Free Public Wifi Poses Threat To Personal Data: నేటి డిజిటల్ యుగంలో ఇంటర్నెట్ లేని జీవితాన్ని ఊహించుకోవడమే కష్టమని చెప్పవచ్చు. ఇంటర్నెట్‌ మన రోజువారీ అవసరంగా మారింది. పెరిగిన డేటా ఛార్జీలతో ఫ్రీ వైఫై కోసం చూస్తుంటారు చాలా మంది. బస్‌ స్టాప్‌లు, ఫాపింగ్‌ మాల్స్‌, రైల్వే స్టేషన్లు, ఎయిర్‌పోర్టులు ఇలా పబ్లిక్‌ ప్లేస్‌లో ఫ్రీ వైఫై అని చూడగానే కనెక్ట్‌ అయిపోతుంటారు. అయితే, ఇలా ఉచితంగా వస్తుందని ఫ్రీ వైఫై ఉపయోగించుకుంటే మొదటికే మోసం వస్తుందని నిపుణులు చెబుతున్నారు. ఇలా బహిరంగ ప్రదేశాల్లో ఫ్రీ వైఫైని ఉపయోగించుకోవడం వల్ల మీ ఫోన్‌కు, మీ వ్యక్తిగత సమాచారానికి అతిపెద్ద ముప్పుగా మారవచ్చని గుర్తించుకోవాలని చెబుతున్నారు. పబ్లిక్ వై-ఫై వాడకంపై భారత ప్రభుత్వ సైబర్ భద్రతా సంస్థ పౌరులను తీవ్రంగా హెచ్చరించింది. పబ్లిక్ వై-ఫై వాడేటప్పుడు చాలా జాగ్రత్తగా ఉండాలని హెచ్చరిస్తోంది. ముఖ్యంగా పండుగ రోజుల్లో రైల్వే స్టేషన్లు, మాల్స్, కాఫీ షాపుల్లో వాడే వైఫైలపై సైబర్ అటాక్‌లు జరిగే అవకాశం ఉందని.. హ్యాకర్లు మన డేటాను దొంగిలించడానికి ప్రయత్నిస్తారని చెబుతున్నారు. చిన్న పొరపాటు చేసినా, మన బ్యాంక్ వివరాలు, వ్యక్తిగత సమాచారం దొంగిలించే ప్రమాదం ఉందని గుర్తు చేస్తున్నారు. ఇటీవల యూనివర్సిటీ గ్రాంట్స్ కమిషన్ కూడా విద్యార్థులను ఉద్దేశించి ఇదే రకమైన హెచ్చరిక చేసింది. బస్ స్టాప్‌లు, రైల్వే స్టేషన్‌లు, కేఫ్‌లు, రెస్టారెంట్లు, విమానాశ్రయాలు, లైబ్రరీలలో లభించే పబ్లిక్ వై-ఫై నెట్‌వర్క్‌ల ద్వారా తమ వ్యక్తిగత లేదా కార్యాలయ ఖాతాలకు లాగిన్ కావద్దని సూచించింది. అలా చేయడం వల్ల డేటా దొంగతనం లేదా ఆర్థిక మోసం జరిగే ప్రమాదం ఉందని స్పష్టం చేసింది.

ఫ్రీ వైఫైతో కలిగే నష్టాలు ఇవే..

భద్రతా లోపం

పబ్లిక్ వై-ఫైలో మన ఇంటి వై-ఫైలో ఉన్నంత భద్రత ఉండదని టెక్‌ నిపుణులు చెబుతున్నారు.

హ్యాకర్ల బెడద

హ్యాకర్లు మనల్ని మోసం చేయడానికి ఫేక్ వై-ఫై నెట్‌వర్క్‌లను తయారు చేస్తారు. ఫేక్‌ వైఫైల భారీన పడకుండా ఉండాలంటే పబ్లిక్‌ ప్లేస్‌లో వైఫైని ఉపయోగించకూడదని చెబుతున్నారు.

డేటా చోరీకి ఛాన్స్‌
మీరు పబ్లిక్‌ వైఫై నెట్‌వర్క్‌కి కనెక్ట్ అయిన వెంటనే హ్యాకర్లు మీ ఫోన్ పాస్‌వర్డ్‌లు, బ్యాంక్ అకౌంట్ వివరాలు, ఈ-మెయిల్స్ వంటి వాటిని సులభంగా దొంగిలించే అవకాశం ఉంది.

వైరస్‌ పంపే అవకాశం

పబ్లిక్‌ వై-ఫై ద్వారా మీ ఫోన్‌లోకి వైరస్‌లను పంపడం కూడా హ్యాకర్లకు చాలా తేలిక. మీరు అలాంటి నకిలీ నెట్‌వర్క్‌కు కనెక్ట్ అయిన వెంటనే హ్యాకర్లు మీ ఫోన్ లేదా ల్యాప్‌టాప్ యొక్క పాస్‌వర్డ్‌లు, బ్యాంకింగ్ సమాచారం, ఈమెయిల్స్, ఇతర వ్యక్తిగత డేటాను దొంగిలించే అవకాశం ఉంటుంది. అంతేకాకుండా వారు ఈ నెట్‌వర్క్‌లను ఉపయోగించి మీ పరికరానికి సులభంగా వైరస్‌లను కూడా పంపే అవకాశం ఉంటుంది.

అత్యవసరమైతే ఏం చేయాలి?

అత్యవసర పరిస్థితుల్లో తప్పనిసరిగా ఇంటర్నెట్ అవసరమైతే, పబ్లిక్ వై-ఫైని ఉపయోగిస్తున్నప్పుడు వీపీఎన్‌ సేవను ఉపయోగించడం ఉత్తమం. వీపీఎన్‌ని వాడటం వలన మీ పరికరానికి అదనపు భద్రత లభిస్తుంది. కాబట్టి ఉచిత వై-ఫై సౌకర్యాన్ని పొందే తొందరలో మీ వైపు నుండి చిన్న పొరపాటు కూడా పెద్ద నష్టాన్ని కలిగిస్తుందని గుర్తించుకోవాలి.