Samsung Galaxy Book5 Launched: శాంసంగ్ సంస్థ అదిరిపోయే ఏఐ ఫీచర్లతో సరికొత్త ల్యాప్‌టాప్‌ను భార‌త మార్కెట్‌లో విడుద‌ల చేసింది. కంపెనీ దీని శాంసంగ్ గెలాక్సీ బుక్ 5 పేరిట తీసుకొచ్చింది. ఆక‌ట్టుకునే ఏఐ ఫీచ‌ర్ల‌తో వస్తోన్న ఈ ల్యాప్‌టాప్‌ ను అత్యంత స్లిమ్‌గా రూపొందించారు. ఈ కొత్త AI-ఆధారిత ల్యాప్‌టాప్ ఇంటెల్ కోర్ అల్ట్రా 5 లేదా కోర్ అల్ట్రా 7 ప్రాసెసర్‌తో అందుబాటులో ఉంది. ఈ క్రమంలో ఈ ల్యాప్‌టాప్‌కు సంబంధించి ధర, ఆఫర్లు, ఫీచర్ల వివరాల గురించి తెలుసుకుందాం.

ధర, ఆఫర్లు:

ఇండియాలో శాంసంగ్ గెలాక్సీ బుక్ 5 బేస్ వేరియంట్ ధర రూ. 77,990గా ఉంది. శాంసంగ్ ఇండియాలో వెబ్ సైట్ సందర్శించడం ద్వారా వివిధ మోడళ్ల ధరను తనిఖీ చేయవచ్చు. ఈ ల్యాప్‌టాప్ ఇంటెల్ కోర్ అల్ట్రా 5, ఇంటెల్ కోర్ అల్ట్రా 7 ప్రాసెసర్‌లతో నాలుగు వేరియంట్‌లలో కొనుగోలుకు అందుబాటులో ఉంది. కాగా, ఇది గ్రే రంగులో మాత్రమే లభిస్తోంది.

కొనుగోలుదారులు శాంసంగ్ ఇండియా వెబ్‌సైట్, ఎంపిక చేసిన శామ్సంగ్ అధీకృత రిటైల్ స్టోర్‌లు, ఆన్‌లైన్ పోర్టల్‌ల ద్వారా ఈ ల్యాప్ టాప్ ని కొనుగోలు చేయవచ్చు. లాంచ్ ఆఫర్ కింద, కంపెనీ వినియోగదారులకు రూ. 10,000 వరకు బ్యాంక్ ఆధారిత క్యాష్‌బ్యాక్, 24 నెలల పాటు నో-కాస్ట్ EMI ఎంపికను కూడా అందిస్తోంది.

Also read: Laptop Radiation Effect: ల్యాప్‌టాప్ ని ఒడిలో పెట్టుకొని పని చేస్తున్నారా..అయితే జంట్స్ ఆ విషయంలో జాగ్రత్త పడాల్సిందే!

ఫీచర్లు:

శాంసంగ్ గెలాక్సీ బుక్ 5 ల్యాప్‌టాప్ విండోస్ 11 హోమ్ లో నడుస్తుంది. ఇది యాంటీ-గ్లేర్ కోటింగ్‌తో 15.6-అంగుళాల పూర్తి HD అమోలేడ్ టచ్‌స్క్రీన్‌ను కలిగి ఉంది. దీని డిస్ప్లే S పెన్‌కు కూడా మద్దతు ఇస్తుంది. దీనిని ఇంటెల్ కోర్ అల్ట్రా 7 (255U) ప్రాసెసర్, 32GB RAM, 1TB స్టోరేజ్‌తో కాన్ఫిగర్ చేయవచ్చు. ఈ కొత్త గెలాక్సీ బుక్ 5 దాని మునుపటి మోడల్ అంటే గెలాక్సీ బుక్ 4 కంటే 38 శాతం మెరుగైన గ్రాఫిక్స్ పనితీరును అందిస్తుందని కంపెనీ చెబుతోంది. ఇందులో 12 TOPS వరకు NPU కూడా ఉంది. ఇది AI-ఆధారిత ఫీచర్‌లను మెరుగ్గా పని చేస్తుంది.

గెలాక్సీ బుక్ 5లో AI ఫోటో రీమాస్టర్, AI సెలెక్ట్, సర్కిల్ టు సెర్చ్ ఆన్ PC, ట్రాన్స్‌క్రిప్ట్ అసిస్ట్ ఆన్ PC వంటి ఫీచర్‌లతో సహా అనేక AI ఆధారిత ఫీచర్‌లు అందుబాటులో ఉన్నాయి. కొత్త మోడల్‌లో ప్రత్యేకమైన కోపైలట్ బటన్ కూడా ఉంది. ఇది బహుళ-పరికర కనెక్టివిటీ కోసం క్విక్ షేర్, మల్టీ-కంట్రోల్, సెకండ్ స్క్రీన్ వంటి ఫీచర్‌లను అందిస్తుంది.

బ్యాటరీ విషయానికి వస్తే, శామ్‌సంగ్ గెలాక్సీ బుక్ 5లో 61.2Wh బ్యాటరీ ఉంది. దీంతో ఇది ఒకే ఛార్జ్‌లో 19 గంటల వరకు వీడియో ప్లేబ్యాక్‌ను అందించగలదని కంపెనీ పేర్కొంది. ఇక కనెక్టివిటీ కోసం, కొత్త గెలాక్సీ బుక్ 5 ల్యాప్‌టాప్‌లో రెండు అంతర్నిర్మిత HDMI, రెండు USB టైప్-A, రెండు USB టైప్-C పోర్ట్‌లు, మైక్రో SD స్లాట్, LAN కనెక్షన్ కోసం RJ45 పోర్ట్ ఉన్నాయి.