Hyderabad Ganesh Immersion 2025 Traffic Diversions: హైదరాబాద్‌లో గణేష్ ఉత్సవాల మహా శోభాయాత్రకు సర్వం సిద్ధమైంది. సెప్టెంబర్ 6, 2025న జరిగే ఈ ఘనమైన వేడుక కోసం హైదరాబాద్ పోలీస్ కమిషనర్ సీవీ ఆనంద్ రూట్ మ్యాప్‌ను విడుదల చేశారు. ప్రధాన మార్గాలు, అనుబంధ రూట్లు, నిమజ్జన ప్రాంతాలు, పార్కింగ్ స్థలాలు, బేబీ పాండ్స్ వివరాలతో ఈ మ్యాప్ రూపొందించారు. అయితే, ఈ ఏడాది శోభాయాత్రలో డీజే, అధిక శబ్దం ఉండకూడదని పోలీసులు ఆంక్షలు విధించడంతో భక్తులు అసంతృప్తి వ్యక్తం చేస్తున్నారు.

ALSO READ: Harish Rao : కవిత వివాదంలో మరిన్ని ట్విస్టులు.. హరీష్‌రావు కౌంటర్‌ సిద్ధం!

ప్రధాన శోభాయాత్ర మార్గం

ప్రధాన శోభాయాత్ర బాలాపూర్‌లోని కట్ట మైసమ్మ ఆలయం నుంచి ప్రారంభమై, హుస్సేన్‌సాగర్ వరకు 13 కి.మీ. మేర సాగనుంది. ఈ మార్గం కేశవగిరి, చాంద్రాయణగుట్ట ఫ్లైఓవర్, మహబూబ్‌నగర్ క్రాస్‌రోడ్, ఫలక్‌నూమా రైల్వే ఓవర్‌బ్రిడ్జ్, అలియాబాద్, నాగులచింత, చార్మినార్, మదీనా, అఫ్జల్‌గంజ్, ఎస్‌ఏ బజార్, ఎంజే మార్కెట్, అబిడ్స్, బషీర్‌బాగ్, లిబర్టీ జంక్షన్, అంబేద్కర్ విగ్రహం, ఎన్టీఆర్ మార్గ్, పీవీఎన్‌ఆర్ మార్గ్ (నెక్లెస్ రోడ్) మీదుగా సాగుతుంది. ఈ రూట్‌లో విగ్రహాలు తీసుకెళ్లే వాహనాలు మినహా ఇతర వాహనాలను అనుమతించరు.

సికిందరాబాద్ నుంచి వచ్చే ఊరేగింపు సంగీత్ థియేటర్, పట్నీ, ప్యారడైజ్ జంక్షన్, ఎంజీ రోడ్, రాణిగంజ్, కర్బలా మైదానం, ట్యాంక్ బండ్ మీదుగా నెక్లెస్ రోడ్‌కు చేరుకుంటుంది. అలాగే, చిలకలగూడ, ఉప్పల్, తార్నాక, తోలిచౌకి, మెహిదీపట్నం, ఎర్రగడ్డ నుంచి వచ్చే అనుబంధ రూట్లు కూడా ఈ ప్రధాన మార్గంలో కలుస్తాయి.

ట్రాఫిక్ డైవర్షన్స్

ట్రాఫిక్ ఆంక్షలు సెప్టెంబర్ 6 ఉదయం 6 గంటల నుంచి సెప్టెంబర్ 7 ఉదయం 10 గంటల వరకు అమల్లో ఉంటాయి. నెక్లెస్ రోడ్, ఎన్టీఆర్ మార్గ్, ట్యాంక్ బండ్, ఖైరతాబాద్ ఫ్లైఓవర్‌లో ఈ ఆంక్షలు సెప్టెంబర్ 7 సాయంత్రం వరకు కొనసాగవచ్చు. కీలక డైవర్షన్ పాయింట్లు:

• సౌత్ ఈస్ట్ జోన్: కేశవగిరి, చాంద్రాయణగుట్ట క్రాస్‌రోడ్, మహబూబ్‌నగర్ క్రాస్‌రోడ్, చంచల్‌గూడ జైల్ క్రాస్‌రోడ్స్, మూసారాంబాగ్, చాదర్‌ఘాట్ బ్రిడ్జ్.

• సౌత్ జోన్: ఇంజన్ బౌలీ, షంషీర్‌గంజ్, నాగులచింత, హిమ్మత్‌పుర, హరిబౌలీ, మొగల్‌పుర, మదీనా క్రాస్‌రోడ్, నయాపూల్.

