ఆదిలాబాద్ గిరిజనుల సంప్రదాయ నృత్యమైన గుస్సాడీ డ్యాన్స్ చేశారు కలెక్టర్. ఆదిలాబాద్ జిల్లా ఇంద్రవెల్లి మండల కేంద్రంలోని జెడ్ పి హెచ్ ఎస్ లో మంగళవారం నిర్వహించిన ట్రైబల్ కల్చర్ మీట్ 2024-25 కార్యక్రమానికి ముఖ్య అతిథిగా ఆదిలాబాద్ జిల్లా కలెక్టర్ రాజార్షి షా హాజరయ్యారు. ముందుగా విద్యార్థులు ప్రదర్శించిన చిత్రాలను తిలకించారు. అనంతరం విద్యార్థులతో కలిసి గుస్సాడీ వేషధారణలో ఉత్సాహంగా గుస్సాడి నృత్యం చేశారు.
విద్యార్థుల కేరింతల నడుమ
కలెక్టర్ నృత్యం చేస్తూ ఉంటే విద్యార్థులందరూ కేరింతలు కొట్టారు. ఈ సందర్భంగా కలెక్టర్ మాట్లాడుతూ అనాదిగా వస్తున్న సంస్కృతి సాంప్రదాయాలను ఆచారాలను కాపాడుకోవాల్సిన బాధ్యత ప్రతి ఒక్కరిపై ఉందని అన్నారు. ప్రభుత్వం ఆదివాసీల ఆచార వ్యవహారాలను సాంప్రదాయాలను పరిరక్షిస్తుందని పేర్కొన్నారు. ఈ కార్యక్రమంలో పలువురు అధికారులు పాల్గొన్నారు.
