టీమిండియా స్టార్ ఆట‌గాడు విరాట్ కోహ్లీ(Virat Kohli) ఇటీవల ఫామ్ లేమితో ఇబ్బంది పడుతున్న సంగతి తెలిసిందే. ఆస్ట్రేలియా, న్యూజిలాండ్ జట్లతో జరిగిన టెస్టు సిరీస్‌లలో భారత ఆటగాళ్లు ఘోరంగా విఫలం కావడంతో బీసీసీఐ కొత్త నిబంధలను తీసుకొచ్చింది. ఈ నిబంధనల ప్రకారం స్టార్ ఆటగాళ్లంతా తప్పకుండా రంజీ ట్రోపీ ఆడాలి. దీంతో 12 ఏళ్ల తర్వాత కోహ్లీ ఢిల్లీ తరపున రంజీ మ్యాచ్ ఆడుతున్నాడు. ఢిల్లీలోని అరుణ్ జైట్లీ స్టేడియం వేదికగా ఢిల్లీ, సౌరాష్ట్ర జ‌ట్ల మ‌ధ్య మ్యాచ్ జరుగుతోంది.
ప్రేక్ష‌కులు మ్యాచ్‌ను ఉచితంగా చూసేందుకు ఢిల్లీ క్రికెట్ సంఘం అవ‌కాశం క‌ల్పించడంతో కోహ్లీని చూసేందుకు ప్రేక్ష‌కులు పెద్ద సంఖ్య‌లో త‌ర‌లివ‌చ్చారు. ఈ క్రమంలో స్వల్ప తోపులాట జరిగింది. కోహ్లీ, ఆర్‌సీబీ నామ‌స్మ‌ర‌ణంతో స్టేడియం ద‌ద్ద‌రిల్లిపోతుంది. ఈ నేపథ్యంలో ఓ అభిమాని సెక్యూరిటీ క‌ళ్లు గ‌ప్పి మైదానంలోకి దూసుకువెళ్లాడు. నేరుగా విరాట్ కోహ్లీ వ‌ద్ద‌కు ప‌రిగెత్తుకుంటూ వెళ్లి అత‌డి కాళ్ల‌పై ప‌డ్డాడు. వెంట‌నే అప్ర‌మ‌త్త‌మైన సిబ్బంది అభిమానిని మైదానం బ‌య‌ట‌కు తీసుకువెళ్లారు. ఈ ఘ‌ట‌న‌తో మ్యాచ్‌కు కాసేపు అంత‌రాయం ఏర్ప‌డింది. ఇందుకు సంబంధించిన వీడియోలు సోషల్ మీడియాలో వైరల్ అవుతున్నాయి. ఇక ఈ మ్యాచ్‌ను జియో సినిమా ప్ర‌త్య‌క్ష ప్ర‌సారం చేస్తోంది.
