Budget MacBook launch: టెక్ ప్రపంచంలో ఇప్పుడు ఎక్కువగా వినిపిస్తున్న పేరు ఆపిల్ (Apple). తమ చరిత్రలోనే అతి తక్కువ ధర మాక్‌బుక్‌ను తీసుకురావడానికి కంపెనీ రెడీ అవుతోందన్న వార్తలు బలంగా వినిపిస్తున్నాయి. ఈ కొత్త మాక్‌బుక్ మార్చ్ నెలలో జరిగే ప్రత్యేక ఈవెంట్‌లో ప్రకటించే అవకాశం ఉంది. ఇప్పటివరకు మాక్ అంటే ఖరీదైన ల్యాప్‌టాప్ అన్న ఇమేజ్ ఉండేది. ఇప్పుడు మాత్రం స్టూడెంట్స్, డైలీ యూజర్స్, కొత్తగా ఆపిల్ ఎకోసిస్టమ్‌లోకి రావాలనుకునే వాళ్లను టార్గెట్ చేస్తూ ఈ మోడల్ డిజైన్ చేసినట్టు తెలుస్తోంది.

ఐఫోన్ చిప్‌తో మాక్… ఇదే పెద్ద మార్పు

ఈ మాక్‌బుక్‌లో మాక్‌లకు వాడే సాధారణ చిప్ కాకుండా, iPhone 16 సిరీస్‌లో వచ్చిన A18 ప్రో చిప్ ఉండబోతోంది. ఈ చిప్ పర్‌ఫార్మెన్స్ పరంగా మొదటి తరం M1కి చాలా దగ్గరగా ఉందని టెక్ వర్గాలు చెబుతున్నాయి. అంటే వెబ్ బ్రౌజింగ్, డాక్యుమెంట్స్, వీడియో స్ట్రీమింగ్, లైట్ ఎడిటింగ్ లాంటి రోజువారీ పనులకి తగినంత స్పీడ్ వస్తుంది. హెవీ గ్రాఫిక్స్ వర్క్ చేయాలనుకునేవాళ్ల కోసం ఇది కాదు, కానీ సాధారణ యూజర్‌కు మాత్రం పూర్తి సంతృప్తి ఇచ్చే లెవెల్‌లో ఉంటుంది.

డిస్‌ప్లే, డిజైన్ ఎలా ఉండొచ్చు

లీక్స్ ప్రకారం ఈ మాక్‌బుక్‌లో దాదాపు 12.9 ఇంచెస్ డిస్‌ప్లే ఉంటుంది. ప్రస్తుతం ఉన్న MacBook Air కంటే ఇది కొంచెం చిన్న సైజ్. ధర తగ్గించడానికి ప్లాస్టిక్ బాడీ వాడతారన్న వార్తలు వచ్చినా, ఆపిల్ మాత్రం అల్యూమినియం బాడీనే కొనసాగించబోతోందట. అయితే ఖర్చు తగ్గించేందుకు కొత్త అల్యూమినియం షెల్ తయారీ ప్రాసెస్‌ను ఉపయోగిస్తారని సమాచారం. దీని వల్ల ప్రీమియం ఫీల్ అలాగే ఉంటుంది, ధర మాత్రం కంట్రోల్‌లో ఉంటుంది.

కలర్‌ఫుల్ మాక్ ఇదే

డిజైన్ పరంగా లైట్ యెల్లో, లైట్ గ్రీన్, బ్లూ, పింక్, సిల్వర్, డార్క్ గ్రే లాంటి కలర్స్ టెస్టింగ్‌లో ఉన్నాయట. ఇవన్నీ ఫైనల్ ప్రొడక్ట్‌లో వస్తే, ఇటీవలి కాలంలో ఆపిల్ నుంచి వచ్చిన అత్యంత కలర్‌ఫుల్ మాక్ ఇదే అవుతుంది.

స్పెసిఫికేషన్స్ ఏమేమి రావచ్చంటే

ఇప్పటివరకు వచ్చిన లీక్స్ ఆధారంగా చూస్తే, ఈ కొత్త మాక్‌బుక్‌లో A18 ప్రో చిప్‌తో పాటు 8 జి బి ర్యామ్ స్టార్టింగ్ వేరియంట్‌గా ఉండే అవకాశం ఉంది. స్టోరేజ్ 2 5 6 జి బి నుంచి మొదలయ్యే ఛాన్స్ ఉంది. వైఫై 6 ఈ, బ్లూటూత్ లేటెస్ట్ వెర్షన్ సపోర్ట్ ఉంటుందని అంచనా. పోర్ట్స్ విషయంలో యూ ఎస్ బి టైప్ సీ రెండు ఇవ్వొచ్చని సమాచారం. కెమెరా ఫ్రంట్‌లో ఫుల్ హెచ్ డీ వెబ్‌క్యామ్ వచ్చే అవకాశం ఉంది, ఇది ఆన్‌లైన్ క్లాసులు, వీడియో కాల్స్ చేసే వాళ్లకు ఉపయోగపడుతుంది.

