CM Revanth Reddy on YSR’s legacy : వ్యవసాయం దండగ కాదని నిరూపించిన వై.ఎస్.ఆర్. ఆశయ సాధనకు తమ ప్రభుత్వం కట్టుబడి ఉందని ముఖ్యమంత్రి రేవంత్ రెడ్డి పునరుద్ఘాటించారు. వైఎస్సార్ మెమోరియల్ అవార్డుల ప్రదానోత్సవంలో పాల్గొన్న ఆయన, వైఎస్సార్‌తో తనకున్న అనుబంధాన్ని, ఆయన పాలనలోని సంక్షేమ పథకాల గొప్పతనాన్ని స్మరించుకున్నారు. ముఖ్యంగా, గత ప్రభుత్వాల నిర్లక్ష్యానికి గురైన ప్రాజెక్టులను పూర్తి చేసి, వైఎస్సార్ కలలను సాకారం చేస్తామని ఆయన చేసిన ప్రకటన, తెలంగాణ రాజకీయాల్లో, ముఖ్యంగా నల్గొండ, రంగారెడ్డి జిల్లాల ప్రజల్లో కొత్త ఆశలను రేకెత్తిస్తోంది.

వైఎస్సార్ స్ఫూర్తితో ముందుకు: హైదరాబాద్‌లోని దసపల్లా హోటల్‌లో జరిగిన ఈ కార్యక్రమంలో సీఎం రేవంత్ రెడ్డి, డిప్యూటీ సీఎం భట్టి విక్రమార్క, మంత్రి శ్రీధర్ బాబు, పీసీసీ అధ్యక్షుడు మహేశ్ కుమార్ గౌడ్, కేవీపీ రామచంద్రరావు తదితరులు పాల్గొన్నారు. ఈ సందర్భంగా సుభాష్ పాలేకర్, డాక్టర్ సి. నాగేశ్వరరావు, సి. పద్మలకు వైఎస్సార్ మెమోరియల్ అవార్డులను ప్రదానం చేశారు. అనంతరం సీఎం రేవంత్ రెడ్డి ప్రసంగిస్తూ..

చెరగని సంక్షేమ ముద్ర: “ఉచిత విద్యుత్, ఆరోగ్యశ్రీ, ఫీజు రీయింబర్స్‌మెంట్ వంటి పథకాలతో వైఎస్సార్ ప్రజల గుండెల్లో చిరస్థాయిగా నిలిచిపోయారు. ఆ పథకాలను రద్దు చేసే ధైర్యం ఎవరికీ లేదు. మేం ఆ స్ఫూర్తిని కొనసాగిస్తూ, ఆరోగ్యశ్రీ పరిమితిని రూ.5 లక్షల నుంచి రూ.10 లక్షలకు పెంచాం,” అని సీఎం తెలిపారు.

కేవీపీ లాంటి స్నేహం: వైఎస్సార్-కేవీపీల స్నేహాన్ని కొనియాడుతూ, “ఈ తరానికి ఒకే వైఎస్సార్, ఒకే కేవీపీ ఉంటారు. కేవీపీ కావడం అంత తేలిక కాదు,” అని రేవంత్ రెడ్డి చమత్కరించారు.

నిర్లక్ష్యానికి గురైన ప్రాజెక్టులకు జీవం: గత ప్రభుత్వం నిర్లక్ష్యం చేసిన ప్రాజెక్టులను పూర్తి చేయడమే తమ ప్రభుత్వ లక్ష్యమని సీఎం స్పష్టం చేశారు.

తుమ్మిడిహెట్టి: “రైతాంగాన్ని ఆదుకోవడానికి వైఎస్సార్ సంకల్పించిన తుమ్మిడిహెట్టి ప్రాజెక్టును మేం పూర్తి చేస్తాం. రంగారెడ్డి జిల్లా చివరి ఆయకట్టు వరకు నీళ్లందిస్తాం,” అని ఆయన హామీ ఇచ్చారు.

ఎస్​ఎల్​బీసీ పూర్తి చేసి తీరుతాం: “ఫ్లోరైడ్ భూతంతో అల్లాడుతున్న నల్గొండ జిల్లా ప్రజల కన్నీళ్లు తుడవడానికి వైఎస్సార్ తలపెట్టిన ఎస్​ఎల్​బీసీ (శ్రీశైలం లెఫ్ట్ బ్యాంక్ కెనాల్) టన్నెల్ పనులను గత ప్రభుత్వం పదేళ్లుగా పక్కన పెట్టింది. దీనివల్ల ప్రమాదాలు కూడా జరిగాయి. ఎన్ని ఆటంకాలు ఎదురైనా, ఎస్​ఎల్​బీసీని పూర్తి చేసి, నల్గొండ ప్రజల తాగు, సాగునీటి కష్టాలను తీరుస్తాం,” అని సీఎం రేవంత్ రెడ్డి దృఢంగా ప్రకటించారు.

రుణమాఫీతో రైతులకు భరోసా: అధికారంలోకి వచ్చిన మూడు నెలల్లోనే రైతులకు ఇచ్చిన మాట నిలబెట్టుకున్నామని సీఎం అన్నారు. “రుణమాఫీ కింద 26 లక్షల మంది రైతుల ఖాతాల్లో రూ.21 వేల కోట్లు జమ చేశాం,” అని ఆయన వెల్లడించారు. రైతులు రసాయనిక ఎరువుల వాడకం తగ్గించి, సేంద్రీయ వ్యవసాయం వైపు మళ్లాలని సుభాష్ పాలేకర్‌ను స్ఫూర్తిగా తీసుకోవాలని సూచించారు.