Calling Interface Changes: ఇటీవల కొన్ని స్మార్ట్‌ఫోన్‌లలో కాలింగ్‌ ఇంటర్‌ఫేస్‌ మార్పులు జరిగినట్లు తెలుస్తోంది. మొబైల్‌లో కాల్‌ చేసేటప్పుడు లేదా రిసీవ్‌ చేసేటప్పుడు స్క్రీన్‌పై కనిపించే రూపం కొంత భిన్నంగా మారింది. చాలా కాలంగా ఉపయోగిస్తున్న పాత ఫార్మాట్‌ స్థానంలో ఇప్పుడు కొత్త డిస్‌ప్లే విధానం అమలులోకి వస్తోంది. ఈ మార్పులు ముఖ్యంగా రియల్‌మీ, వన్‌ప్లస్‌, మోటో, ఒప్పో, వివో, ఐక్యూ మోడళ్లలో కనిపిస్తున్నాయని వినియోగదారులు చెబుతున్నారు. అయితే అందరికీ ఒకేసారి ఈ ఫీచర్లు కనబడడం లేదని, కొందరికి మాత్రం పాత విధానం అలాగే కొనసాగుతోందని సమాచారం.
పైకి లేదా కిందికి…
ఇంతకు ముందు కాల్‌ వచ్చే సమయంలో రిసీవ్‌ చేయడానికి లేదా కట్‌ చేయడానికి స్క్రీన్‌ను పైకి లేదా కిందికి స్లైడ్‌ చేయాల్సి వచ్చేది. కానీ ఇప్పుడు కొత్త ఇంటర్‌ఫేస్‌లో కాల్‌ స్వీకరించాలంటే లేదా నిరాకరించాలంటే సైడ్‌ వైపు స్లైడ్‌ చేయాల్సి వస్తోంది. అంటే పాత పద్ధతికి భిన్నంగా డిజైన్‌ మార్చబడింది. ఈ మార్పు వలన వినియోగదారులకు కొంత కొత్త అనుభవం లభిస్తోందని కొందరు చెబుతుండగా, కొంతమందికి మాత్రం పాత అలవాటు కారణంగా ప్రారంభంలో కాస్త అసౌకర్యం ఎదురవుతోందని తెలుస్తోంది.
అక్షరాల పరిమాణం…
ఇక కాల్‌ చేసే సమయంలో స్క్రీన్‌పై కనిపించే అక్షరాల పరిమాణం కూడా గణనీయంగా పెరిగింది. ముందుగా చిన్నగా కనిపించే నెంబర్‌ లేదా కాంటాక్ట్‌ పేరు ఇప్పుడు పెద్ద అక్షరాలలో స్పష్టంగా చూపెడుతోంది. దీని వలన వినియోగదారులు సులభంగా గమనించగలుగుతున్నారు. ముఖ్యంగా పెద్దవారికి ఈ ఫీచర్‌ ఉపయోగకరంగా ఉందని అభిప్రాయాలు వ్యక్తమవుతున్నాయి.
కాల్‌ హిస్టరీలో..
అదనంగా, కాల్‌ హిస్టరీలో కూడా కొత్తగా మార్పులు వచ్చాయి. ఇంతకుముందు అన్ని కాల్స్‌ ఒకే చోట కనిపించేవి. కానీ ఇప్పుడు ఆల్‌ కాల్స్‌, మిస్‌డ్‌ కాల్స్‌ అనే విభాగాలుగా వేరుగా ఉంటున్నాయి. అంతేకాదు కాంటాక్ట్స్‌ వివరాలు స్పామ్‌, నాన్‌ స్పామ్‌ కేటగిరీలుగా విడదీసి కనిపిస్తున్నాయి. ఈ విభజన వలన అనవసర కాల్స్‌ నుంచి వినియోగదారులు అప్రమత్తంగా ఉండగలుగుతున్నారు. ముఖ్యంగా తెలియని నంబర్ల నుంచి వచ్చే కాల్స్‌ ఏవైనా అనుమానాస్పదమా కాదా అని సులభంగా గుర్తించవచ్చు.
రియల్‌మీ, వన్‌ప్లస్‌, మోటో, ఒప్పో, వివో, ఐక్యూ వంటి బ్రాండ్ల ఫోన్లలో ఈ ఇంటర్‌ఫేస్‌ అప్‌డేట్‌ అమలవుతోందని తెలుస్తోంది. అయితే అన్ని మోడళ్లలో ఒకేసారి అందుబాటులోకి రాలేదు. కొందరికి ఇప్పటికే ఈ కొత్త ఫీచర్లు అందగా, మరికొందరికి ఇంకా పాత రూపమే కనిపిస్తోంది. అంటే ఈ అప్‌డేట్‌ దశలవారీగా రోలౌట్‌ అవుతోందని అర్థం. సాధారణంగా కంపెనీలు తమ యూజర్లకు ఒకేసారి కాకుండా విడతల వారీగా అప్‌డేట్స్‌ అందిస్తాయి. ఇదే కారణంగా ఒకరికీ కొత్త స్క్రీన్‌ కనబడగా, మరొకరికీ కనిపించకపోవచ్చు.
Also Read: https://teluguprabha.net/devotional-news/meaning-of-ganesh-trunk-left-and-right-sides-explained/
