ఇంగ్లండ్ (England) తో నువ్వా నేనా అనేలా సాగిన.. రెండో టీ-20లో(2nd T20) టీమిండియా విజయం సాధించింది. చెన్నై వేదికగా జరిగిన ఈ మ్యాచ్ లో 2 వికెట్ల తేడాతో ఉత్కంఠ విజయాన్ని అందుకుంది. దీంతో 5 మ్యాచ్ ల సిరీస్ లో 2-0 ఇండియా (India) ఆధిక్యంలో నిలిచింది. చెన్నై టీ-20లో ఓ దశలో టీమిండియాకు ఓటమి తప్పదని అంతా భావించారు.. అయితే తిలక్ వర్మ (Tilak Varma) ఒంటిచేత్తో భారత్‌ను విజయతీరాలకు చేర్చాడు. చివరి ఓవర్‌లో ఫోర్ కొట్టి జట్టుకు విజయాన్ని అందించాడు. తిలక్ (Tilak Varma) 55 బంతుల్లో 72 పరుగుల అజేయ ఇన్నింగ్స్ ఆడి భారత్‌ను గెలిపించాడు.
ఈ మ్యాచ్ లో తొలుత బ్యాటింగ్ చేసిన ఇంగ్లాండ్ జట్టు నిర్ణీత 20 ఓవర్లలో 9 వికెట్ల నష్టానికి 165 పరుగులు చేసింది. 166 పరుగుల లక్ష్యంతో బరిలోకి దిగిన భారత్ మరో 4 బంతులు ఇంకా మిగిలి ఉండగానే విజయం సాధించింది. అయితే చేధనలో ముందు భారత్ తడబడింది. 10 ఓవర్లకే సగం వికెట్లు కోల్పోయి కష్టాల్లో పడింది. సంజు శాంసన్ 5 పరుగులు, అభిషేక్ శర్మ 12 పరుగులు, సూర్య కుమార్ యాదవ్ 12, దృవ్ జురెల్ 4, హార్థిక్ పాండ్య 7, అక్షర్ పటేల్ 2, వాషింగ్టన్ సుందర్ 26, అర్ష్దీప్ సింగ్ 6 పరుగులతో నిరాశ పరిచారు.
అయితే టీమిండియా యంగ్ ప్లేయర్.. తిలక్ వర్మ (Tilak Varma) విజృంభించి ఆడడంతో భారత్ స్కోర్ బోర్డ్ పరుగులు పెట్టింది. 39 బంతుల్లోనే హాఫ్ సెంచరీ ఫూర్తి చేసి ప్రత్యర్థి బౌలర్లకు చుక్కలు చూపించాడు. తిలక్ వర్మ 55 బంతుల్లో 4 ఫోర్లు, 5 సిక్సులతో విరుచుకుపడి 72 పరుగులతో టాప్ స్కోరర్ గా నిలిచాడు. అతనికి తోడు.. రవి బిష్ణోయ్ కీలక సమయంలో జట్టుకు అండగా నిలిచాడు.
అంతకుముందు భారత్ టాస్ గెలిచి ఇంగ్లండ్‌ను బ్యాటింగ్‌కు ఆహ్వానించగా.. ఈ మ్యాచ్ లో కూడా ఇంగ్లండ్‌కు శుభారంభం లభించలేదు. అయితే బట్లర్ మరోసారి జట్టును కష్టాల నుంచి గట్టెక్కించి 30 బంతుల్లో రెండు ఫోర్లు, మూడు సిక్సర్ల సాయంతో 45 పరుగులు చేశాడు. మరోవైపు బ్రైడెన్ కార్స్ 17 బంతుల్లో ఒక ఫోర్ , మూడు సిక్సర్ల సహాయంతో 31 పరుగుల ఇన్నింగ్స్ ఆడాడు. దీని కారణంగా ఇంగ్లాండ్ 20 ఓవర్లలో 9 వికెట్లకు 165 పరుగులు చేయడంలో విజయవంతమైంది. భారత్ తరపున అక్షర్ పటేల్, వరుణ్ చక్రవర్తి తలో 2 వికెట్లు తీశారు. అర్ష్దీప్ సింగ్, హార్దిక్‌ పాండ్యా, వాషింగ్టన్ సుందర్, అభిషేక్ శర్మలు తలో వికెట్‌ తీశారు. ఈ విజయంతో సిరీస్ పై భారత్ ఆధిక్యం సాధించింది. ఈ నెల 28న రాజ్‌కోట్‌లో భారత్, ఇంగ్లండ్ జట్ల మధ్య మూడో టీ20 మ్యాచ్ జరగనుంది.
