శ్రీలంకతో జరుగుతున్న తొలి టెస్టు మ్యాచ్‌లో ఆస్ట్రేలియా(SL vs AUS) జట్టు అదరగొట్టింది. తొలి ఇన్నింగ్స్‌లో 654/6 పరుగులు వద్ద డిక్లేర్డ్ చేసింది. ఖవాజా(232), స్టీవ్ స్మిత్ (141), జోస్ ఇంగ్లిష్ (102) సెంచ‌రీల‌తో చెల‌రేగగా.. ట్రావిస్ హెడ్ (57) అర్థ సెంచ‌రీతో రాణించాడు. శ్రీలంక బౌల‌ర్ల‌లో ప్ర‌భాస్ జ‌య‌సూర్య మూడు వికెట్లు.. జెఫ్రీ వాండర్సే రెండు వికెట్లు పడ‌గొట్టారు. అనంతరం బ్యాటింగ్ ప్రారంభించిన శ్రీలంక మూడు వికెట్లు కోల్పోయి 44 పరుగులు చేసింది. ప్రస్తుతం క్రీజులో దినేష్‌ చండిమల్(9), కమిందు మెండిస్(13) ఉన్నారు.
ఇక తొలి ఇన్నింగ్స్‌లో ఆసీస్ ఓపెనర్ ఉస్మాన్ ఖావాజా(Usman Khawaja) అద్భుతమైన ఆటతో దుమ్మురేపాడు. 16 ఫోర్లు, ఓ సిక్సర్ సాయంతో 232 పరుగులు చేశాడు. దీంతో 147 ఏళ్ల టెస్టు క్రికెట్ చ‌రిత్ర‌లో శ్రీలంక గడ్డపై డబుల్ సెంచరీ చేసిన తొలి ఆస్ట్రేలియా ఆటగాడిగా చరిత్ర సృష్టించాడు. ఇప్ప‌టివ‌ర‌కు లంక గడ్డపై అత్య‌ధిక పరుగులు చేసిన ఆస్ట్రేలియన్ బ్యాటర్‌గా జ‌స్టిన్ లాంగ‌ర్ ఉండేవాడు. 2004లో కొలంబో వేదిక‌గా జ‌రిగిన మ్యాచ్‌లో లాంగ‌ర్ 166 పరుగులు సాధించాడు. తాజాగా లాంగ‌ర్ రికార్డును ఖవాజా బ్రేక్ చేశాడు. ఇక తర్వాతి స్థానాల్లో డామిన్ మార్టిన్‌, లెహ్‌మ‌న్‌, స్టీవ్ స్మిత్ ఉన్నారు.
