Doctor Namratha: సికింద్రాబాద్‌లోని సృష్టి ఫెర్టిలిటీ సెంటర్‌ పేరుతో నిర్వహించిన అవినీతిపరమైన కార్యకలాపాలు ఆందోళన కలిగిస్తున్నాయి. ఈ క్లినిక్ ముసుగులో శిశువులను అక్రమంగా విక్రయించినట్లు పోలీసులు తాజాగా వెల్లడించారు. ఈ కేసులో ప్రధాన నిందితురాలిగా ఉన్న డాక్టర్ నమ్రతను ఐదు రోజుల పాటు కస్టడీలో విచారించిన పోలీసులు, విచారణలో పలు కీలక ఆధారాలను సేకరించారు. బుధవారం ఆమె కస్టడీ ముగియగా, 80 శిశువులు అక్రమంగా కొనుగోలు చేయబడి ఇతరులకు అప్పగించబడ్డట్లు గుర్తించారు. బాధితుల్లో ఒకరైన మహిళ ఫిర్యాదు చేసిన కేసులో, ఆమె బిడ్డను నిజంగా డాక్టర్ నమ్రత కొనుగోలు చేసినట్టు విచారణలో అంగీకరించినట్టు సమాచారం.

ఇంతటి ఘోరమైన మోసం వెనక డాక్టర్ నమ్రత మాదిరిగా పలు ముఠాలు, సిబ్బంది కూడా ఉన్నట్లు తేలింది. విశాఖపట్నంలోని ఫెర్టిలిటీ కేంద్రంలో పని చేసిన మేనేజర్ కల్యాణి, ల్యాబ్ టెక్నీషియన్ మోక్షిత కూడా డాక్టర్ నమ్రత ఇచ్చే కమీషన్‌ ఆశతో శిశువులను ఏజెంట్ల ద్వారా సేకరించారని చెప్పినట్లు తెలిసింది. మాతృత్వం ఆశతో IVF చికిత్సకు వచ్చే మహిళలను మోసం చేసి, నెలలు నిండక ముందే ప్రసవాలు చేయించి పిల్లలను సరోగసీ పేరిట ఇతరులకు అప్పగించిన ఉదంతాలు వెలుగులోకి వచ్చాయి.

అంతేగాక, IVF చికిత్సల కోసం హార్మోన్ ఇంజెక్షన్లు, మాత్రలు అవసరమయ్యే మహిళలకు అధిక మోతాదుల్లో మందులు వాడించారని ఆరోపణలు వచ్చాయి. సికింద్రాబాద్‌లోని మరో ప్రైవేట్ ఫెర్టిలిటీ సెంటర్ గైనకాలజిస్టుల లెటర్‌హెడ్‌లను అనుమతులేకుండా వాడినట్టు తెలిసింది. దీనిపై తాజాగా ఫిర్యాదు రాగా, నాలుగు మందికి పైగా గైనకాలజిస్టుల పేర్లను అక్రమంగా వినియోగించినట్లు పోలీసులు గుర్తించారు.

ఆర్థిక లాభాల కోసం శిశువుల జీవితాలతో చెలగాటం ఆడిన డాక్టర్ నమ్రత, ఒక్కో శిశువును రూ.4-5 లక్షలకు కొనుగోలు చేసి, సరోగసీ పేరుతో రూ.30 నుంచి రూ.50 లక్షల వరకు విక్రయించినట్లు ఆధారాలు వెలుగులోకి వచ్చాయి. ఆమె బ్యాంకు ఖాతాలను ఫోరెన్సిక్ ఆడిట్‌ ద్వారా పరిశీలించనున్నారు. హైదరాబాద్, విశాఖ, విజయవాడలోని ఆమె ఆసుపత్రులు, నివాసాలపై దర్యాప్తు కొనసాగుతోంది. ఆస్తుల వివరాల కోసం స్టాంపులు, రిజిస్ట్రేషన్ శాఖకు కూడా అధికారులు లేఖలు పంపారు.

ఈ ఘోర స్కాం‌లో ఇప్పటివరకు మొత్తం 27 మంది నిందితులపై కేసులు నమోదయ్యాయి. వీరిలో 26 మందిని ఇప్పటికే అరెస్ట్ చేశారు. డాక్టర్ నమ్రత సరోగసీ పేరుతో 40-50 మంది నుండి దాదాపు రూ.20 కోట్లు వసూలు చేసినట్టు సమాచారం. ఎల్లారెడ్డిగూడకు చెందిన సంతోషి అనే మహిళ 18 మంది శిశువులను ఏజెంట్ల సహాయంతో సేకరించినట్టు గుర్తించారు. ఆమె ఇంట్లో దొరికిన డేటా ఆధారంగా, విక్రయించిన శిశువుల బయోలాజికల్ తల్లుల వివరాలను పోలీసులు గుర్తించే ప్రయత్నంలో ఉన్నారు. మరోవైపు, శంషాబాద్ విమానాశ్రయంలో అరెస్టైన డాక్టర్ విద్యుల్లతకు బుధవారం బెయిల్ మంజూరైంది.

ఈ కేసు వెలుగులోకి రావడంతో దేశవ్యాప్తంగా IVF, సరోగసీ క్లినిక్‌లలో జరిగే ప్రక్రియలపై ప్రజల్లో అనుమానాలు వెల్లువెత్తుతున్నాయి. శిశువుల్ని వస్తువుల్లా చూడటం ఎంత అనైతికమో ఈ ఘటన మరోసారి రుజువు చేసింది. న్యాయం కోసం బాధితులు ఎదురు చూస్తున్న ఈ కేసులో సత్వరమే కఠిన చర్యలు తీసుకోవాలని ప్రజలు కోరుతున్నారు.