Read Also: Maha Shivaratri: ఉపవాసం, జాగరణ చేయలేకపోయారా? ఈ చిన్న మార్పులతో శివకృప పొందండి

బ్యాటరీ బ్యాక్‌అప్ ఎలా ఉంది

A18 ప్రో చిప్ పవర్ ఎఫిషియెన్సీ చాలా బాగుంటుందని ఇప్పటికే ఐఫోన్‌లో చూసాం. అదే చిప్ ల్యాప్‌టాప్‌లో వాడితే బ్యాటరీ లైఫ్ మరింత మెరుగ్గా ఉండే అవకాశం ఉంది. లీక్స్ ప్రకారం ఒకసారి ఫుల్ ఛార్జ్ చేస్తే సాధారణ యూజ్‌లో దాదాపు 1 2 గంటల నుంచి 1 4 గంటల వరకు బ్యాటరీ రావొచ్చని అంచనా. అంటే కాలేజ్ స్టూడెంట్స్, ఆఫీస్ వర్క్ చేసే వాళ్లకు రోజంతా ఛార్జర్ అవసరం లేకుండా ఉపయోగించుకునే అవకాశం ఉంటుంది.

అమెరికా ధర, ఇండియా ధర అంచనా

అమెరికాలో $699గా ఉన్న ఈ మాక్‌బుక్, ఇండియాలో లాంచ్ అయితే సుమారు రూ.58,000 కన్వర్షన్ వస్తుంది. కానీ జి ఎస్ టి, ఇంపోర్ట్ డ్యూటీ కలిపితే ఫైనల్ ప్రైస్ దాదాపు రూ.65,000 నుంచి రూ.70,000 మధ్య ఉండే అవకాశం ఉంది. అయినా కూడా ఇది ఇప్పటి మాక్‌బుక్ ఎయిర్‌తో పోలిస్తే చాలా తక్కువ ధరే.

ఇండియా లాంచ్ టైమ్‌లైన్ ఏమిటి

మార్చ్‌లో గ్లోబల్ లాంచ్ జరిగితే, ఇండియాలో ఈ మాక్‌బుక్ ఏప్రిల్ చివరి వారం లేదా మే మొదటి వారం నుంచి అమ్మకాలు మొదలయ్యే అవకాశం ఉందని టెక్ వర్గాలు అంచనా వేస్తున్నాయి. ఆపిల్ సాధారణంగా గ్లోబల్ లాంచ్ అయిన 3 నుంచి 5 వారాల్లో ఇండియా మార్కెట్‌లో ప్రొడక్ట్ తీసుకువస్తుంది. అదే ప్యాటర్న్ ఫాలో అయితే, వేసవి సెలవుల టైమ్‌కే ఈ కొత్త మాక్‌బుక్ ఇండియాలో అందుబాటులోకి రావొచ్చు.

ఎవరి కోసం ఈ మాక్‌బుక్

ఈ మోడల్ ప్రధానంగా స్టూడెంట్స్, డైలీ ఆఫీస్ వర్క్ చేసే వాళ్లు, ఇంట్లో సాధారణ యూజ్ కోసం ల్యాప్‌టాప్ కావాలనుకునే వాళ్ల కోసం. ఇప్పటికే ఐఫోన్, ఐప్యాడ్ వాడుతున్న వాళ్లకు ఇది మంచి అడాన్ అవుతుంది. ఖరీదు కారణంగా ఇప్పటివరకు మాక్ కొనలేకపోయిన చాలామందికి ఇది నిజమైన ఎంట్రీ పాయింట్ అవుతుంది.

ఇదంతా లీక్ ఆధారిత సమాచారం మాత్రమే..

ఐఫోన్ A18 ప్రో చిప్‌తో వచ్చే ఈ చీపెస్ట్ మాక్‌బుక్ ఆపిల్ స్ట్రాటజీలో పెద్ద మలుపుగా మారే అవకాశం ఉంది. రూ.65,000 నుంచి రూ.70,000 రేంజ్‌లో ఇండియాలో లాంచ్ అయితే, స్టూడెంట్స్ నుంచి హోమ్ యూజర్స్ వరకు పెద్ద సంఖ్యలో కొత్త యూజర్స్ మాక్ వైపు వచ్చే ఛాన్స్ ఉంది. మార్చ్ ఈవెంట్ తర్వాత అసలు స్పెసిఫికేషన్స్ బయటకు వస్తాయి, అప్పటివరకు ఇదంతా లీక్ ఆధారిత సమాచారం మాత్రమే. కానీ ఒక్కటి మాత్రం ఖాయం… ఈ మాక్‌బుక్ ల్యాప్‌టాప్ మార్కెట్‌లో పెద్ద హడావుడి సృష్టించబోతోంది.