• ఈస్ట్ జోన్: శివాజీ బ్రిడ్జ్, అఫ్జల్‌గంజ్, పుట్లిబౌలీ, కోఠి, హిమాయత్‌నగర్, వైఎంసీఏ.

• సెంట్రల్ జోన్: చాపెల్ రోడ్, గన్‌ఫౌండ్రీ, లిబర్టీ జంక్షన్, కవాడిగూడ, ముషీరాబాద్ క్రాస్‌రోడ్, బుద్ధ భవన్, నల్లగుట్ట జంక్షన్.

• నార్త్ జోన్: క్లాక్ టవర్, పట్నీ క్రాస్‌రోడ్స్, ప్యారడైజ్, రాణిగంజ్.

ప్రయాణికులు ఇన్నర్ రింగ్ రోడ్, మాసాబ్ ట్యాంక్-పంజాగుట్ట-బేగంపేట-సికిందరాబాద్ కారిడార్ లేదా ఔటర్ రింగ్ రోడ్‌ను ఉపయోగించాలని పోలీసులు సూచించారు.

పార్కింగ్ ఏర్పాట్లు

భక్తుల కోసం ఎన్టీఆర్ స్టేడియం, పబ్లిక్ గార్డెన్స్, బుద్ధ భవన్ వెనుక, ఆదర్శ్ నగర్, ఖైరతాబాద్ ఎంఎంటీఎస్ స్టేషన్, ఇన్‌స్టిట్యూట్ ఆఫ్ ఇంజినీర్స్ వంటి ప్రాంతాల్లో పార్కింగ్ సౌకర్యాలు ఏర్పాటు చేశారు.

బేబీ పాండ్స్

జీహెచ్‌ఎంసీ 74 కృత్రిమ పాండ్స్‌ను ఏర్పాటు చేసింది, వీటిలో 24 పోర్టబుల్ ట్యాంకులు, 23 తాత్కాలిక ఎక్సవేషన్ పాండ్స్, 27 శాశ్వత పాండ్స్ ఉన్నాయి. జైపాల్‌రెడ్డి స్ఫూర్తి స్థల్, సంజీవయ్య పార్క్, నాంపల్లి ఎగ్జిబిషన్ గ్రౌండ్, సైదాబాద్, గౌలిపుర, ఐఎస్ సదన్ వంటి ప్రాంతాల్లో ఈ పాండ్స్ ఉన్నాయి.

ఆర్టీసీ బస్సులు & హెల్ప్‌లైన్

600 ప్రత్యేక ఆర్టీసీ బస్సులు బషీర్‌బాగ్, ఇందిరాపార్క్, లక్డీకాపూల్, లిబర్టీ, ఖైరతాబాద్‌లకు అందుబాటులో ఉన్నాయి. సమాచారం కోసం హెల్ప్‌లైన్ నంబర్లు: 040-27852482, 8712660600, 9010203626.

భద్రత & ఇతర ఏర్పాట్లు

30,000 మంది పోలీసులతో భారీ బందోబస్తు ఏర్పాటు చేశారు. ట్యాంక్ బండ్ వద్ద 10 క్రేన్లు, సాగర తీరం చుట్టూ 30 క్రేన్లు, మొత్తం 403 క్రేన్లు అందుబాటులో ఉన్నాయి. మెడికల్ క్యాంపులు, మొబైల్ టాయిలెట్స్, కంట్రోల్ రూమ్‌లు ఏర్పాటు చేశారు. మిలాద్-ఉల్-నబీ సందర్భంగా అదనపు భద్రతా చర్యలు తీసుకున్నారు. సెప్టెంబర్ 6 ఉదయం 6 గంటల నుంచి 7 సాయంత్రం 6 గంటల వరకు మద్యం, కల్లు విక్రయాలపై నిషేధం విధించారు.

భక్తుల అసంతృప్తి

డీజే, బ్యాండ్‌లపై నిషేధం విధించడంతో భక్తులు ఆగ్రహం వ్యక్తం చేస్తున్నారు. హిందూ పండుగల్లో ఆటపాటలు, నృత్యాలు సహజమని, ప్రభుత్వం ఆంక్షలు విధించడం సరికాదని భజరంగ్‌దళ్, వీహెచ్‌పీ వంటి సంస్థలు అసంతృప్తి వ్యక్తం చేశాయి.

భక్తులు, ప్రయాణికులు పోలీసుల సూచనలు పాటించి, శాంతియుతంగా నిమజ్జనం జరపాలని అధికారులు కోరుతున్నారు.