హైదరాబాద్ ఇప్పుడు అంతర్జాతీయ ఖ్యాతిని దక్కించుకుంటోంది. ఇందుకు కారణం ప్రపంచ వ్యాప్తంగా పేరుగాంచిన మిస్ వరల్డ్ పోటీలకు ఈ నగరం ఆతిథ్యమివ్వడం. ప్రపంచంలో ఎన్నో గొప్ప నగరాలను దాటి, ఈ ప్రతిష్టాత్మక ఈవెంట్‌కు హోస్ట్ చేయడం హైదరాబాద్‌కి ఒక ప్రత్యేక గౌరవంగా నిలిచింది. ఇప్పటికే 51 దేశాలకు చెందిన అందాల భామలు నగరానికి చేరుకోవడం ప్రారంభించగా, శంషాబాద్ అంతర్జాతీయ విమానాశ్రయం సందడిగా మారింది.
ప్రతి కంటెస్టెంట్‌కు తెలంగాణ సాంప్రదాయ ఆతిథ్యాన్ని చూపుతూ ఘన స్వాగతం పలుకుతున్నారు. పూర్ణకుంభంతో, సంప్రదాయ దుస్తులతో సుస్వాగతం పలుకుతూ, రాష్ట్ర సంస్కృతిని అంతర్జాతీయ అతిథులకు పరిచయం చేస్తున్నారు. విమానాశ్రయం నుంచి హోటళ్ల వరకు వసతి, రవాణా, భద్రత వంటి ఏర్పాట్లను అధికార యంత్రాంగం ప్రత్యేక శ్రద్ధతో పర్యవేక్షిస్తోంది. ఎలాంటి అసౌకర్యం లేకుండా, అన్ని సేవలూ సమర్ధంగా అందించేందుకు అధికారులు 24 గంటలూ కసరత్తు చేస్తున్నారు.
ఇంకా మరిన్ని దేశాల నుంచి కంటెస్టెంట్లు రావొచ్చన్న అంచనాలతో నగరంలో ఇప్పటికే పండుగ వాతావరణం నెలకొంది. మిస్ వరల్డ్ వేడుకలు హైదరాబాద్ లో జరిగితే, అంతర్జాతీయంగా ఈ నగరానికి గౌరవం పెరుగుతుందని, హైదరాబాద్ బ్రాండ్ విలువ మరింతగా ఎదుగుతుందని అధికారులు ఆశిస్తున్నారు. ఈ మెగా ఈవెంట్‌ను విజయవంతంగా నిర్వహించేందుకు ప్రభుత్వం అన్ని విభాగాల సహకారంతో సిద్ధమవుతోంది.
