Dangers of using car heater while sleeping : హైదరాబాద్‌ను చలిపులి వణికిస్తోంది. ఈ చలి నుంచి ఉపశమనం పొందేందుకు, చాలామంది కార్లలో హీటర్లను విరివిగా వాడుతున్నారు. ఆ వెచ్చదనం హాయిగా అనిపించినా, దాని వెనుక ఓ ప్రాణాంతకమైన ప్రమాదం దాగి ఉందని మీకు తెలుసా? కారులో హీటర్ ఆన్ చేసి నిద్రపోవడం, ఆత్మహత్య చేసుకోవడంతో సమానమని నిపుణులు తీవ్రంగా హెచ్చరిస్తున్నారు. ఇటీవల ఓఆర్ఆర్‌పై కారులో ఓ వ్యక్తి సజీవ దహనమైన ఘటన వెనుక కూడా ఇదే కారణమై ఉండవచ్చని పోలీసులు అనుమానిస్తున్నారు. అసలు కారు హీటర్ ఎందుకంత ప్రమాదకరం? దానిని వాడేటప్పుడు తీసుకోవాల్సిన జాగ్రత్తలేంటి?

శామీర్‌పేట విషాదం.. కొద్ది రోజుల క్రితం, ఓఆర్‌ఆర్‌పై శామీర్‌పేట-కీసర రోడ్డులో, ఓ కారు పూర్తిగా దగ్ధమై, అందులో డ్రైవర్ సీటులో ఉన్న వ్యక్తి సజీవ దహనమయ్యాడు. చలికి తట్టుకోలేక, కారులో హీటర్ ఆన్ చేసి నిద్రించడమే ఈ ప్రమాదానికి కారణమై ఉండవచ్చని పోలీసులు ప్రాథమికంగా నిర్ధారించారు.

హీటర్ ఎందుకంత ప్రమాదకరం : “కారు ఇంజిన్ నడుస్తున్నప్పుడు వెలువడే వేడిని ఉపయోగించుకునే, హీటర్ పనిచేస్తుంది. ఇంజిన్‌లో ఏ చిన్న లీకేజీ ఉన్నా, లేదా ఎగ్జాస్ట్ వ్యవస్థ సరిగా లేకపోయినా, అత్యంత ప్రమాదకరమైన కార్బన్ మోనాక్సైడ్ వాయువు కారు లోపలికి ప్రవేశిస్తుంది,” అని ఆటోమొబైల్ నిపుణుడు కె. కిరణ్ హెచ్చరిస్తున్నారు.

సైలెంట్ కిల్లర్: కార్బన్ మోనాక్సైడ్‌కు రంగు, రుచి, వాసన ఉండదు. దీనిని పీల్చినప్పుడు, మన రక్తంలోని ఆక్సిజన్ స్థానాన్ని ఇది ఆక్రమించి, మెదడుకు, ఇతర అవయవాలకు ఆక్సిజన్ అందకుండా చేస్తుంది.

నిద్రలోనే మృత్యువు: హీటర్ వెచ్చదనానికి, ఈ వాయువు ప్రభావానికి మనిషి గాఢ నిద్రలోకి జారుకుని, తెలియకుండానే మృత్యుఒడిలోకి చేరతాడు. తలనొప్పి, వాంతులు దీని ప్రాథమిక లక్షణాలు. వైరింగ్‌లో షార్ట్ సర్క్యూట్ జరిగినా, హీటర్ వ్యవస్థలో లోపాలున్నా కారు దగ్ధమయ్యే ప్రమాదం ఉంది.

నిపుణుల సూచనలు.. ఈ జాగ్రత్తలు తప్పనిసరి!
కారులో హీటర్ వాడేటప్పుడు, ఈ జాగ్రత్తలు తప్పనిసరిగా పాటించాలి.
సర్వీసింగ్ ముఖ్యం: శీతాకాలం ప్రారంభానికి ముందే, ఇంజిన్, ఎగ్జాస్ట్ పైపు, వైరింగ్ వ్యవస్థను నిపుణులతో తనిఖీ చేయించుకోవాలి.
ఎక్కువసేపు వద్దు: హీటర్‌ను 22 డిగ్రీల ఉష్ణోగ్రత వద్ద, కొద్ది నిమిషాలు మాత్రమే ఉపయోగించాలి. ఎక్కువసేపు వాడటం ప్రమాదకరం.
నిద్రపోవద్దు: ఎట్టి పరిస్థితుల్లోనూ కారులో హీటర్ ఆన్ చేసి నిద్రపోవద్దు. ముఖ్యంగా, చిన్న పిల్లలు ఉన్నప్పుడు మరింత అప్రమత్తంగా ఉండాలి.
గాలి, వెలుతురు అవసరం: మూసి ఉంచిన గ్యారేజీలలో హీటర్‌ను అస్సలు ఉపయోగించవద్దు. బయట, గాలి ప్రసరణ ఉండే ప్రదేశంలోనే వాడాలి.
అప్రమత్తంగా ఉండండి: ఇంజిన్ నుంచి అసాధారణ శబ్దాలు, ఘాటైన వాసన వస్తే వెంటనే హీటర్‌ను ఆపి, కారును చెక్ చేయించాలి. చలి నుంచి ఉపశమనం కోసం వెతుక్కునే మార్గాలు, మన ప్రాణాలకే ముప్పు తేకూడదని గుర్తుంచుకోండి.