K. Narayana on KCR Jagan : “ప్రమాణం చేసి సభకు రాకపోవడం, పెళ్లి చేసుకుని కాపురం చేయనన్నట్టుంది!” – ఈ ఘాటు వ్యాఖ్యలు చేసింది సీపీఐ జాతీయ కార్యదర్శి కె. నారాయణ. ఇద్దరు మాజీ ముఖ్యమంత్రులు కేసీఆర్, జగన్‌లు అసెంబ్లీ సమావేశాలకు గైర్హాజరవుతున్న తీరుపై ఆయన తనదైన శైలిలో విరుచుకుపడ్డారు. కేవలం మాజీ ముఖ్యమంత్రులకే పరిమితం కాకుండా, మావోయిస్టుల శాంతి చర్చల నుంచి బీసీ రిజర్వేషన్ల వరకు పలు కీలక అంశాలపై ఆయన చేసిన వ్యాఖ్యలు రాష్ట్ర రాజకీయాల్లో చర్చకు దారితీశాయి. అసలు ఆయన ఇంకా ఏమన్నారు..?

‘పెళ్లి చేసుకుని కాపురం చేయనట్టే!’ : గుంటూరు, సత్తెనపల్లిలో నిర్వహించిన మీడియా సమావేశాల్లో నారాయణ, ఇద్దరు మాజీ సీఎంల వైఖరిని తీవ్రంగా తప్పుబట్టారు.

జీతభత్యాలపై ప్రశ్న: “ప్రజా సమస్యలపై చర్చించాల్సిన అసెంబ్లీకి వెళ్లకుండా, ఎమ్మెల్యేలుగా రాయితీలు, జీతభత్యాలు తీసుకోవడం ఎంతవరకు సమంజసం?” అని ఆయన నిలదీశారు.

నిబంధనలు గుర్తుచేశారు: ప్రతిపక్ష హోదా అనేది కొన్ని నిబంధనల ప్రకారమే లభిస్తుందని, దానిని గౌరవించి, సభలో తమ వాణిని వినిపించాల్సిన బాధ్యత వారిపై ఉందని గుర్తుచేశారు. వారి తీరు, పెళ్లి తంతు ముగించి, కాపురానికి వెళ్లనన్నట్టుగా ఉందని ఎద్దేవా చేశారు.

మావోల శాంతి పిలుపు.. కేంద్రం తీరుపై విమర్శ : సాయుధ పోరాటానికి తాత్కాలికంగా విరామం ప్రకటిస్తున్నట్లు మావోయిస్టులు తీసుకున్న నిర్ణయాన్ని నారాయణ స్వాగతించారు. అయితే, కేంద్ర ప్రభుత్వం తీరుపై ఆయన అసంతృప్తి వ్యక్తం చేశారు.

కేంద్రం ప్రచారంపై వింత: “శాంతి చర్చల కోసం మావోయిస్టులు ముందుకొస్తే, దానిని కేంద్ర ప్రభుత్వం తమ విజయంగా ప్రచారం చేసుకోవడం వింతగా ఉంది,” అని ఆయన వ్యాఖ్యానించారు.

టెర్రరిస్టులతో పోల్చవద్దు: “స్పష్టమైన సామాజిక, ఆర్థిక, రాజకీయ సిద్ధాంతాలు కలిగిన నక్సలైట్లను, టెర్రరిస్టులతో పోలుస్తూ ప్రధాని మోదీ, అమిత్ షా మాట్లాడటాన్ని తీవ్రంగా ఖండిస్తున్నాం,” అని అన్నారు.

కార్పొరేట్లకు కొమ్ము?: గిరిజనులను భయభ్రాంతులకు గురిచేసి, సహజ వనరులను కార్పొరేట్ సంస్థలకు కట్టబెట్టేందుకే కేంద్రం కుట్రలు చేస్తోందని ఆయన ఆరోపించారు.

బీసీలకు 42% రిజర్వేషన్లు.. జాతీయ మహాసభలకు సిద్ధం : రాబోయే ఎన్నికల్లో బీసీలకు రాజ్యాంగబద్ధంగా 42 శాతం సీట్లు కేటాయించాలని నారాయణ డిమాండ్ చేశారు. ఈ లక్ష్య సాధన కోసం సీపీఐ ఆధ్వర్యంలో పెద్ద ఎత్తున ఉద్యమం చేపడతామని స్పష్టం చేశారు. ఈ నెల 21 నుంచి 25 వరకు ఛండీగఢ్‌లో జరగనున్న పార్టీ జాతీయ మహాసభల్లో అనేక కీలక అంశాలపై చర్చించి, భవిష్యత్ కార్యాచరణను ప్రకటిస్తామని ఆయన తెలిపారు.