Hyderabad land encroachment :  హైదరాబాద్ ఐటీ కారిడార్ నడిబొడ్డున ఒక్కడే ఏకంగా రూ.400 కోట్ల ప్రభుత్వ భూమిని కబ్జా చేస్తే? పార్కులను, రోడ్లను సైతం వదలకుండా తన సామ్రాజ్యాన్ని విస్తరిస్తే? అలాంటి కబ్జా కోటలను ‘హైడ్రా’ (హైదరాబాద్​ రివర్స్ అండ్ లేక్స్ డెవలప్మెంట్ అండ్ రిహేబిలిటేషన్ అథారిటీ) బృందం బద్దలు కొట్టింది. ఇంతకీ ఎవరా కబ్జాదారుడు? ఈ భారీ ఆపరేషన్ వెనుక ఉన్న పూర్తి కథేమిటో తెలుసుకుందాం.

రంగారెడ్డి జిల్లా, శేరిలింగంపల్లి మండలంలోని మాదాపూర్ జూబ్లీ ఎన్‌క్లేవ్‌లో ప్రభుత్వానికి చెందిన విలువైన పార్కులు, రోడ్లను ఆక్రమించి నిర్మించిన అక్రమ కట్టడాలపై హైడ్రా ఉక్కుపాదం మోపింది. సుమారు 16,000 గజాల స్థలాన్ని అక్రమార్కుల చెర నుంచి విడిపించింది. దీని విలువ బహిరంగ మార్కెట్లో రూ.400 కోట్లకు పైగానే ఉంటుందని అంచనా.

ఒక్కడే… రూ.400 కోట్ల కబ్జా..
ప్రజావాణిలో ఫిర్యాదు: 1995లో అనుమతి పొంది, 2006లో ప్రభుత్వంచే రెగ్యులరైజ్ చేయబడిన జూబ్లీ ఎన్‌క్లేవ్ లేఔట్‌లో జీహెచ్‌ఎంసీకి గిఫ్ట్ డీడ్ చేసిన పార్కులను జైహింద్‌రెడ్డి అనే వ్యక్తి కబ్జా చేశారంటూ స్థానిక ప్రతినిధులు హైడ్రా నిర్వహించే ‘ప్రజావాణి’లో ఫిర్యాదు చేశారు.

హైడ్రా క్షేత్రస్థాయి విచారణ: ఫిర్యాదు స్వీకరించిన హైడ్రా కమిషనర్ రంగనాథ్ ఆదేశాలతో అధికారులు రంగంలోకి దిగారు. క్షేత్రస్థాయిలో విచారణ జరపగా కబ్జా ఆరోపణలు వాస్తవమేనని తేలింది.

కబ్జా పర్వం ఇదీ…
రెండు పార్కుల స్థలం (సుమారు 8,500 గజాలు)
లేఔట్‌కు చెందిన రోడ్డు (సుమారు 5,000 గజాలు)
300 గజాల ప్రభుత్వ స్థలంలో అక్రమ హోటల్ నిర్మాణం.

అక్రమ ఆదాయం: ప్రభుత్వ స్థలంలో హోటల్, భారీ హోర్డింగ్ ఏర్పాటు చేసి, వాటి ద్వారా జైహింద్‌రెడ్డి నెలకు రూ.4 లక్షల వరకు అక్రమంగా ఆదాయం పొందుతున్నట్లు ఫిర్యాదులో పేర్కొన్నారు. గతంలో జీహెచ్‌ఎంసీ నోటీసులు ఇచ్చినా అతను లెక్కచేయలేదని తెలిపారు.

కూల్చివేతలతో హైడ్రా చర్యలు : విచారణలో కబ్జాలు నిజమేనని నిర్ధారించుకున్న హైడ్రా అధికారులు, గురువారం భారీ పోలీసు బందోబస్తు మధ్య అక్రమ నిర్మాణాలను నేలమట్టం చేశారు. ప్రభుత్వ స్థలంలోని హోటల్ షెడ్డును పూర్తిగా తొలగించారు. కబ్జాకు గురైన పార్కులు, రోడ్డు స్థలాలను స్వాధీనం చేసుకున్నారు. వెంటనే ఆ స్థలం చుట్టూ ఫెన్సింగ్ ఏర్పాటు చేసి, “ఈ స్థలం హైడ్రా ఆధీనంలో కలదు” అని హెచ్చరిక బోర్డులను ఏర్పాటు చేశారు. ప్రభుత్వ ఆస్తులను కబ్జా చేసిన జైహింద్‌రెడ్డిపై కఠిన చర్యలు తీసుకుంటామని, క్రిమినల్ కేసులు నమోదు చేస్తున్నామని అధికారులు స్పష్టం చేశారు.

హైదరాబాద్‌ను వరద ముప్పు లేని నగరంగా తీర్చిదిద్దే లక్ష్యంతో పనిచేస్తున్న హైడ్రా, చెరువులు, నాలాలతో పాటు పార్కులు, ప్రభుత్వ స్థలాల పరిరక్షణకు అత్యంత ప్రాధాన్యత ఇస్తోంది. మాదాపూర్‌లో చేపట్టిన ఈ భారీ కూల్చివేత, నగరంలో కబ్జాలకు పాల్పడే వారికి గట్టి హెచ్చరిక అని అధికారులు స్పష్టం చేస్తున్నారు.