BC Reservation ordinance: తెలంగాణలో బీసీలకు స్థానిక సంస్థల ఎన్నికల్లో 42 శాతం రిజర్వేషన్ కల్పించేందుకు రాష్ట్ర ప్రభుత్వం రూపొందించిన ఆర్డినెన్స్ ముసాయిదా రాజ్‌భవన్‌కు చేరుకుంది. ఇప్పటికే మంత్రివర్గం ఆమోదించిన ఈ సవరణను ఇప్పుడు గవర్నర్ ఆమోదించాల్సి ఉంది. ఇది అమలులోకి వచ్చిన తర్వాత పంచాయతీ రాజ్ చట్టంలో కీలక మార్పుగా చర్చించబడనుంది.
ఈ సందర్భంగా, 2018లో అమలులోకి వచ్చిన పంచాయతీ రాజ్ చట్టంలోని సెక్షన్ 285 క్లాజ్-ఎను సవరించేందుకు ప్రభుత్వం ఈ ముసాయిదా సిద్ధం చేసింది. ఇప్పటి వరకూ చట్టంలో రిజర్వేషన్లు 50 శాతం మించరాదనే నిబంధన ఉండగా, ఇప్పుడు ఆ పరిమితిని తొలగించేందుకు నిర్ణయం తీసుకున్నారు. అదే ఈ సవరణకు కేంద్ర బిందువుగా నిలిచింది.
హైకోర్టు ఇప్పటికే పంచాయతీ ఎన్నికల నిర్వహణకు గడువు విధించగా, ఈ క్రమంలో రిజర్వేషన్ల ప్రక్రియను వేగవంతం చేయాల్సిన అవసరం ఏర్పడింది. అందుకే ప్రభుత్వం ఆర్డినెన్స్ మార్గంలో చట్టాన్ని సవరించాలని నిర్ణయించింది. పంచాయతీరాజ్ శాఖ రూపొందించిన ముసాయిదాకు న్యాయశాఖ పచ్చజెండా ఊపింది. అనంతరం సంబంధిత మంత్రుల ఆమోదంతో అది గవర్నర్ వద్దకు వెళ్లింది.
గవర్నర్ ఈ ఆర్డినెన్స్‌కు ఆమోదమిస్తే, బీసీ రిజర్వేషన్లకు చట్టపరమైన ఆధారాన్ని కల్పించే మార్గం సుగమమవుతుంది. ఇకపై ప్రభుత్వం నియమించనున్న ప్రత్యేక కమిషన్, స్థానిక సంస్థల్లో రిజర్వేషన్ల ప్రాతిపదికను సిఫారసు చేయనుంది. ఆ నివేదికల ఆధారంగా ప్రభుత్వం రిజర్వేషన్లను ఖరారు చేసి, రాష్ట్ర ఎన్నికల సంఘానికి అందజేయనుంది. ఈ నెలల్లో పంచాయతీ ఎన్నికలు జరపాలని హైకోర్టు స్పష్టమైన గడువును విధించడంతో, రాష్ట్ర ఎన్నికల సంఘం ఏర్పాట్లను వేగంగా చేపడుతోంది. సెప్టెంబర్ 30 నాటికి ఎన్నికల ప్రక్రియ పూర్తవ్వాల్సి ఉంది.
