మీరు బ్యాంకు లోన్ తీసుకుని ప్రతి నెలా EMI చెల్లిస్తున్నారా? ప్రతి నెలా నిర్దిష్ట EMI చెల్లించాల్సి ఉంటుంది, కానీ ఆర్థిక ఇబ్బందుల కారణంగా కొన్ని సందర్భాల్లో ఈ EMIలను చెల్లించడం కష్టం అవుతుంది. ఈ EMIలను ఎన్ని నెలలు చెల్లించకపోతే బ్యాంకు మీ పై ఎలాంటి చర్యలు తీసుకుంటుందో తెలుసుకోవడం చాలా ముఖ్యం.
సాధారణంగా, హోమ్ లోన్ టెర్మ్ 15 నుంచి 20 సంవత్సరాలు ఉంటుంది. మొదటి కొన్ని సంవత్సరాలలో EMIలు చెల్లించడం ఇబ్బంది కలిగించదు. కానీ కాలక్రమేణా ఇతర బాధ్యతలు పెరిగిపోవడం, వ్యాపారంలో లేదా ఉద్యోగంలో స్థిరత్వం లేకపోవడం, కుటుంబ ఆర్థిక బాధ్యతలు పెరగడం వలన EMIలు చెల్లించడంలో ఇబ్బందులు ఎదురవుతుంటాయి. ఈ పరిస్థితుల్లో, బ్యాంకులు మొదట 3 నెలల పాటు డీఫాల్ట్ చేయకుండా హెచ్చరికలు పంపుతాయి. 3 నెలలు పూర్తి కాకపోతే, బ్యాంకు మీకు నోటీసులు పంపడం ప్రారంభిస్తుంది.
ప్రథమ నెల EMI చెల్లించకపోతే పెద్ద ఇబ్బంది ఉండదు, మీరు తర్వాత చెల్లించవచ్చు కానీ అదనపు ఛార్జీలు రావచ్చు. చెక్ బౌన్స్ ఫీజులు కూడా వసూలు చేయవచ్చు. రెండవ నెల కూడా EMI చెల్లించకపోతే, బ్యాంకు నుండి వార్నింగ్ మెసేజ్ మీ మొబైల్ నెంబర్‌కు వస్తుంది. అలాగే, బ్యాంకు మీరు చెల్లించాల్సిన EMIలు మరియు అదనపు ఛార్జీల వివరాలను తెలియజేస్తూ నోటీసు పంపిస్తుంది.
మూడవ నెలలో కూడా EMI చెల్లించకపోతే, పరిస్థితి మరింత తీవ్రమవుతుంది. బ్యాంకులు మీ క్రెడిట్ రేటింగ్‌ను తగ్గించి, జాబితాలో చేర్చే అవకాశం ఉంది. దీనితో మీరు భవిష్యత్తులో రుణాలు పొందడంలో ఇబ్బందులు ఎదుర్కొంటారు. చివరగా, బ్యాంకులు రికవరీ ఏజెంట్లను నియమించి మీ ఇళ్లకు పంపించి, వివిధ పద్ధతుల్లో రుణం తిరిగి వసూలు చేసే ప్రయత్నం చేస్తాయి.
తర్వాత 3 నెలలు దాటినా EMI చెల్లించకపోతే, బ్యాంకులు SARFAESI యాక్ట్ 2002 ప్రకారం చర్యలు తీసుకుంటాయి. ఈ చట్టం ప్రకారం, బ్యాంకులు మీ తాకట్టు పెట్టిన ప్రాపర్టీని స్వాధీనం చేసుకోవచ్చు లేదా హామీ ఇచ్చిన వారిని సంప్రదించి రుణం చెల్లించమని డిమాండ్ చేస్తాయి.
మీరు ఆర్థిక ఇబ్బందుల కారణంగా EMIలు చెల్లించలేని పరిస్థితిలో ఉంటే, బ్యాంకు అధికారులతో నిజాయితీగా మాట్లాడండి. మీ ఆర్థిక పరిస్థితిని వారికి వివరించి, వడ్డీ తగ్గించడానికి లేదా లోన్ కాలం పెంచడానికి అభ్యర్థించండి. మరీ పరిస్థితి తీవ్రమైతే, మీ ఇంటిని బ్యాంకు ద్వారా అమ్మడం ఉత్తమం. ఇతర ఏజెంట్ల ద్వారా అమ్మితే, మీరు ఎక్కువ డబ్బు కోల్పోతారు.
