Apple iPhone 2026: ఆపిల్ కంపెనీ 2026లో విడుదల చేసిన కొత్త స్మార్ట్‌ఫోన్ లైనప్‌లో ఐఫోన్ 17ఇ, ఐఫోన్ 17 ఫోన్లు ప్రత్యేకంగా నిలిచాయి. ఒకటి బడ్జెట్‌కు దగ్గరగా ఉండే మోడల్ కాగా, మరొకటి పూర్తి ఫ్లాగ్‌షిప్ అనుభవం ఇచ్చే మోడల్‌గా మార్కెట్‌లోకి వచ్చింది. రెండింటిలోనూ కొత్త ఏ19 చిప్ ఉండటం వల్ల పర్‌ఫార్మెన్స్ చాలా స్పీడ్‌గా ఉంటుంది. అయితే డిస్‌ప్లే, కెమెరా, ఫీచర్లు, ధరల విషయంలో ఈ రెండు ఫోన్ల మధ్య స్పష్టమైన తేడాలు ఉన్నాయి. ఈ రెండు ఫోన్లలో ఏది కొనాలి అన్న సందేహం చాలామందికి వస్తోంది.

డిస్‌ప్లే విషయానికి వస్తే

ఐఫోన్ 17ఇలో 6.1 ఇంచుల సూపర్ రెటినా ఎక్స్‌డీఆర్ డిస్‌ప్లే ఉంది. ఇది 60Hz రిఫ్రెష్ రేట్‌తో వస్తుంది కాబట్టి సాధారణ యూజ్‌కు సరిపోతుంది. కానీ ఐఫోన్ 17లో 6.3 ఇంచుల డిస్‌ప్లేతో పాటు 120Hz ప్రోమోషన్ టెక్నాలజీ ఉంటుంది. అందువల్ల స్క్రోలింగ్, గేమింగ్, యాప్స్ ఓపెన్ చేయడం చాలా స్మూత్‌గా కనిపిస్తుంది. అలాగే 17ఇలో సాధారణ నాచ్ డిజైన్ ఉండగా ఐఫోన్ 17లో డైనమిక్ ఐలాండ్ ఉంటుంది. బ్రైట్‌నెస్ కూడా పెద్ద తేడా ఉంది. 17ఇలో 1200 నిట్స్ వరకు ఉండగా ఐఫోన్ 17లో అవుట్‌డోర్‌లో 3000 నిట్స్ వరకు బ్రైట్‌నెస్ అందుతుంది.

రెండు ఫోన్లలోనూ ఏ19 చిప్

ప్రాసెసర్ విషయంలో రెండు ఫోన్లలోనూ ఏ19 చిప్ ఉంటుంది. అయితే జీపీయూ విషయంలో తేడా ఉంది. ఐఫోన్ 17ఇలో 4 కోర్ జీపీయూ ఉండగా ఐఫోన్ 17లో 5 కోర్ జీపీయూ ఉంటుంది. అందువల్ల గేమింగ్, హెవీ యాప్స్ వాడేటప్పుడు ఐఫోన్ 17 కొంచెం మెరుగైన పర్‌ఫార్మెన్స్ ఇస్తుంది. ర్యామ్ విషయంలో కూడా తేడా ఉంది. ఐఫోన్ 17ఇలో 8GB ర్యామ్ ఉండగా ఐఫోన్ 17లో 12GB ర్యామ్ ఉంటుంది. అలాగే ఆల్వేస్ ఆన్ డిస్‌ప్లే ఫీచర్ ఐఫోన్ 17లో ఉంటుంది కానీ 17ఇలో ఉండదు.

Read Also: OnePlus Nord Buds 4 Pro: వన్‌ప్లస్ నుంచి నార్డ్ బడ్స్ 4 ప్రో.. మార్చి 19న గ్రాండ్ ఎంట్రీ

కెమెరా విషయానికి వస్తే

ఈ రెండు ఫోన్ల మధ్య పెద్ద తేడా కనిపిస్తుంది. ఐఫోన్ 17ఇలో ఒక్కటే 48MP ఫ్యూషన్ కెమెరా ఉంటుంది. ఇది 1x, 2x ఆప్టికల్ క్వాలిటీ క్రాప్ ఫోటోలు తీసేందుకు ఉపయోగపడుతుంది. కానీ ఐఫోన్ 17లో రెండు కెమెరాలు ఉంటాయి. 48MP ఫ్యూషన్ కెమెరాతో పాటు అల్ట్రా వైడ్ కెమెరా కూడా ఉంటుంది. దీని వల్ల 0.5x నుంచి 2x వరకు ఫోటోలు తీసుకోవచ్చు. మాక్రో ఫోటోగ్రఫీ కూడా సాధ్యమవుతుంది. ముందు కెమెరాలో కూడా తేడా ఉంది. ఐఫోన్ 17లో 18MP సెంటర్ స్టేజ్ కెమెరా ఉండగా 17ఇలో 12MP ట్రూడెప్త్ కెమెరా ఉంటుంది.

వీడియో సినిమాటిక్ మోడ్

వీడియో ఫీచర్లలో కూడా ఐఫోన్ 17 ముందంజలో ఉంటుంది. సినిమాటిక్ మోడ్, యాక్షన్ మోడ్ వంటి అడ్వాన్స్‌డ్ వీడియో ఫీచర్లు ఐఫోన్ 17లో ఉంటాయి. కానీ ఐఫోన్ 17ఇలో ఈ ఫీచర్లు ఉండవు. అందువల్ల వీడియోలు తీయడం, కంటెంట్ క్రియేషన్ చేయడం ఇష్టపడే వారికి ఐఫోన్ 17 మరింత ఉపయోగపడుతుంది. కెమెరా వర్సటిలిటీ పరంగా చూస్తే కూడా ఐఫోన్ 17 స్పష్టంగా మెరుగైన ఎంపికగా కనిపిస్తుంది.

ధర ఎంతంటే

ధర విషయానికి వస్తే ఐఫోన్ 17ఇ బడ్జెట్‌కు దగ్గరగా ఉండే మోడల్. 256GB స్టోరేజ్‌తో వచ్చే బేస్ మోడల్ ధర భారతదేశంలో రూ.64,900గా ఉంది. అదే ఐఫోన్ 17 256GB మోడల్ ధర రూ.82,900. ఈ రెండు ఫోన్లు భారతదేశంలో ప్రీ ఆర్డర్‌కు అందుబాటులో ఉన్నాయి. మార్చి 11, 2026 నుంచి అమ్మకాలు ప్రారంభం అవుతున్నాయి. రంగుల విషయానికి వస్తే ఐఫోన్ 17ఇ బ్లాక్, వైట్, సాఫ్ట్ పింక్ రంగుల్లో లభిస్తుంది. ఐఫోన్ 17 బ్లాక్, వైట్, మిస్ట్ బ్లూ, సేజ్, లావెండర్ రంగుల్లో వస్తుంది. మొత్తంగా చూస్తే బడ్జెట్‌లో మంచి పర్‌ఫార్మెన్స్ కావాలంటే ఐఫోన్ 17ఇ సరిపోతుంది. మంచి డిస్‌ప్లే, మెరుగైన కెమెరా, ఫ్లాగ్‌షిప్ అనుభవం కావాలంటే ఐఫోన్ 17 తీసుకోవడం మంచిది.