బర్త్ డే పార్టీ విషయంలో విద్యార్థినుల మధ్య జరిగిన గొడవ.. వారు ఆత్మహత్యాయత్నం చేసేంత వరకూ తీసుకెళ్లింది. ఈ ఘటన వరంగల్ జిల్లాలో జరిగింది. ఆరేపల్లిలోని ఓ రెసిడెన్షియల్ స్కూల్ కు చెందిన 10వ తరగతి విద్యార్థినులు ఆత్మహత్యాయత్నం చేశారు. హాస్టల్ లో జరిగిన ఓ విద్యార్థిని బర్త్ డే పార్టీ విషయంలో గొడవ జరగడంతో.. మనస్తాపానికి గురైన ఐదుగురు విద్యార్థినులు ఫినాయిల్ తాగేశారు. దీంతో వారంతా అస్వస్థతకు గురయ్యారు.
తోటి విద్యార్థినులు వెంటనే.. విషయాన్ని హాస్టల్ సిబ్బంది దృష్టికి తీసుకెళ్లడంతో.. ఐదుగురు బాలికలను వరంగల్ ఎంజీఎంకు తరలించారు. ప్రస్తుతం వారంతా అత్యవసర చికిత్స పొందుతున్నారు. ఈ ఘటనపై పోలీసులు తెలిపిన వివరాల మేరకు.. బాలికల హాస్టల్లో ఒక విద్యార్థిని బర్త్ డే వేడుకలు జరిగాయి. ఈ వేడుకకు హాస్టల్ విద్యార్థులు కాకుండా, బయటివాళ్లు ఎక్కువగా హాజరు కావడంపై హాస్టల్ అధికారులు విద్యార్థినులను మందలించారు. దీంతో ఈ అంశంపై విద్యార్థినుల మధ్య గొడవ జరిగింది. ఆవేదనకు గురైన బాలికలు.. ఆవేశంతో హాస్టల్లో ఉన్న ఫినాయిల్ తాగి ఆత్మహత్యాయత్నం చేశారు. ప్రస్తుతం విద్యార్థుల ప్రాణాలకు ప్రమాదమేమీ లేదని తెలిపారు.
