చిన్నపిల్లలు ఏడుస్తుంటే.. వాళ్లకి చాక్లెట్టో, బిస్కెట్టో లేదా ఆట వస్తువో ఇచ్చి ఊరుకోబెట్టడం సహజం. అలా ఓ చిన్నారి ఏడుస్తుండగా.. సముదాయించేందుకు తల్లి కొబ్బరిముక్క ఇచ్చింది. అది గొంతుకకి అడ్డంపడి ఆ చిన్నారి చనిపోయాడు. ఈ విషాద ఘటన తెలంగాణలోని నెక్కొండ మండలంలో జరిగింది. వివరాల్లోకి వెళ్తే.. అయ్యప్పమాల ధరించిన తండ్రి మాలు.. ఇంట్లో నిత్యం పూజలు చేస్తూ దేవుడికి కొబ్బరికాయలు కొట్టేవారు.
ఆదివారం (డిసెంబర్ 4) తెల్లవారుజామున తల్లిదండ్రులు తమ పనుల్లో నిమగ్నమై ఉండగా.. మణికంఠ అనే 10 నెలల చిన్నారి ఏడవడం మొదలుపెట్టాడు. బిడ్డ ఏడుపు మానిపించేందుకు.. తల్లికవిత ఇంట్లో ఉన్న కొబ్బరిముక్కను చేతికిచ్చింది. సరిగ్గా పళ్లు కూడా రానీ ఆ చిన్నారి కొబ్బరి ముక్కను మింగేశాడు. దాంతో అది గొంతుకకు అడ్డంపడి శ్వాస తీసుకోవడంలో ఇబ్బంది కలిగించింది. వెంటనే తల్లిదండ్రులు మాలు-కవిత చిన్నారిని తీసుకుని ఆస్పత్రికి బయల్దేరగా మార్గమధ్యంలోనే చిన్నారి కన్నుమూశాడు. బిడ్డ మరణంతో ఆ ఇంట విషాదఛాయలు అలుముకున్నాయి. చిన్నపిల్లలకు అలాంటి ఘనపదార్థాలను తినేందుకు ఇవ్వకూడదని, ఇస్తే ఇలాంటి ఘటనలు జరుగుతాయని నిపుణులు చెబుతున్నారు.