BAZAZ TWO WHEELER : భారత ద్విచక్ర వాహన మార్కెట్‌లో తన పట్టును మరింత బలోపేతం చేసుకోవడానికి బజాజ్ ఆటో సరికొత్త వ్యూహంతో ముందుకు వస్తోంది. మోటార్‌సైకిల్ అమ్మకాల క్షీణతను అధిగమించే లక్ష్యంతో, అత్యంత చౌకైన ఎంట్రీ-లెవల్ 125సీసీ బైక్‌ను త్వరలో మార్కెట్‌లోకి తీసుకురావడానికి బజాజ్ సన్నాహాలు చేస్తోంది. ఈ కొత్త మోడల్ ధర రూ.85,000 కంటే తక్కువగానే, బహుశా రూ.80,000 లోపే ఉండవచ్చని ఊహాగానాలు వినిపిస్తున్నాయి. ఇది నిజంగా బైక్ ప్రియులకు శుభవార్త అని చెప్పొచ్చు.
బజాజ్ కొత్త వ్యూహం, 125సీసీ సెగ్మెంట్‌తో మార్కెట్‌పై పట్టు…
గడిచిన ఏడాది అమ్మకాలు తగ్గినప్పటికీ, బజాజ్ ఆటో వెనకడుగు వేయలేదు. 125సీసీ+ సెగ్మెంట్‌పై పూర్తి దృష్టి సారించి, తమ మార్కెట్ వాటాను పెంచుకోవాలని లక్ష్యంగా పెట్టుకుంది. 2024 ఆర్థిక సంవత్సరంలో 26% మార్కెట్ షేర్‌తో ఇప్పటికే బజాజ్ మంచి పురోగతి సాధించింది. “ఏప్రిల్ నుంచి మా అమ్మకాలు పెరిగేందుకు తగిన చర్యలు తీసుకున్నాం” అని బజాజ్ ఆటో ఎగ్జిక్యూటివ్ డైరెక్టర్ రాకేష్ శర్మ తెలిపారు. ఇది బజాజ్ మార్కెట్‌లో తిరిగి తన పూర్వ వైభవాన్ని చాటుకునేందుకు వేస్తున్న వ్యూహాత్మక అడుగుగా మార్కెట్ నిపుణులు అభిప్రాయం వ్యక్తపరుస్తున్నారు.
100సీసీ నుంచి 125సీసీకి షిఫ్ట్…
ప్రస్తుతం బజాజ్ 100సీసీ ఎంట్రీ లెవల్ బైక్‌లను అందిస్తోంది. అయితే, ఈ సెగ్మెంట్ అమ్మకాలు 2025 ఆర్థిక సంవత్సరంలో పెద్దగా వృద్ధి చెందకపోవడంతో, 125సీసీ సెగ్మెంట్‌పై దృష్టి సారించాలని కంపెనీ నిర్ణయించింది. 110-125సీసీ సెగ్మెంట్ అమ్మకాలు 13% పెరిగి 3.6 మిలియన్ యూనిట్లకు చేరాయి. ఈ విభాగంలో హోండా షైన్ మరియు పల్సర్ 125 వంటివి బెస్ట్ సెల్లర్లుగా ఉన్నాయి. ఈ పోటీలో నిలదొక్కుకోవడానికి, ప్రస్తుతం రూ.99,000, రూ.1.06 లక్షల ధరల్లో ఉన్న పల్సర్ బైక్‌ల కంటే తక్కువ ధరకే కొత్త మోడల్‌ను తీసుకురావడానికి బజాజ్ ప్రణాళికలు రచిస్తోంది.
కొత్త బైక్ సరికొత్త బ్రాండ్ నేమ్‌తో వస్తుందా లేక పల్సర్ బ్రాండ్ కింద వస్తుందా అనేది ఇంకా స్పష్టం కాలేదు. బైక్ పూర్తిగా సిద్ధమయ్యాక స్పెసిఫికేషన్స్‌ను బట్టి బ్రాండింగ్ నిర్ణయిస్తామని రాకేష్ శర్మ వెల్లడించారు. ఇదిలా ఉండగా, బజాజ్ విడుదల చేసిన ఫ్రీడమ్ 125 (ప్రపంచంలోనే మొదటి సీఎన్‌జీ బైక్) ఇప్పటికే 60,000 యూనిట్లకు పైగా అమ్ముడుపోయి మంచి విజయం సాధించింది.