Leaves On Second Saturday: హైదరాబాద్‌లో పాఠశాలలకు సంబంధించి రెండో శనివారపు సెలవులపై కొంతకాలంగా సరికొత్త డిమాండ్ వినిపిస్తోంది. వేసవి సెలవులు ముగిశాక జూన్ 12 నుంచి పాఠశాలలు పునఃప్రారంభమయ్యాయి. అప్పటి నుంచీ తరగతులు పూర్తిస్థాయిలో సాగుతుండగా, విద్యార్థులు, ఉపాధ్యాయులు తమ తమ పనిలో నిమగ్నమయ్యారు. అయితే ప్రస్తుతం విద్యావ్యవస్థలో మరో కీలక అంశం చర్చనీయాంశంగా మారింది – అదే ప్రతి నెల రెండో శనివారాన్ని సెలవుగా ప్రకటించి అమలులో పెట్టాలన్న డిమాండ్.

తెలంగాణ ప్రభుత్వ క్యాలెండర్ ప్రకారం రెండవ శనివారాలు అధికారిక సెలవు దినాలుగా పేర్కొనబడ్డాయి. అయినప్పటికీ, కొన్ని ప్రైవేట్ మరియు కార్పొరేట్ పాఠశాలలు ఈ నిబంధనను పాటించకుండా ఆ రోజు కూడా తరగతులు నిర్వహిస్తున్నట్లు ఆరోపణలు వస్తున్నాయి. దీనివల్ల ఉపాధ్యాయులు, విద్యార్థులు తీవ్రంగా ఇబ్బందులు పడుతున్నారని చెబుతున్నారు.

ఉపాధ్యాయ సంఘాల అభిప్రాయం ప్రకారం, ఉపాధ్యాయులు ప్రతి రోజు సుమారు 10 గంటల పాటు పనిచేస్తుండటంతో వారికీ విశ్రాంతి అవసరమని పేర్కొంటున్నారు. తరగతుల అనంతరం పాఠశాల పరిపాలనా పనులు కూడా చేయాల్సిరావడం వల్ల శారీరక, మానసిక ఒత్తిడి పెరిగిపోతోందని వారు వాపోతున్నారు. దీంతో వారానికి ఒక్కరోజు (ఆదివారం) సెలవుతో సరిపెట్టడం కష్టంగా మారిందని భావిస్తున్నారు. అందుకే ప్రతి నెల రెండవ శనివారాన్ని తప్పనిసరిగా సెలవుగా ప్రకటించి, అన్ని పాఠశాలలు దీనిని పాటించాలన్న డిమాండ్‌ బలంగా వినిపిస్తోంది.

ఈ అంశంపై టీచర్స్ మరియు స్టూడెంట్స్ యూనియన్లు (TPTLF, SFI, DYFI) గురువారం రాష్ట్ర పాఠశాల విద్యా సంచాలకుడు డాక్టర్ నవీన్ నికోలస్‌కు వినతి పత్రాన్ని అందజేశారు. నగరంలోని కొన్ని ప్రైవేట్ పాఠశాలలు ప్రభుత్వ ఆదేశాలను ఉల్లంఘిస్తున్నట్లు అందులో స్పష్టం చేశారు. ఇప్పటి వరకూ రాష్ట్ర ప్రభుత్వం దీనిపై స్పందించకపోయినప్పటికీ, సమస్యను పరిష్కరించేందుకు తగిన చర్యలు తీసుకోవాలన్న విజ్ఞప్తి చేస్తున్నారు. ఈ నేపథ్యంలో, పాఠశాలల మేనేజ్మెంట్లు, ప్రభుత్వం, విద్యార్థుల కుటుంబాలు కలిసి ఈ అంశంపై సానుకూలంగా స్పందించాలని, విద్యావ్యవస్థలో సమతుల్యత కోసం అవసరమైన మార్గదర్శకాలు రూపొందించాలని పలువురు అభిప్రాయపడుతున్నారు.