India-Intel semiconductor collaboration : ప్రపంచ సాంకేతిక పటంలో తనదైన ముద్ర వేసేందుకు భారత్ శరవేగంగా అడుగులు వేస్తోంది. కృత్రిమ మేధ (AI), సెమీకండక్టర్ల తయారీ రంగాలలో అగ్రగామిగా నిలవాలనే లక్ష్యంతో దూసుకెళ్తున్న తరుణంలో, మరో కీలక పరిణామం చోటుచేసుకుంది. ప్రపంచ చిప్‌ల దిగ్గజం ‘ఇంటెల్’ సీఈఓతో అమెరికాలోని భారత రాయబారి ఉన్నత స్థాయి సమావేశం నిర్వహించారు. ప్రపంచమంతా ఆసక్తిగా గమనిస్తున్న ఈ భేటీ వెనుక ఉన్న వ్యూహం ఏమిటి? భారతదేశంలో ఇంటెల్ భారీ ప్రణాళికలు రచిస్తోందా? రాబోయే రోజుల్లో దేశీయ టెక్నాలజీ రంగంలో చోటుచేసుకోబోయే పెను మార్పులకు ఇది నాంది పలుకుతుందా?

సాంకేతిక స్వావలంబన దిశగా భారత ప్రభుత్వం ప్రతిష్టాత్మకంగా చేపట్టిన ‘ఇండియా సెమీకండక్టర్ మిషన్’, ‘ఇండియాఏఐ’ కార్యక్రమాలకు భారీ ఊతమిచ్చేలా, అమెరికాలోని భారత రాయబారి వినయ్ మోహన్ క్వాత్రా, ఇంటెల్ కార్పొరేషన్ ముఖ్య కార్యనిర్వహణాధికారి (CEO) లిప్ బు టాన్‌తో కీలక చర్చలు జరిపారు. నవంబర్ 8, 2025, శనివారం నాడు వర్చువల్ విధానంలో ఈ ఉన్నత స్థాయి సమావేశం జరిగింది.

భేటీలోని ముఖ్యాంశాలు: ప్రభుత్వ లక్ష్యాలతో సమన్వయం: భారతదేశంలో సెమీకండక్టర్లు, కృత్రిమ మేధ పరిశ్రమలను ప్రపంచ స్థాయికి తీసుకెళ్లాలన్న భారత ప్రభుత్వ లక్ష్యాలను ఈ సమావేశంలో ప్రధానంగా చర్చించారు. ఈ జాతీయ మిషన్లకు అనుగుణంగా భారతదేశంలో తమ కార్యకలాపాలను, భవిష్యత్ ప్రణాళికలను ఎలా విస్తరించాలన్న దానిపై ఇంటెల్  ఆలోచనలను, చొరవను లిప్ బు టాన్ వివరించినట్లు తెలుస్తోంది.

అధికారికంగా ధ్రువీకరించిన రాయబారి: ఈ సమావేశం గురించి రాయబారి వినయ్ క్వాత్రా సామాజిక మాధ్యమం ‘X’  ద్వారా అధికారికంగా వెల్లడించారు. “ఇండియా సెమీకండక్టర్ మిషన్, ఇండియాఏఐ ఆధ్వర్యంలో దేశంలో సెమీకండక్టర్, ఏఐ పరిశ్రమలను అభివృద్ధి చేయాలన్న ప్రభుత్వ లక్ష్యానికి అనుగుణంగా ఇంటెల్ ప్రణాళికలు, కార్యక్రమాలపై ఆ సంస్థ సీఈఓ శ్రీ లిప్ బు టాన్‌తో చర్చించడం ఆనందంగా ఉంది,” అని ఆయన తన పోస్టులో పేర్కొన్నారు.

కీలకమైన తరుణంలో సమావేశం: భారత్ ఒక కీలకమైన అంతర్జాతీయ సదస్సుకు ఆతిథ్యం ఇవ్వడానికి సిద్ధమవుతున్న తరుణంలో ఈ భేటీ జరగడం ప్రాధాన్యతను సంతరించుకుంది.
ప్రపంచస్థాయి ఏఐ సదస్సు: అభివృద్ధి చెందుతున్న దేశాల కూటమి అయిన ‘గ్లోబల్ సౌత్’​లో తొలిసారిగా ప్రపంచ స్థాయి ఏఐ సదస్సుకు భారత్ ఆతిథ్యం ఇవ్వనుంది. “ఇండియా-ఏఐ ఇంపాక్ట్ సమ్మిట్ 2026” పేరుతో ఈ సదస్సు వచ్చే ఏడాది ఫిబ్రవరి 19-20 తేదీల్లో దేశ రాజధాని న్యూదిల్లీలో జరగనుంది. ప్రపంచవ్యాప్తంగా టెక్ దిగ్గజాలు, నిపుణులు, విధాన రూపకర్తలు హాజరయ్యే ఈ సదస్సుకు ముందు ఇంటెల్ వంటి సంస్థతో చర్చలు జరపడం, భారతదేశం ఈ రంగంపై ఎంతటి సీరియస్​గా ఉందో తెలియజేస్తోంది.

ఈ పరిణామాలన్నీ భారతదేశాన్ని కేవలం సాంకేతిక వినియోగదారుగా కాకుండా, కీలకమైన సెమీకండక్టర్లు, ఏఐ టెక్నాలజీల రూపకర్తగా, ఉత్పత్తిదారుగా మార్చాలన్న ప్రభుత్వ సంకల్పానికి అద్దం పడుతున్నాయి. ఇంటెల్ వంటి దిగ్గజ సంస్థల భాగస్వామ్యం ఈ లక్ష్య సాధనను మరింత వేగవంతం చేస్తుందని నిపుణులు విశ్లేషిస్తున్నారు.