Telugu Students Died In London: భక్తితో సాగాల్సిన గణపతి నిమజ్జనం… వారి పాలిట శాపంగా మారింది. ఉన్నత చదువుల కోసం సముద్రాలు దాటి వెళ్లిన ఆ యువకుల జీవితాల్లో పండుగ వెలుగులు నిండకముందే చీకట్లు అలుముకున్నాయి. లండన్‌లో జరిగిన ఘోర రోడ్డు ప్రమాదం ఇద్దరు తెలుగు విద్యార్థులను బలితీసుకుంది. ఆనందంగా సాగిన వేడుక చివరకు విషాదాంతం ఎలా అయింది…? ఆ అర్ధరాత్రి అసలేం జరిగింది..? తోటి విద్యార్థుల పరిస్థితి ఏంటి..? హైదరాబాద్‌లోని వారి కుటుంబాల్లో నెలకొన్న కన్నీటి గాథ…
కళ్లముందే కలలు కల్లలు: ఉన్నత భవిష్యత్తుపై ఎన్నో ఆశలతో లండన్ వెళ్లిన ఇద్దరు యువకుల జీవితాలు అర్ధాంతరంగా ముగిసిపోయాయి.
చైతన్య యాదవ్ (23): హైదరాబాద్, నాదర్‌గుల్‌కు చెందిన చైతన్య, కేవలం 8 నెలల క్రితమే ఎంఎస్ చదివేందుకు లండన్ వెళ్లాడు. బీపీపీ యూనివర్సిటీలో చదువుతూ, ఇల్‌ఫోర్డ్ ప్రాంతంలో స్నేహితులతో కలిసి ఉంటున్నాడు.
రిషితేజ (21): బోడుప్పల్‌కు చెందిన రిషితేజ, ఈస్ట్ లండన్ యూనివర్సిటీలో ఎంబీఏ విద్యార్థి. బార్కింగ్ ప్రాంతంలో స్నేహితులతో నివాసం ఉంటున్నాడు.
నిమజ్జనం ముగిసి… తిరిగిరాని లోకాలకు: వినాయక చవితి సందర్భంగా ఈ యువకులందరూ ఇల్‌ఫోర్డు ప్రాంతంలో గణపతి విగ్రహాన్ని ప్రతిష్ఠించారు. ఆదివారం సాయంత్రం నిమజ్జనం చేయాలని నిర్ణయించుకున్నారు. తొమ్మిది మంది స్నేహితులు రెండు కార్లలో 35 మైళ్ల దూరంలోని సౌత్‌ఎండ్ బీచ్‌కు బయలుదేరారు. భక్తిశ్రద్ధలతో నిమజ్జన కార్యక్రమాన్ని పూర్తి చేసుకున్నారు. ఆ ఆనందం ఎంతోసేపు నిలవలేదు.
భారత కాలమానం ప్రకారం సోమవారం తెల్లవారుజామున తిరిగి వస్తుండగా, రహదారిపై ఉన్న మలుపు వద్ద డ్రైవర్ డివైడర్‌ను గమనించలేకపోయాడు. వేగంగా వెళ్తున్న మొదటి కారు డివైడర్‌ను బలంగా ఢీకొట్టింది. దాని వెనుకే వస్తున్న రెండో కారు, వేగాన్ని అదుపుచేయలేక మొదటి కారును ఢీకొట్టింది. రెప్పపాటులో జరిగిన ఈ ఘోర ప్రమాదం వారి జీవితాలను ఛిద్రం చేసింది.
క్షతగాత్రుల ఆర్తనాదాలు: ఈ ప్రమాదంలో చైతన్య యాదవ్ తీవ్ర గాయాలతో అక్కడికక్కడే ప్రాణాలు విడిచాడు. తీవ్రంగా గాయపడిన రిషితేజ ఆసుపత్రిలో చికిత్స పొందుతూ మృతి చెందాడు. వారితో పాటు ప్రయాణిస్తున్న తాటికాయల నూతన్‌కు సగం శరీరం పక్షవాతానికి గురైంది. రైవుల సాయి గౌతమ్ పరిస్థితి విషమంగా ఉన్నట్లు సమాచారం. వంశీ, యువతేజారెడ్డి, వెంకట సుమంత్ కూడా గాయాలతో ఆసుపత్రిలో చికిత్స పొందుతున్నారు.
ప్రమాద సమయంలో గోపీచంద్, మనోహర్ కార్లు నడిపినట్లు, వారిని ఎసెక్స్ పోలీసులు అదుపులోకి తీసుకుని విచారించినట్లు స్నేహితులు తెలిపారు.
ఉన్నత చదువులకని వెళ్లిన కుమారులు, ఇలా విగతజీవులుగా మారడంతో వారి తల్లిదండ్రులు కన్నీరుమున్నీరవుతున్నారు. తమ పిల్లల మృతదేహాలను స్వదేశానికి రప్పించేందుకు ప్రభుత్వం చొరవ చూపాలని బాధితుల కుటుంబ సభ్యులు కన్నీటితో వేడుకుంటున్నారు.
