2026 Hyundai Venue launch : కాంపాక్ట్ ఎస్‌యూవీ సెగ్మెంట్‌లో సంచలనం సృష్టించిన హ్యుందాయ్ వెన్యూ, ఇప్పుడు సరికొత్త అవతారంలో, మరింత శక్తివంతంగా, ప్రీమియం ఫీచర్లతో మన ముందుకు రాబోతోంది. రెండో తరం  2026 వెన్యూను హ్యుందాయ్ అధికారికంగా ఆవిష్కరించింది. నవంబర్ 4న లాంచ్ కానున్న ఈ ఎస్‌యూవీకి, కేవలం రూ.25,000 టోకెన్ మొత్తంతో బుకింగ్స్‌ను కూడా ప్రారంభించింది. అసలు పాత వెన్యూతో పోలిస్తే, ఈ కొత్త మోడల్‌లో వచ్చిన భారీ మార్పులేంటి..? దీని డిజైన్, ఫీచర్లు పోటీదారులకు ఎలాంటి గట్టి పోటీ ఇవ్వనున్నాయి..?

2019లో భారత మార్కెట్లోకి అడుగుపెట్టినప్పటి నుంచి, వెన్యూ కాంపాక్ట్ ఎస్‌యూవీ సెగ్మెంట్‌లో ఓ ట్రెండ్‌సెట్టర్‌గా నిలిచింది. ఇప్పటివరకు 7 లక్షలకు పైగా యూనిట్లను విక్రయించి, వినియోగదారుల ఆదరణను చూరగొంది. ఈ విజయాన్ని కొనసాగించేందుకు, ‘టెక్ అప్, గో బియాండ్’ అనే నినాదంతో, హ్యుందాయ్ ఇప్పుడు రెండో తరం వెన్యూను తీసుకువస్తోంది.

డిజైన్‌లో భారీ మార్పులు.. మరింత కండలు తిరిగిన రూపం : 2026 వెన్యూ, పాత మోడల్‌తో పోలిస్తే మరింత పెద్దదిగా, కండలు తిరిగిన రూపంతో ఆకట్టుకుంటోంది.
పెరిగిన కొలతలు: పాత మోడల్ కంటే పొడవు, వెడల్పు, ఎత్తు పెరిగాయి. వీల్‌బేస్‌ను కూడా 20 మి.మీ. పెంచారు.
కొత్త లుక్: ముందు భాగంలో క్వాడ్-బీమ్ ఎల్ఈడీ హెడ్‌ల్యాంప్స్, డార్క్ క్రోమ్ గ్రిల్, వెనుక భాగంలో హారిజోన్-స్టైల్ బ్రిడ్జ్డ్ ఎల్ఈడీ టెయిల్‌ల్యాంప్స్‌తో సరికొత్తగా కనిపిస్తోంది.
ఎస్​యూవీ స్టాన్స్: పెద్ద వీల్ ఆర్చులు, మజిక్యులర్ బాడీ ప్యానెల్స్ దీనికి పూర్తిస్థాయి ‘బిగ్ ఎస్‌యూవీ’ లుక్‌ను అందిస్తున్నాయి.

లోపల లగ్జరీ.. ఫీచర్ల జాతర : బయటికే కాదు, లోపల కూడా వెన్యూ పూర్తిగా మారిపోయింది. ప్రీమియం సెగ్మెంట్ కార్లకు దీటుగా ఫీచర్లను జోడించారు.
పనోరమిక్ డిస్‌ప్లే: డ్యాష్‌బోర్డుపై రెండు 12.3-అంగుళాల కర్వ్డ్ పనోరమిక్ డిస్‌ప్లేలు (ఒకటి ఇన్ఫోటైన్‌మెంట్, మరొకటి డిజిటల్ క్లస్టర్ కోసం) ప్రధాన ఆకర్షణగా నిలుస్తున్నాయి.
ప్రీమియం ఫీచర్లు: పనోరమిక్ సన్‌రూఫ్, వెంటిలేటెడ్ ఫ్రంట్ సీట్లు, 8-స్పీకర్ బోస్ ఆడియో సిస్టమ్, డ్యూయల్-జోన్ క్లైమేట్ కంట్రోల్, యాంబియంట్ లైటింగ్ వంటి లగ్జరీ ఫీచర్లు ఉన్నాయి.

వెనుక సీట్లలో సౌకర్యం: పెరిగిన వీల్‌బేస్ వల్ల, వెనుక ప్రయాణికులకు లెగ్‌రూమ్ పెరిగింది. వారికి ప్రత్యేకంగా ఏసీ వెంట్స్, సన్‌షేడ్స్, 2-స్టెప్ రిక్లైనింగ్ ఫంక్షన్ వంటివి అందించారు.

భద్రతలోనూ ముందంజ.. లెవెల్-2 ఆదాస్ : భద్రత విషయంలోనూ హ్యుందాయ్ రాజీ పడలేదు, ప్రస్తుత మోడల్‌లోని లెవెల్-1 ADAS (అడ్వాన్స్‌డ్ డ్రైవర్ అసిస్టెన్స్ సిస్టమ్స్)కు అదనంగా, కొత్త వెన్యూలో లెవెల్-2 ADAS ఫీచర్లను అందిస్తున్నారు. అడాప్టివ్ క్రూయిజ్ కంట్రోల్, బ్లైండ్ స్పాట్ కొలిజన్ వార్నింగ్, ఫ్రంట్ పార్కింగ్ సెన్సార్లు, 360-డిగ్రీ కెమెరా వంటివి ఇందులో భాగం.

ఇంజిన్ ఆప్షన్లు : కొత్త వెన్యూలో 1.2-లీటర్ పెట్రోల్, 1.0-లీటర్ టర్బో పెట్రోల్, 1.5-లీటర్ డీజిల్ ఇంజిన్ ఆప్షన్లు అందుబాటులో ఉంటాయి. మాన్యువల్, ఆటోమేటిక్, 7-స్పీడ్ డీసీటీ గేర్‌బాక్స్‌లతో ఇవి జతచేయబడతాయి. సరికొత్త డిజైన్, అత్యాధునిక ఫీచర్లతో వస్తున్న ఈ రెండో తరం వెన్యూ, కాంపాక్ట్ ఎస్‌యూవీ సెగ్మెంట్‌లో మళ్లీ తన ఆధిపత్యాన్ని నిలబెట్టుకోవడం ఖాయమని ఆటోమొబైల్ నిపుణులు అభిప్రాయపడుతున్నారు.