటర్‌గా డాన్ బ్రాడ్మన్ నిలిచారు. ఆయన 1930లో ఇంగ్లాండ్‌తో జరిగిన యాషెస్ సిరీస్‌లో 974 పరుగులు బాదారు. గిల్ ఆ రికార్డును చేరాలంటే ఇంకొన్ని వందల పరుగులు చేయాల్సి ఉంటుంది. ఇది సవాలే అయినా, ఒక డబుల్ సెంచరీతోనే సమీకరణాలు మారిపోతాయి.
సరికొత్త చరిత్రకే నాంది…
తదుపరి ఆసక్తికర గణాంకం… ఒక్క టెస్టు సిరీస్‌లో అత్యధిక సెంచరీలు సాధించిన ఆటగాడు విండీస్‌కు చెందిన క్లైడ్ వాల్కట్. ఆయన 1955లో ఆస్ట్రేలియాపై ఐదు సెంచరీలు బాదాడు. ఇప్పుడు గిల్ నాలుగు శతకాలతో ఉన్నాడు. ఐదో టెస్టులో ఇంకో శతకం బాదితే, క్లైడ్ రికార్డును సమం చేయనున్నాడు. రెండు ఇన్నింగ్స్‌లోనూ సెంచరీ చేస్తే మాత్రం సరికొత్త చరిత్రకే నాంది పలికినట్టే.
ఒక కెప్టెన్‌గా టెస్టు సిరీస్‌లో అత్యధిక సెంచరీలు సాధించిన జాబితాలో గిల్ ఇప్పటికే బ్రాడ్మన్, గావస్కర్ సరసన నిలిచాడు. బ్రాడ్మన్ 1947లో ఇంగ్లాండ్‌పై, గావస్కర్ 1978లో విండీస్‌పై నాలుగేసి సెంచరీలు బాదారు. గిల్ ఐదో టెస్టులో మరో శతకం సాధిస్తే ఈ జాబితాలో అగ్రస్థానానికి చేరతాడు.
ఇదే కాకుండా, గిల్ తన అత్యధిక వ్యక్తిగత స్కోరు 269 పరుగులు. ఇది ఒక కెప్టెన్‌గా వచ్చిన మైలురాయిగా భావించవచ్చు. ఇలా వరుసగా పెరుగుతున్న ఫారంతో అతడు భారత క్రికెట్‌లో కొత్త అధ్యాయాలను రాయాలని అభిమానులు ఆశిస్తున్నారు.
భారత క్రికెట్‌లో గిల్ స్థానం ఇప్పటివరకు ఓ భవిష్యత్ స్టార్‌గా పేర్కొనబడింది. కానీ ఇప్పుడు అతడు తన ఆటతీరుతో భవిష్యత్తును వేగంగా ఇప్పుడు నుంచే ఆక్రమించుకుంటున్నాడు. కెప్టెన్సీ భాద్యతను భుజాలపై వేసుకున్న గిల్, ఆ ఒత్తిడిని అవకాశంగా మలచుకుంటూ చరిత్రను తిరగరాస్తున్నాడు.
గిల్ కొత్త రికార్డులు…
ఐదో టెస్టు ఓవల్‌లో జరగనుంది. అక్కడ గిల్ బ్యాటింగ్‌ చేస్తే, చరిత్ర సాక్షిగా నిలిచే అవకాశాలు స్పష్టంగా కనిపిస్తున్నాయి. ఒక్క ఇన్నింగ్స్‌ లో శతకం, లేదా డబుల్ సెంచరీ సాధించినా – గిల్ కొత్త రికార్డులు సృష్టించినట్లే.ఈ ఏడాది ఆరంభంలో భారత కెప్టెన్‌గా బాధ్యతలు తీసుకున్న గిల్ ఇప్పటికిప్పుడు ప్రపంచ క్రికెట్ దృష్టిని ఆకర్షించాడు. అతడి ఆటతీరు యువతకు ప్రేరణగా మారుతోంది. పెద్ద ఆటగాళ్లను మించిన మెరుపులు చూపిన గిల్, టెస్టు క్రికెట్‌కు కొత్త ఊపును తీసుకువచ్చాడు.
ఇంతమంది దిగ్గజాల మధ్య నిలిచే స్థాయికి రావడం యాదృచ్ఛికంగా కాదు. గిల్ తన ఫిట్‌నెస్, టెక్నిక్, సహనంతోనే ఈ స్థాయికి చేరుకున్నాడు. తను విజయాలను చిన్నచూపు చూడకుండా, నిరంతరం మెరుగుదల వైపు దృష్టిపెడుతున్నాడు. ఇప్పుడు ఐదో టెస్టులో గిల్ నుంచి రికార్డు స్థాయి ఆట ఆశించాల్సిందే.
